Aoaoina Atu o le Amiotonu i le Aiga

Saunia e Elder Delbert L. Stapley (1896–1978)

O Le Korama a Aposetolo e Toasefululua

Sa fanau Delbert L. Stapley i le aso 11 Tesema, 1896, i Arizona, ISA. Sa vaetofia o ia e avea ma se tasi o le Korama a Aposetolo e Toasefululua i le aso 5 Oketopa, 1950, ma galue ai i lena korama seia oo ina maliu i le aso 19 Aokuso, 1978. Sa tuuina atu lenei saunoaga i le faigalotu a le Iunivesite a Polika Iaga i le aso 1 Fepuari, 1977. E maua le saunoaga atoa lenei i le gagana Peretania i le speeches.byu.edu.

O se tiutetauave ma se faamanuiaga mo matua le aoao ma saunia a latou fanau ina ia ola amiotonu.

Ua i ai i matua le avanoa e aoao ai ma mamanuina ai ia uiga o a latou fanau laiti ao lei maua e Satani le mana e faaosooso ai i latou ma a o lei oo i le valu o o latou tausaga, e tali atu ai i latou lava i luma o le Atua. … Ua tuu atu e le Alii i matua nei tausaga taua, o uluai tausaga o le olaga o se tamaitiiti, lea e le mafai ai e le fanau ona tali atu mo ia lava i mea latou te tautatala ai ma faia. O se tiutetauave ma se faamanuiaga mo matua le aoao ma saunia a latou fanau ina ia ola amiotonu.

O le auala sili ona lelei e aoao atu ai le amiotonu ma le tapuaiga i totonu o se aiga o le faia lea o se faataitaiga. E faamoemoe, o le a tausia e matua o latou lava olaga i le lelei ma mama ina ia mafai ai ona avea o latou olaga ma se faataitaiga aoga e aoao ai ma saunia ai a latou lava fanau. [Sa aoao mai Peresitene Tavita O. MaKei (1873–1970) e faapea:] “Afai o le a e aoaoina atu le faatuatua i le Atua, ia faaali atu lou lava faatuatua ia te Ia; afai o le a aoaoina atu le tatalo, ia tatalo oe lava; … afai e te faatoafilemuina i latou, e tatau la ona e aloese mai le lē lava papale; afai e te tuua lau tama ina ia ola i se olaga o le amiomama, loto pulea, tauleleia, ia faia la se faataitaiga lelei o nei mea uma mo ia.”¹ O lou faia o lena mea o le a atili lofituina ai lau fanau i nei aoaoga; ma o lo latou mauaina o lea ituaiga taitaiga mai matua, o le a faamalolosia ai i latou e tetee atu i faaosoosoga a Satani, lea ua avea ma ana sini le faataumaoia o o latou olaga pe a latou ausia le tausaga latou te tali atu ai mo i latou lava. Ua i ai i matua le tiute ina ia avea ma tagata latou te mananao e avea ai a latou fanau e faatatau lea i le faaaloalo, faamaoni, loto pulea, ma le lototoa e faia le mea sao i taimi uma. E sili atu ona malosi le faataitaiga nai lo le mataupu.

Ua tatau ona ogatasi ia olaga o le aiga i aso uma ma mataupu faavae ma tulaga faatonuina o la tatou Ekalesia. E tatau ona tutusa a tatou fegalegaleaiga faapisinisi ma la tatou tapuaiga. E vave lava ona matau e tamaiti le tulaga lē faamaoni. Fai mai John Milton o le faagutugutulua ua na o le pau lea o le agasala e le iloa vagana ai le Atua. Ae peitai, e iloagofie e le fanau ia ni mea sese, ma e latou te le fiafia i le le faamaoni ma uiga faafoliga pepelo. Tatou te iloa e sili atu ona aafia le fanau i auala o tatou ola ai nai lo le auala o loo tatou talai atua. E tatau lava ona faamaoni matua ia latou fanau, faamaoni i folafolaga sa latou faia ia i latou ma tautala i le sao i taimi uma. O le matua faamoemoeina e mauaina le faatuatuaga a lona alo. Afai e lagona e se tamaitiiti e te aloaia lona faatuatuaga [ia te oe] ma e te toe tauia atu lena lagona, na te le solia lena mea, pe tauleagaina lou igoa. …

E le tatau i matua ona tauaimisa i luma o a latou fanau. O nisi o taimi e tutupu feeseeseaiga ona o se taumafaiga e faasao pe faatonu se tamaitiiti. E faitio le tasi matua; ae tetee le isi. Ma o se taumafaiga ina ia faalotogatasia le aiga, i le vaaiga a le tamaitiiti, ua leai se aoga. E tatau ona lotogatasi ia matua i le iloaina po o fea le auala latou te mananao e ui ai se tamaitiiti; a le o lea, e mafai ona uia e le tamaitiiti ni auala sese ona o le le mautonu. Fai mai Richard L. Evans: “O le fevaevaeai i le va o matua e sese ma le mautonu ma e faavaivaia ai le faavae o le aiga. E tatau ia i latou o e taulai atu i ai se tamaitiiti mo se taitaiga ona lotogatasi i le taitaiga latou te tuuina atu.”² Tatou te iloa e maaleale lagona o tamaiti i uiga ma lagona o le aiga; latou te maua le lagona popole ma le feeseeseai lea e le mafai lava ona latou malamalama i ai pe faauigaina. …

E i ai le aia a le tamaitiiti e lagonaina ai faapea o loo i ai se nofoaga o le malutaga i lona aiga, o se nofoaga o le saogalemu mai mafatiaga ma amioleaga o le lalolagi i fafo. E manaomia e le aiga le lotogatasi ma le faamaoni e aumaia ai lenei manaoga. E leai se isi nofoaga e pei o le aiga lea e maua ai le fiafia ma le faavavau moni i lenei olaga. E mafai ona avea le aiga e pei o se vaega o le lagi; e moni, ou te vaai faalemafaufau i le lagi o se faaauauga o le ituaiga olaga sili faaleaiga i lenei fogaeleele.³ …

O le talalelei e pei ona tatou aoaoina atu e moni. O loo soifua Keriso, o loo soifua le Atua, ma o loo saunia ni maota matagofie i luga mo Ana fanau uma faamaoni ma tuuto. Fuafua nei i le ituaiga fale ma aiga e te moomoo i ai ma pe faapefea ona e taulimaina ia manaoga o lau fanau ina ia latou tumau ai i le ala amiotonu lea o le a taitaiina atu ai le aiga i le ola e faavavau i se aiga selesitila. Ia faamanuiaina outou uma e le Atua, ou uso e ma tuafafine. Ou te manatu ua mafai ona outou malamalama o le tele o mea ua talanoaina e faatatau ia te outou. Ma o le faatulagaina ma le faaalualu i luma o lou aiga i se tulaga paia ua matuai taua tele i tagata talavou o e ua o mai e faamanuia o outou olaga.