Ia Atamai ma Ia Avea ma se Uo
Aoao ma maua le malamalama ma le poto i lou talavou. Ma siitia ma faamalolosia i latou o siomia ai oe
Afai e te manao moni lava ia e maua se olaga lelei, o le a e manao e mulimuli i le fautuaga i mau: “Aoao le poto i lou talavou; ioe, aoao i lou talavou e tausi i poloaiga a le Atua” (Alema 37:35). O le faagasologa o le aoaoina e ono faapuupuuina faapea:
Tatou te amata uma lava i le atamai faavae. Tatou te faaopoopo i ai le malamalama faatasi ma le aoaoina e maua mai le potu aoga ma le faitau tusi. Tatou te faaopoopo i ai aafiaga o le olaga. Ona tatou oo lea i le laasaga lona fa: Poto O iina e gata ai le lalolagi. Ae o loo ia i tatou se mea e leo maua e le lalolagi. I luga atu o le papatisoga ma le faamauga, na tuuina mai ai ia i tatou le meaalofa o le Agaga Paia. E faavae i lo tatou faamaoni i tulafono, sauniga, ma feagaiga tatou te tauaveina i le papatisoga, i tautinoga masani ma fai soo i sauniga faamanatuga, ma i feagaiga o le perisitua ma le malumalu, o le a i ai pea le meaalofa o le Agaga Paia e aoao ma taitai tatou. E taitai tatou e le Agaga Paia ia gaoioi ma fai loa. Ua tofu i tatou uma ma meaalofa ma taleni faaleagaga (tagai i le MF&F 46).
O le poto faaopoopo i ai ma meaalofa faaleagaga e taitai atu ai i se malamalama i le loto. “O le poto o le mea sili lea; ia maua le poto: O mea uma e te maua ia maua mai ai le atamai” (Faataoto 4:7). E taua le atiina ae o le poto ma le malamalama i lou talavou.
O se aafiaga mai lou talavou na aoao ai au i se mea e uiga i le poto. O au o se tamaitiiti mai le taulaga, o lea na auina atu ai au e lo’u tama e galue i le faatoaga a le toalua o le uso o lou tina i Iuta i sisifo. Ao ou i ai iina, sa matuai ou le malamalama lava pe aisea, i le afe o eka e filifili mai ai, e tuu lava ulu o povi i fafo o le pa uaea e ai vao i le isi itu o le pa. Pe ua e mafaufau ea i le faapena foi o i tatou? O le a tatou tulei pea sei vaai po o a tuaoi i fafo atu, ae maise lava i lo tatou talavou I le avea ai ma tagata soifua—le tagata faalelalolagi—tatou te matele lava i le tulei atu i le pa uaea ma momono o tatou ulu i fafo. Aisea tatou te faia ai lena mea?
E mafai ona tatou maua le tele o le olioli i le olaga e aunoa ma le tuleia o tuaoi. Manatua, “O le poto o le mea sili lea,” faatasi ai ma lena poto, “Aua e te alu i le ala o e agasala, aua foi e te ui i le ala o e fai amio leaga. Ia e taumamao mai ai, aua nei ui atu i ai, ia e alo ai, ma alu ese” (Faataoto 4:14–15). Aua e te latalata mai. Aua le tuuina lou ulu i fafo o le pa uaea.
Pe o I Ai Ni Au Uo Lelei?
O le a e matauina, faatasi ai ma nei aoaoga i le poto, o loo aoao mai foi le tusi o Faataoto e uiga i le filifilia o uo lelei: “Aua e te alu i le ala o e agasala, aua foi e te ui i le ala o e fai amio leaga” (Faataoto 4:14). “Lou atalii e, aua tou te o i le ala faatasi ma i latou, taofi ia ou vae nei ui i lo latou ala: aua ua taufetuli o latou vae i le leaga” (Faataoto 1:15–16).
Ata na tusia e Keith Larson
E faapefea ona e iloa o loo ia te oe ni uo lelei? O le a ou tuuina atu ia te oe ni suega se lua. Afai e te faaaogaina nei suega, o le a e le ui lava i ala ese ma se ese mai le “ala lauitiiti ma le vaapiapi e tau atu i le ola e faavavau” (2 Nifae 31:18).
-
O uo lelei e faigofie ai ona tausi poloaiga pe a e faatasi ma i latou. O se uo moni e faamalosi atu ia te oe ma fesoasoani ia te oe e usitai i mataupu faavae o le talalelei na o le a fesoasoani ia te oe e tumau ai sei oo i le iuga.
-
O se uo moni o le a le tuuina atu ia te oe e te filifili i le va o ona ala ma ala o le Alii, lea o le a aveesea ai oe mai le ala sao ma le vaapiapi. O loo fealuai le fili i lenei lalolagi ma e matuai manao lava ia i tatou uma taitoatasi ia pauu. Afai o ave oe e au uo i ala o le amioleaga, alu ese mai ai nei. Filifili ma le poto au uo.
O Le a le Ituaiga Uo e I Ai Oe?
Ou te fai atu nei se fesili faigata: O Le a le Ituaiga Uo e I Ai Oe?
O loo i ai se mea sili atu i le olaga nai lo le faaolaina o i tatou lava. Ua tofia i tatou ia siitia ma faamalolosia i latou uma o loo siomia ai i tatou. E finagalo le Alii ia tatou toe foi uma atu faatasi ia te Ia.
O oe o se moli o le ava, ma e leai se mea sili ona matautia nai lo se moli o le ava ua pau. Manatua po o ai oe: O oe o se malamalama i le lalolagi, i au uo, i ou uso ma tuafafine. O oe o lē latou te vaavaai atu i ai.
Faaauau le Faataoto 4:
“A o le ala o e amiotonu e tusa ia ma le malamalama o le ao, o loo tupu pea lona malamalama e oo i le tutonu o le la.
“O le ala o e amioleaga e tusa lea ma le pogisa: Latou te le iloa le mea latou te tausuai ai” (fuaiupu 18–19).
Latou te le iloa lava pe aisea ua latou tausuai ai. E leai so latou malamalama, leai se auala.
O e iloa pe faapei le faalagolago i se moli o le ava pe a leai se moli iina? O le taunuuga o le pogisa, ma ua tatou leiloloa.
Pe afai ua leai se malosiaga faaeletise a se ave vaalele, ua leai ni ana taiala vagana na mea e galulue e aunoa ma se eletise. E lagona e ia le matuai leai lava o se faamoemoe pe afai o loo i totonu o se vaalele tau nofoa tasi e 40,000 futu (12,200 m) i le ea o loo featofai ai e ao ma isi mea. Ua leai ma sona taiala. Na ou sao mai se aafiaga faapena, ma ou te faafetai ua ou i ai iinei. O se aafiaga o le a le mafai lava ona galo. Atonu o le a i ai se aso o le a e oo ai foi oe lava i se tulaga faapena. E leai se mea e sili ona matautia e pei o se moli o le ava ua pau, ae maise pe a’o e faalagolago i le malamalama.
Pe o faalagolago mai se tasi i lou malamalama e taialaina ai o ia? Ia avea ma se faataitaiga lelei. Ia avea ma se malamalama i le lalolagi ma taitai ma faafoe i latou o siomia oe i ala o le amiotonu. O loo faalagolago mai i latou ia te oe o se moli o le ava faamaoni. Ia e i ai iina pe a manaomia oe e se tasi.
O le Agaga o le malamalama taiala e aumaia le olioli ma le fiafia. Ia aua lava nei o tatou taofia le Agaga e faatasi ma i tatou ona o a tatou amio. Aue, ou te tatalo pea o le a le tuua toatasi i tatou ma faanoanoa i lenei lalolagi “pouliuli ma le pagatia” (1 Nifae 8:4).
Tau ina ia i ai faamanuiaga a le Alii ia te outou ao outou tauivi e aoao ma maua le malamalama ma le poto i lo outou talavou. Ia outou maua foi le poto ma le malamalama i o outou loto o mea moni o le talalelei e ala i le usitai faapea foi ma le Agaga, o le Agaga Paia lea. Ia avea o se uo lelei. Siitia ma faamalolosia i latou o siomia ai oe. Ia faia le lalolagi o se nofoaga sili atu ona sa e i ai iinei. Fesoasoani i au uo ia tumau i le ala sao ma le vaapiapi, tumau sei oo i le iuga, ma toe foi atu ma le mamalu.
Ia avea ma se malamalama i le lalolagi ma taitai ma faafoe i latou o siomia oe i ala o le amiotonu. O loo faalagolago mai i latou ia te oe o se moli o le ava faamaoni.