Vakatavuvulitaki na Bula dodonu mai Vale

Mai vei Elder Delbert L. Stapley (1896–1978)

Ena Kuoramu ni iApositolo Le Tinikarua

Delbert L. Stapley e a sucu ena 11 ni Tiseba, 1896, mai Arizona, Amerika. E a vakatikori me lewe ni Kuoramu ni iApositolo Le Tinikarua ena ika 5 ni Okotava 1950 ka lewena tu na kuoramu o ya me yacova na nona mate ena ika 19 ni Okosita 1978. Na itukutuku ni lotu oqo e a soli mai Brigham Young University ena 1 Feperueri 1977. Na itukutuku kece ni vosa oqo ena vosa vaka Valagi ena kune ena speeches.byu.edu.

Sa dua na itavi mera na vakavulica na itubutubu vei ira na luvedra mera na buladodonu tiko kina.

Na madigi e nodra na itubutubu mera vakavulica ka veisautaki ira na luvedra ni bera ni qai temaki ira o Setani ka se bera talega ni ra yabaki walu, na gauna era sa na saumitaro kina vua na Kalou. … Sa solia na veiyabaki oqo na Turaga vei ira na itubutubu, na imatai ni vica na yabaki ni bula ni dua na gone, na gauna era se bera ni vakila soti kina na gone ne veika era na cakava. Sa dua na itavi mera na vakavulica na itubutubu vei ira na luvedra mera na buladodonu tiko kina.

Na sala vinaka duadua me vakavulici kina mai vale na buladodonu kei na lotu sa ikoya na ivakaraitaki. Nuitaki ni ra sa vakavinakataka tu na itubutubu na nodra bula mera mamarau ka savasava, ka na rawa ni ra vakayagataka na nodra ivakaraitaki ena nodra vakavulici ka tuberi na luvedra. E a vakatavuvulitaka o [Peresitedi David O. McKay (1873–1970) ] “Kevaka mo vakavulica na vakabauta na Kalou, o iko mada mo vakaraitaka ni ko vakabauti Koya tiko; kevaka mo vakavulica na masu, o iko mo masu; … ko na vinakati ira mera vukivuki matau, o iko mada ga mo kakua ni dau sakasaka, kevaka ko vinakata na luvemu me bula savasava, dauvosota, itovo vinaka, ia mo sa na ivakaraitaki vinaka sara ga vei koya ena ka kecega.”¹ Ni caka o ya ena qai vakaibalebale na nomu veituberi vei ira na luvemu, ia o ira, ni ra ciqoma na veituberi mai vei ira na itubutubu, ena rawa ni ra vakarautaki ira mai na veitemaki nei Setani, ni sa nona inaki me vakacacana na nodra bula ena gauna era sa yacova kina na yabaki ni kilai yalodra. Sa nodra itavi na itubutubu mera na ivakaraitaki ni veika era na vinakata vei ira na luvedra, ena vakarokoroko, yalodina, vuki matau, kei na kaukauwa mera na cakava na ka dodonu ena veigauna kece sara. Na ivakaraitaki ena bibi cake sara mai na veivakavulici.

Na bula ena veisiga me na salavata kei na ivakavuvuli ni noda Lotu kei na kena itagede. Na noda veimaliwai vakabisinisi me na veiwekani kei na noda lotu. Ena totolo sara na nodra kila na gonelalai ni dua na cala. Tukuna o John Milton ni veivakaisini sa ivalavala ca duadua ena sega ni kilai vakavo duadua ga mai vua na Kalou. Ira na gonelalai era dau kila totolo ni tiko e dua na cala, ka ra dau sega ni taletaka na lasu kei na vakanuinuicala. Eda kila ni o ira na gone era na vakaukauwataki vakalevu ena ivunau eda bulataka mai na ivunau e vunautaki. Mera na dau dina tu ga na itubutubu vei ira na luvedra, ka nanuma voli ga na yalayala era tukuna vei ira ka kakua ni dau vosa lasu vei ira. Na tama e dau dinati luvena voli ga, sa ikoya na tama ena dau nuitaka o luvena. Ni sa kila e dua na gone ni ko dinata na ka o yalataka, ena sega vakadua ni na vakacala, ka na sega talega ni vakamadualaka na yacamu. …

Me rau kakua vakadua ni veivala na itubutubu e matadra na luvedrau. Ena so na gauna e dau vakavuna na veivala na nona vakavulici se vakadodonutaki e dua na gone. Dua vei rau na itubutubu ena veivakalewai, ka dua vei rau ena vakacala. Sa na qai yavalati ka vakataotaki na nona tuberi tiko e dua na gone ena loma ni matavuvale. Me rau na duavata e vale ena ka kecega na itubutubu, baleta de na qai muri cala ka vakacalai na luvedrau. O Richard L. Evans e a kaya: “Na nodrau na sega ni duavata na itubutubu ena vakavuna na tatawasewase kei na malumalumu ni yavu ni veituberi mai vale. O ira era na veituberi vua e dua na gone e dodonu mera duavata ena ivakarau ni nodra veituberi.”² Eda kila ni o ira na gone era dau kila vinaka sara na ka e yaco tiko mai vale; e rawa ni ra vakila ni tiko na veimaliwai ca kei na duidui ka dau dredre mera vakamacalataka na kena ibalebale. …

Na gone sa tiko na nona dodonu me vakila na ka o ya ena loma ni nona vale, ni sa ivakavakaruru na nona loma ni vale mai na veika ca kei na veika vakarerevaki e tu e vuravura. E dodonu me tiko na duavata kei na yalodina ena matavuvale me vakacokotaka na tikina oqo. E sega tale ni dua na vanua ena bula oqo ena kune kina na dina ni bula marau me vakataka na loma ni matavuvale. Ena rawa ni buli na loma ni matavuvale me vaka-i lomalagi, kau vakila, niu sa raica oti ni lomalagi e laki tomani ga kina na bula e dodonu meda sa bulataka tiko yani eke.³ …

Ni kosipeli eda vakavulica tiko e ka dina. Bula tiko o Karisito, Bula tiko na Kalou, sa vakarautaki tu na tikina mai cake me nodra o ira na luvena era vakabauta ka yalodina Vua. Vakarautaka oqo na mataqali matavuvale ko na gadreva me na sotavi na kena ogaoga baleti ira na luvemu, mera na muria tikoga na sala dodonu, ka na kauta yani na matavuvale kina bulatawamudu kei na vale vaka-silesitieli. Me vakalougatataki kemuni yadua na taciqu kei na ganequ na Kalou. Au nanuma ni o ni sa kila ni levu sara na veika e tukuni nikua sa baleti kemuni sara tikoga. Na nomuni sa na cokocokonaki ka vakarautaka na nomuni matavuvale ena dua na bula e vakalou sa na ka bibi sara vei ira na gone ka ra sa lako mai mera mai vakalougatataka na nomuni bula.