Ko e Ngāue ʻi he Siasí
Ngaahi Tali ʻa e Lautohi Faka-Sāpaté
ʻOku ou faʻa fakahehema ke kumi ha ngaahi tali fakaʻangataha ki hoku ngaahi ʻahiʻahí—ke kole ki he ʻEikí ke tokoniʻi au ke u maʻu ʻa e meʻa pē taha te ne fakaleleiʻi ʻa e meʻa kotoa peé. Kuó u toki ʻilo ko e faʻahinga founga peheé te ne toe fakafaingataʻaʻiaʻi ange ha meʻa pē.
ʻI heʻeku akoʻi e kalasi Tokāteline ʻo e Ongoongoleleí ʻi hoku uōtí, ne u fakapapau ke fai ha ngaahi fehuʻi loloto ʻe fie maʻu ai ha ngaahi tali ʻo e fakalaulauloto mo lahi, foʻou mo mahino. ʻI hono fakalea ʻe tahá, ne u fie maʻu ke fakaʻehiʻehi mei hono toutou fai e ngaahi tali tatau mo motuʻa ʻa e “Lautohi Faka-Sāpaté” ʻa ē naʻe faʻa fai ʻe he kāingalotu ʻo e uōtí he uike takitaha.
ʻI heʻeku vakai ʻi he Fuakava Foʻoú ʻi heʻeku teuteu [lēsoní], ne u moʻutāfuʻua lahi ʻi hono ngāue ʻaki e foʻi lea ko e nofo, ʻa ia ʻoku toutou hā aí. Hangē ko ʻení, ʻoku pehē ʻi he Sione 15:10, “Kapau ʻoku mou fai ʻeku ngaahi fekaú, te mou nofo ʻi heʻeku ʻofá; ʻo hangē ko ʻeku fai ʻa e ngaahi fekau ʻa ʻeku Tamaí, peá u nofo ʻi heʻene ʻofá” (ko e toki tānaki atu hono fakamamafaʻí).
ʻI he Lotu Taukapo maʻongoʻonga ʻa e Fakamoʻuí, naʻá Ne lotua ʻa ʻEne kau ākongá ke “taha pē ʻa kinautolu kotoa pē; ʻo hangē ʻokú ke ʻiate aú, ʻe Tamai, mo au ʻiate koé, koeʻuhí ke nau taha pē foki ʻiate kitaua” mo “au ʻiate kinautolu, mo koe ʻiate au, koeʻuhí ke fakahaohaoa fakataha ʻa kinautolu” (Sione 17:21, 23).
Ko e lahi ʻo e ngaahi meʻa ne u fekumi ki aí pe ʻe anga fēfē haʻaku taha mo e ʻEikí, ʻe anga fēfē haʻaku nofo ʻi Heʻene ʻofá, pea ko hono olá naʻá ku lava ʻo fakatupulaki ha faʻa kātaki lahi ange—ʻa e faʻa kātaki koē ne u fuʻu fie maʻu ke ne fakatafoki ʻeku ngaahi aʻusiá mei he ngaahi meʻa naʻa nau fakaongosiaʻi aú ki he ngaahi meʻa ʻoku nau fakaivia mo fakamāʻoniʻoniʻi aú.
Ko e meʻa fakaolí, ʻi heʻeku fekumi ko ia ke maʻu fakatouʻosi ha mahino ki he foʻi lea ko e nofó pea mo ha tali ki he ngaahi ʻahiʻahi faingataʻa ne u fehangahangai mo ia heʻeku moʻui fakaʻahó, ne fāifai pea fakafoki pē au ki he ngaahi tali tonu ʻa e Lautohi Faka-Sāpaté ʻa ē ne u feinga ke fakaʻehiʻehi mei aí. Ne u maʻu e ngaahi tali ki hoku ngaahi faingataʻaʻiá ʻi heʻeku lau e folofolá, lotu fakaʻahó, tokoni ki hoku fāmilí mo e niʻihi kehé, pea ʻalu ki he temipalé mo ʻeku ngaahi houalotu he Sāpaté. Ne u ako ai ko e ngaahi meʻa faingofua ko iá ʻoku nau fakahoko e faikehekehe ʻi he ʻūkumá mo e kātaki lahí pea mo e faʻa kātakí.
Ko e ngaahi tali lelei tahá ʻa e ngaahi tali ʻa e Lautohi Faka-Sāpaté.