O Le Tusi a Alema: Lesona mo Le Asō
Sa onosaia ma le faamaoni e tagata sa Nifae ia faigata o o latou aso ma na avea ma se molimau faapea o le a tuuina atu e le Alii ni faamanuiaga ma le puipuiga tatou te manaomia ina ia faafetaiaia ai ma le manuia ia luitau o o tatou aso.
O le faaiuga o lana nofoaiga, sa tuuina atu ai e le Tupu o Mosaea se fuafuaga ina ia suitulaga le puleaga tau tupu i faamasino e filifilia e tagata. O lea faiga sa faavae i tulafono a le Atua ae faatautaia e faamasino na filifilia e tagata.
O le mataupu faavae o le faitalia o le faavae lea o le faiga lea sa tuuina atu—o tagata taitoatasi, nai lo se tupu, o le a taliaina le tiutetauave ma le tali atu ina ia galue e tusa ai ma le tulafono. Ona “e le masani ona manao le leo o le nuu i soo se mea e le talafeagai ma le mea sao” (Mosaea 29:26), o le a saunia e lenei faatulagaga le lelei o le puipuiga mo aia tatau a tagata ma le amiotonu tuufaatasi o le nuu.
O le tali atu i le fuafuaga a Mosaea, “na oso le naunau tele [o tagata] ia maua e tagata taitoatasi le avanoa tutusa i le laueleele atoa; ioe, ma sa faaali mai e tagata taitoatasi lona lava loto malie e tali mo ana lava agasala” (Mosaea 29:38).
O loo i ai i le tusi a Alema le talafaasolopito o tagata i le aluga o le vaitau e 40 tausaga ina ua mavae ona talia e tagata le faatulagaga na fautuaina atu. O mataupu mulimuli o faamaumauga a Alema, mataupu 43 i le 62, o loo toe ta’ua ai se periota o le mamafa o luitau ma tofotofoga. I le aluga o lenei vaitau puupuu e 19 tausaga, sa feagai ai tagata ma ni luitau faaupufai i totonu lava, taufaamatau mai fafo, ma sa toetoe ina tau taimi uma.
Na faalua ona taufaamatau le pulega faalemalo i totonu lava e ni alii o e na saili e faatu i latou lava e avea ma tupu ma aveesea mai ai ia aia tatau mai tagata e filifili ai o latou taitai ma tapuai saoloto ai. I lena lava taimi, sa puipuia ai e tagata i latou lava mai osofaiga e tele mai fafo a tagata sa Lamana o e na naunau ia faataumaoia le malo o tagata sa Nifae ma aumai sa Nifae ia nofopologa.
O le faaletonu o le tamaoaiga o nei luitau e tele, e ui e le o ta’ua patino, ae sa avea ma se luitau maoae mo tagata. O Mamona i le tuufaatasiga o faamaumauga paia, na uunaia ina ia saunia se faamatalaga auiliili o lenei vaitau. O le mea moni, sa ia saunia se faamatalaga auiliili e faapena foi mo le vaega o totoe o le 1,000 tausaga o le talafaasolopito o sa Nifae, o le a aofia i le Tusi a Mamona le silia ma le 2,500 itulau!
Sa aoao mai e Peresitene Ezra Taft Benson (1899–1994) e faapea:
“O le Tusi a Mamona … ua tusia mo o tatou vaitaimi. Sa lei maua e sa Nifae lenei tusi; faapea foi sa Lamana anamua. Na faatatau lava mo i tatou. … Sa otootoina [e Mamona], i lalo o musumusuga a le Atua, le tele o talafaamaumau na tusia i le tele o seneturi, ma sa ia filifili mai tala, ma timaiga, ma mea na tutupu e aoga ia i tatou. …
“E tatau ona tatou fesili ifo soo ia i tatou lava, ‛O le a le pogai na musuia ai e le Alii ia Mamona (po o Moronae po o Alema) ia tuu lena mea i le tusi? O le a se lesona e mafai ona ou aoaoina mai lena mea e fesoasoani ia te au ou te ola ai i nei ona po?’”1
O le taimi nei ua feagai le Au Paia o Aso e Gata Ai i le lalolagi atoa ma le tele o luitau talitutusa lea na feagai ai foi ma tagata sa Nifae i le vaitaimi lenei o la latou talafaasolopito, e aofia ai ni taumafaiga ina ia aveese mai i tagata le aia tatau e tapuai atu ai ma talanoa saoloto e uiga i mataupu e taua i nuu o loo tatou ola ai. Sa lagona e nisi o le Au Paia o Aso e Gata Ai ni taufaamatau mai fafo o ni osofaiga ma fetauiga a autau ua tuuto atu e faaumatia a latou faigamalo ma saolotoga.
O le mea e sili ai, sa mafai e le au sa Nifae ona foia o latou luitau e ala i se taumafaiga maoae, ositaulaga, ma le fesoasoani mai le Alii. O ni nai lesona e uiga i le auala sa latou tali atu ai ma le faamanuiaina i o latou luitau e mafai ona aumaia ai ia i tatou se taiala ma le lototele e fetaiai ai ma o tatou luitau o aso nei.
1. Faatumauina ia manaoga ma faamoemoega talafeagai.
E ala atu i a latou luitau uma, sa mafai ai e tagata sa Nifae amiotonu ona maua le malosi mai le iloaina o loo latou galulue ma ni faamoemoega talafeagai ma tatau. O lo latou faamoemoega autu lava o le “puipui i latou lava, ma o latou aiga, ma o latou laueleele, lo latou atunuu, ma a latou aia tatau ma la latou tapuaiga” (Alema 43:47). O lo latou manaoga ina ia faasao lo latou faitalia—o le aia e galulue ai ma le amiotonu ma tali atu ai i a latou lava amioga—nai lo le i ai o se tupu e faatonu atu mea latou te faia. O lo latou faamoemoega ina ia faasao le tulaga tutusa i lalo o le tulafono, aemaise lava lo latou saolotoga e tapuai ai i le Atua ma faatumauina la latou ekalesia (tagai i le Alema 43:9, 45).
O loo i ai ma o le a i ai pea i taimi uma i le lalolagi ia autau o loo saili e pulea ia manatu lautele ina ia maua ai le pule mo lo latou lava manuia. O loo i ai se faaosoosoga ina ia talia o latou faamoemoega ma liua ai ia fetauaiga i se tauiviga mo le pule. O le auala a le Alii e masani lava e na o manaoga ma faamoemoega mama e faatino ai, e pei ona faia e tagata sa Nifae. O le faia o lena mea sa faatagaina ai i latou ina ia maua le mana mai le lagi e manumalo ai i o latou luitau “i le malosi o le Alii” (Alema 46:20; tagai foi i le Alema 60:16; 61:18).
E faapena foi, i lo tatou tali atu i luitau o loo feagai ma i tatou i nei aso, e tatau ai ona tatou siakia e le aunoa o tatou loto ina ia faamautinoa ai o loo mama o tatou manaoga ma faamoemoega ma o loo faavae lea i mataupu faavae o le talalelei a Iesu Keriso. Afai tatou te galulue (pe faaosooso isi e faia) ona o le manatu faapito, mo le tulaga manuia faaletagata lava ia, pe tuu ai foi i lalo nisi, o le a le maua e i tatou le fesoasoaniga faalelagi o loo manaomia e tetee atu ai i o tatou luitau ma faafitauli.
2. Ia agalelei ma limafoai atu i e le tagolima.
Ina ua faamata’uina e faataumaoia i latou na avea muamua ma o latou fili, o tagata Aneti-Nifae-Liae ia, sa tonu i tagata sa Nifae e tuuina atu ia i latou se laueleele e nonofo ai ma atiina ae ai o latou olaga fou ma puipuia i latou (tagai i le Alema 27:21–22; 43:11–12). Ona ua uma ona osia e tagata Aneti-Nifae-Liae se feagaiga o le a latou le toe tagofia a latou auupega o le taua, o lea sa latou tuu atu ai “se vaega tele o a latou mea e tausi ai” (Alema 43:13) ia autau a sa Nifae i nei taimi faigata. Ae peitai, e le o i ai se faamaumauga faapea na ese le auala na taulimaina ai e tagata sa Nifae nei tagata fāi mai nai lo le faaaloalo ma le alofa, e ui lava sa faigofie ona avea i latou ma se mea e taulai atu i ai i latou ia sa mananao e faatupu ni fevesiaiga.
O le ituaiga tausiga lea sa tuuina atu e tagata sa Nifae i tagata o le nuu o Amona, lea na ta’ua ai i latou, sa toe tauia mai ma iu ai ina saofaga atu i le tuufaatasiga o se tasi o autau sili ona musuia o vaegaau o loo faamaumauina i le talafaasolopito—le autau e 2,000 o tama talavou. Na iloagofie, atonu o le auaunaga a nei alii talavou sa avea o se ki i le faasaoina o le nuu o sa Nifae mai le uluai faatafunaga.
I vaitaimi o fetauaiga i totonu, osofaiga mai fafo, ma luitau tau tamaoaiga, o loo i ai se taulaiga ina ia avea ma se tulaga le lelei e faasaga ia i latou o e “le pei o i tatou.” E faigofie lava le faitio ia i latou ma faia ni faaiuga. Atonu e fesiligia e se tasi lo latou lotonuu ma le taua i totonu o le nuu ma lo latou aafiaga i le soifua manuia faale-tamaoaiga. E le o ogatusa nei tali le lelei ma le poloaiga a le Faaola ina ia alolofa atu i o tatou tuaoi e pei o i tatou lava, ma sa latou faatupuina ni fevaevaeaiga, femisaai, ma le faaesea. Pe ana faapea e lei taliaina e tagata sa Nifae ia le nuu o Amona, semanu o le a fausia ni feitagai nai lo le agaga faafetai i le tupulaga faiae. Nai lo le fausia o ni autau faamaoni e 2,000, o le a fevaevaeai ma toe liliu atu le tupulaga fou i tagata sa Lamana.
O se naunautaiga ina ia agalelei ma limafoai atu i e le tagolima sa avea lea ma se tulaga taua o le faasaoina o le nuu o sa Nifae ma agavaa ai tagata sa Nifae mo faamanuiaga o le lagi i taimi o le tuga o o latou faafitauli. E manaomia e le nuu o le Atua ia ituaiga faamanuiaga i le asō.
3. Faalogo ma mulimuli i taitai musuia.
Na silafia e le alii ia luitau na feagai ma tagata sa Nifae, ma sa Ia auina atu ni taitai musuia ia fesoasoani ia i latou e fetaiai ma na luitau po o faafitauli. O le Taitaiau o Moronae sa avea ma se fitafita peitai sa musuia ina ia saunia ni ufifatafata, talitaogalima, puloutau, ma ni ofu mafiafia e puipuia ai ona tagata (tagai i le Alema 43:19). O se taunuuga, sa sili atu le malutia o le au sa Nifae i le taimi o le taua nai lo sa Lamana (tagai i le Alema 43:37–38). Mulimuli ane, sa faatonuina e Moronae ana autau ina ia eli i luga faupuega eleele e faatamilo i aai uma ma ia faatutu ai i luga o nei faupuega eleele ni laau tetele ma fausia ai ni pa laau maamaai (tagai i le Alema 50:1–3). Na fesoasoani nei sauniuniga musuia i le faasaoina mai o tagata sa Nifae mai le faaumatiaina.
A o sauniuni ia Moronae mo le taua, sa talai e Helamana ma ona uso le afioga a le Atua ma uunaia ia tagata ina ia amiotonu ina ia mafai ona taitaiina ma faasaoina i latou e le Agaga o le Alii. O le faalogo i taitaiga faaletino ma le faaleagaga a taitai musuia, na faasaoina ai le au sa Nifae. O fetauaiga i totonu lava ma le mumusu o tagata e faalogo i lapataiga na mafua ai ona oo mai ia faafitauli ma mafatiaga.
Ua faamanuiaina i tatou e ola ai i se vaitaimi ua tofia ai e le Alii ni perofeta soifua, tagatavaai, ma talifaaaliga ina ia lapataia ma taialaina i tatou ia saunia mo luitau o nei aso. I le 1998, sa tuuina mai ai e Peresitene Gordon B. Hinckley (1910–2008) se faatonuga ma se lapataiga musuia i tagata o le Ekalesia:
“Ua oo mai le taimi e faatulagaina lelei ai o tatou aiga.
“Ua toatele naua o tatou tagata e faaaoga uma a latou tupe maua e ola ai. O le mea moni, o nisi o loo ola i tupe nono. …
“O le tamaoaiga o se mea maaleale. … O loo i ai se faailoga o le tau matagia o loo i luma, ma e tatau ona tatou manatunatu i ai.”2
Sa ou talanoa talu ai nei i se tamaloa sa faalogologo i ni saunoaga a Peresitene Hinckley ma uunaiga a le Agaga. Sa la filifili ma lona toalua e tala i tua a la teugatupe, totogi faauma lo la fale, ma o ese mai le aitalafu.
O le asō ua ola tutoatasi lena tagata. Sa itiiti se aafiaga o lona aiga i le faaletonu o le tamaoaiga lea na sosoo ai. O le mea moni, o lona ola tutoatasi sa mafai ai e ia ma lona toalua ona auauna atu faamisiona.
Sa soifua mai Peresitene Thomas S. Monson mo lo tatou vaitaimi. O lona soifuaga ma aoaoga o le feau lea a le Atua na auina mai ina ia puipuia ma faamanuiaina ai i tatou i le asō. I se taimi ao popole le toatele e uiga i mea latou te le o maua, sa aoao ai i tatou e Peresitene Monson ina ia maua le lotofaafetai mo le tele o faamanuiaga ua tuuina mai ia i tatou e le Alii. Ma i se taimi ao taulai atu le toatele i o latou lava faafitauli, sa uunaia ai i tatou e Peresitene Monson ina ia aapa atu ma laveai mai, faagalo i tatou lava ina ia faamanuia atu i isi. O le faalogo ma usitai i aoaoga a Peresitene Monson o le a maua ai e o tatou aiga se malupuipuiga faaleagaga ma ni faamanuiaga tatou te manaomia mo lo tatou vaitaimi.
Ou te faafetai ua ou ola i se vaitaimi ua toefuatai mai ai le talalelei. Ou te faafetai ua saunia e le Alii le Tusi a Mamona mo lo tatou vaitaimi. Sa onosaia ma le faamaoni e sa Nifae ia luitau o o latou aso ma ua avea ma se molimau o le a saunia e le Alii ni faamanuiaga ma se puipuiga tatou te manaomia ina ia faafetaiaia ai ma le manuia ia luitau o lo tatou vaitaimi.
O Mai i Luma, saunia e Walter Rane, faaaloaloga a le Falemataaga o Talafaasolopito o le Ekalesia
Sa Latou Faalagolago i le Atua, saunia e Walter Rane, faaaloaloga a le Falemataaga o Talafaasolopito o le Ekalesia
O Taitaiau Moronae ma le Tagavai o le Saolotoga, saunia e Clark Kelley Price