Mo YALOMATUA ka Mo iTokani

Mai vei Elder Robert D. Hales

Ena Kuoramu ni iApositolo Le Tinikarua

Elder Robert D. Hales

Vulica ka rawata na kila ka kei na yalomatua ena nomu gauna ni itabagone. Ka laveti ira ka vaqaqacotaki ira era tu wavoliti iko.

Kevaka o vinakata dina mo bula vinaka, o na gadreva mo muria na ivakasala ena ivolanikalou: “Mo nanuma na ka oqo na luvequ, ka vuli mai kina ni ko sa cauravou ga, ia mo vakamatautaki iko mo muria na ivunau ni Turaga ni ko sa cauravou tiko” (Alama 37:35). E rawa ni vakalekalekataki ena veisala oqo na iwalewale ni vuli oqo:

Eda na tekivu kece ena kila ka taumada. Eda na vakuria kina na kila ka ka rawa mai na vuli e koronivuli kei na wilivola. Eda vakuria ena veika eda sotava mai ena noda bula. Oti eda qai yacova yani na ikava ni ikalawa: na yalomatua. Oqori na vanua e tu vakadua kina na vuravura. Ia e tu vei keda e dua na ka e sega vei vuravura. Ena gauna ni papitaiso kei na veivakadeitaki, a soli vei keda na isolisoli ni Yalo Tabu. Ena noda yalodina ki na lawa, na cakacaka vakalotu, kei na veiyalayalati eda a ciqoma ena papitaiso, me da dau lakova e veigauna na soqoni ni sakaramede kei na kena yalayala, ka vakakina na veiyalayalati ni matabete kei na valetabu, ena dau tikoga vata kei keda na isolisoli ni Yalo Tabu me vakavulici keda ka liutaki keda. Sa dau tuberi keda na Yalotabu me da yavala ka cakava. E dui tu na noda dui isolisoli vakayalo kei na taledi (raica na V&V 46).

Na vuku kei na isolisoli vakayalo e kena isoqoni na kila ka e yaloda. “Sa ka levu duadua ga na vuku; mo rawata mada na vuku: ia na ka kece ko sa rawata mo rawata vata kei na yalomatua” (Na Vosa Vakaibalebale 4:7). Sa ka bibi me da vakatubura na vuku kei na kila ka ni da se itabagone.

E dua na ka au a sotava ena noqu gauna vakaitabagone a vakavulica vei au e dua na ka me baleta na yalomatua. O au e dua na cauravou ena siti, sa mani vakauti au kina o tamaqu meu laki cakacaka ena vanua ni susu manumanu nei vugoqu ena ra kei Utah. Niu tiko voli mai kea, au a sega ni kila rawa se cava era laki daramaka tikoga kina na bulumakau na uludra ena ruku ni bai me ra kania na co ena daku ni bai, ni tu e udolu vakaudolu na eka me ra digidigi mai kina. O sa bau vakasamataka na levu ni noda dau vakakina o keda? Eda na dau segata tikoga me da raica yani na veika e tu e taudaku, vakabibi ni da itabagone. Ni da tamata—na tamata vakayago—e dau matau me da toro voleka sara yani ki na bai waya vakavotona ka daramaka yani na uluda ki yasana kadua. Baleta na cava?

E rawa ni da reki vakalevu ena noda bula kevaka eda sega ni siova yani na veika e tautuba. Nanuma tiko, “Sa ka levu duadua ga na vuku,” me salavata kei na yalomatua, “Mo kakua ni lakova na nodra sala na ivalavala ca, kakua talega ni muria na nodra ilakolako na tamata ca. Mo biuta ga, kakua ni torova, gole tani mai kina, ka lako tani yani” (Na Vosa Vakaibalebale 4:14–15). Kua ni toro voleka mai. Kua ni daramaka na ulumu ena ruku ni baiwaya vakavotona.

E Tu Beka Nomu iTokani Vivinaka?

O na raica ni, salavata kei na ivakavuvuli oqo ni yalomatua, e vakavuvulitaka talega Na Vosa Vakaibalebale na kena digitaki na itokani vinaka: “Mo kakua ni lakova na nodra sala na ivalavala ca, kakua talega ni muria na nodra ilakolako na tamata ca” (Na Vosa Vakaibalebale 4:14). “Na luvequ, mo kakua ni salavata kei iratou; mo tarova na yavamu mai na nodratou ilakolako: ni sa cici ki na ca na yavadratou” (Na Vosa Vakaibalebale 1:15–16).

youth studying together

iVakaraitaki mai vei Keith Larson

O na kila vakacava ni ra vinaka na nomu itokani? Au na solia e rua na vakatovotovo. Kevaka o vakayagataka na vakatovotovo e rua oqo, o na sega ni lako ki na sala tani ka lakosese yani mai na “sala dodonu ka rabailailai sa basika ki na bula tawamudu” (2 Nifai 31:18).

1. Na itokani vinaka ena rawarawa kina vei keda na bulamuria na ivakaro ni da tiko vata kei ira. Na itokani dina ena vaqaqacotaki iko ka vukei iko mo bulataka na ivakavuvuli ni kosipeli ka na vukei iko mo vosota me yacova na ivakataotioti.

2. Na itokani dina ena sega ni vakavuna mo digidigi mai na nona sala kei na nona sala na Turaga, ka kauti iko tani kina mai na sala dodonu ka rabailailai. Sa lako voli ena vuravura oqo na meca ka vinakata vakalevu sara me vakatarabetaki keda yadua. Kevaka era sa kauti iko tiko na nomu itokani ena sala ni ivalavala ca, lako tani saraga mai vei ira ena gauna oqo. Digitaka vakayalomatua na nomu itokani.

O iTokani Vakacava Beka O Iko?

Au taroga qo e dua na taro dredre: o itokani vakacava beka o iko?

E levu cake na ibalebale ni bula mai na noda vakabulai keda. Eda sa lesi me da laveti ira ka vaqaqacotaki ira kecega era tu wavoliti keda. E vinakati keda kece na Turaga me da lesu yani Vua.

O iko e dua na valenicina, ka sega tale ni dua na ka e rerevaki vakalevu cake mai na valenicina sa lutu tu. Nanuma tiko o cei o iko: o iko e dua na rarama ki vuravura, vei ira na nomu itokani, vei ira na tacimu kei na ganemu. Era dau rai vei iko.

E tomana na Vosa Vakaibalebale 4:

“Ia na nodra sala na yalododonu sa vaka na rarama sa cila tu, sa levu cake tiko na kena rarama ka yacova na siga levu.

“Ia na nodra sala na ivalavala ca sa vaka na butobuto: era sega ni kila na ka era sa tarabe kina” (tikina 18–19).

Era sega sara ga ni kila na vuna era tarabe kina. E sega na nodra rarama, sega na idusidusi.

O kila beka se dau vakacava ni da vakararavi ki na dua na valenicina ni sega tu na kena cina? Sa dau basika na butobuto, ka da lakosese.

Ni sega na livaliva vua na pailate, sa na sega na nona ivakaraitaki vakavo ga na iyaya sega ni vakalivaliva. Sa na leqa vakalevu sara kevaka e tiko ena dua na waqavuka ni vala vakataudua ka vuka tu ena 40,000 na fiti (12,200 m) e macawa ka wavoliti koya na o kei na veika tale eso vaqori. E sega nona idusidusi. Au a sotava e dua na ka vaqori, kau vakavinavinaka niu mai tu eke. Oqo e dua na ka au na sega ni guilecava rawa. De dua na siga o na tu ena dua na itutu vakaoya. E sega ni dua na ka rerevaki cake mai na valenicina sa lutu tu, vakabibi ni o vakararavi tiko ki na kena rarama.

E dua beka e vakararavi tiko ena nomu rarama me tuberi koya? Mo ivakaraitaki vinaka. Mo rarama ki vuravura ka liutaki ira ka tuberi ira era tu vakavolivoliti iko ki na veisalatu ni bula dodonu. Era sa vakararavi tiko vei iko me vaka ni o dua na valenicina yalodina. Mo tu ni gadrevi iko e dua.

Na Yalotabu sai koya na rarama veituberi ka na kauta mai na reki kei na marau. Me kakua ni cakitaki keda na Yalotabu ena vuku ni noda ivalavala. Isa, au masuta me da kakua ni tu duadua voli ka yalorarawa ena vuravura “liwalala ka butobuto” oqo (1 Nifai 8:4).

Me tiko vata kei kemuni na nona veivakalougatataki na Turaga ena nomuni segata mo ni vulica ka rawata na kila ka kei na yalomatua ena nomuni se itabagone. Mo ni rawata talega na yalomatua kei na vuku e yalomuni me baleta na dina ni kosipeli ena talairawarawa ka vakakina ena rarama ni Yalo, kei na Yalo Tabu. Mo itokani vinaka. Laveti ira ka vaqaqacotaki ira era tu wavoliti iko. Me vuravura vinaka cake oqo ni o a tiko voli kina. Vukei ira na nomu itokani me ra tiko ga ena sala dodonu ka rabailailai, vosota ki na ivakataotioti, ka lesu yani ena lagilagi.

Mo dua na rarama ki vuravura ka liutaki ira ka tuberi ira era tu wavoliti iko kei na sala ni bula dodonu. Era sa vakararavi tiko vei iko me vaka ni o valenicina yalodina.