Ibukin Kakorakoraia te Roronrikirake
Kunnikai ma Taraakiia: “Kariaia Ana Kairi te Tamnei ae Raoiroi”
© Busath Photography
Ngkai ngaira ana tia tei Kristo, ti kaota te karinerine nakon rabwatara “n taainako ao ni bwaai nako, ao n taabo nako” man teimatoa n iriiri katei aika riai.
E a tia Kim ni kakabonganai kunnikai aika riai. N te bong teuana I titirakinna ibukin ana iango iaon te kamumun ae riai, te kabaraaki ae riai, ao te bwai ni uaua ae riai. Irarikin are karekean abwakin raoi mwaraina ao tian roroan te kunnikai, ti maroroakin reirei ake a irekereke ma kunnikai aika riai ao te kakaewenako ni kakaai kunnikai aika riai ake a taraa ni kabwakabwaka. Ti manikangare ni kareke iango n te kurubu ni kakaea angan kamwaraian te kunnikai. N tokina e taku Kim, “Ngkana I aki mweengaraoi ngkana I moan karinna iaou, n tainako e nanonaki n ae e bon aki riai ao n na bon aki mwengaraoi ni bwaina. I a tia n reiakinna bwa n na bon aki kabooa. I a ti kaokia naba nakon te kainibwai.”
Ngke e kataia Kim ni maiuakina te maiu ae tau, te Tamnei ae Raoiroi e kona ni kairia n ana rinerine ibukin ana kunnikai. E bwabwainii kunnikai aika riai ma te tangira ao e aki kataia ni bita tuan te kunnikai ma taraakiia. E ataia bwa rabwatana bon te tembora (taraa 1 I-Korinto 3:16) ao bwa iai tabena ae na tararuaia, ni kamanoa, ao ni kunnikaia raoi.
Ngke e a kateaki te tembora, e karaoaki te tararua ae korakora ni kakoaua bwa e tararuaaki ao ni katikiraoaki raoi, inanona ao itinanikuna. Te kiing ibukin bairean katean tembora bon te atatai are te tembora e tei ibukin te Uea—bon Ana auti. Ti karinei tembora bwa kateitei aika tabu ike a ti kona n rin inanona aika tau. Ti karinei tembora bukina bwa otenanti ao berita aika tabu aika ti irii a kariaia bwa ti na kona n oki nakon Tamara are i Karawa.
Rabwatam e rangin ni kakawaki riki nakon te tembora ae te kabanea n tikiraoi iaon te aba. Ngkoe natin te Atua te mwaane ke te aine aika tangiraki! Reirei aika ai aron aikai—n tei ibukin, karinerine, ao te rau—a kaineti riki nakon te tararua ao te kamanomano ae ko angan rabwatam.
Te Kanikina
Ni katoa wiiki ngkana ti taua te toa, ti katoka iaora aran te Tia Kamaiu. Ngaira bon Ana taan tei iaon te aonaaba. Teuana te koranikaeti inanon Ibukin Kakorakoraia Kairake e kangai: “Rinanon kunnikaim ma taraakim, ko kona ni kaotia nakon [te Uea] bwa ko ataia aekakira aron kakawakin rabatam. Ko kona ni kaotia bwa ngkoe ana reirei Iesu Kristo ae ko Tangiria.”1
Ngkana temanna te ataeinaine e wareka te rongorongo aei, e iangoia bwa e aki tangiria n nakonako ni kaan riki nakon karinanin te bwai ae aki riai. N te tai ae waekoa e kanakoi bwaai ake inanon n nen ana kunnikai ake aki boraoi ma te tia tei ibukin te Tia Kamaiu. E taku, “N na bon aki timwaati ngkana I aki kataia ni kataui bwaai n te titoa ae I atai bwa n na bon aki bwainii. Bukin tera e na anaaki nanou?” Te reirei iaon te tia tei ibukina e buokia ni kamatoa karaoana.
Kamataata n te tamnei iroun Cody Bell
Te Karinerine
Ngkai ngaira ana taan tei Kristo, ti kaota te karinerine ibukin rabwatara “n taai nako ao ni bwaai nako, ao n taabo nako” (Motiaea 18:9) man kariaia n irii kainibaire ni koaua. Te Uea e kainnanoia naake a itiaki aika kona n rin n te tembora. Am rinerine n riki n tamaroa e kakoauaaki man am karinerine ibukin te Uea ao n rabwatam.
Ti riai naba ni kaota te karinerine ibukin rabwataia tabeman’ ao ni buokiia ni maiuakina te maiu ae tamaroa. Unimwaane M. Russell Ballard man te Kooram n Abotoro n te Tengaun ma Uoman e taku: “[Ataeinaine] a kainnanoia bwa ana ataa te bwai anne ngkana a bwaini kunnikai aika rangin ni kii, rangin ni kororo, ke e kororo koreana, aki ti kona ni kanakoa te rongorongo ae bure nakoia ataeinimwaane ake iai rekerekeia ma ngaia, ma a karekea n oin aia iango te kantaninga ae bure are kororaoin te aine e boboto iaon aron taraakina. E na aki kona n riki aei ke n iai rekerekena ma raoiroin kabwarabwaraan ana kakaonimaki natin te Atua te aine.”2
Ataeinaine, karinea rabwatam ao buokiia tabeman, riki ataeinimwaane, kateimatoai iango ao mwakuri aika tamaroa. Karinea rabwatam, n atakina bwa te maiu ae etieti ni katoabong maiuakinan te maiu ae raoiroi e anganiko te tamaroa ae akea tokina.
Karinerine
Unimwaane Robert D. Hales man te Kooram n Abotoro n te Tengaun ma Uoman e reireiniira: “N aron aontano n te tembora ae kaota mimitongin ao te karinerine nakon mwakuri aika karaoaki inanon te tembora, ara kunnikai e kaota tamnein tikiraoin ao itiakin nanora. E kanga aron kunnikaira e kaotia bwa iai ara karinerine raoi ibukin … otenanti ao berita aika tabu aika akea tokiia ke ti katauraoira ni karekei.”3
Kaota am karinerine ibukin ana angakarea ni kamaiu ara Tia Kamaiu man bwainakin am “kunnikai n te Tabati” n irii otenanti n te toa. “A riai ataeinimwaane ni bwainiia ma te karinerine ngkana e karaoi otenanti n te toa.”4 Ataeinaine, a kunikaia n ae riai.
Teirake! Riiki bwa te katoto n ni kunnikai aika riai n te mweenga, n te reirei, iaon te bike, n taian mwaie, ke ngkana ko takakaro. Ira ana katooto Kim ngkana ko rinea am kunnikai, kariaia te Tamnei ae Raoiroi bwa e na kairiko n am iango. “Titirakiniko, ‘N na namakina te mweengaraoi ma taraakiu ngkana I tei i matan te Uea?’”5
Ngkana ko maiuakin reirei aika teniua aikai—te tei ibukin, karinerine, ao karinean te Atua—ngkana ko rinea am kunnikai, ko na “ota nako” (D&C 115:5) n aron ana tia tei te Tia Kamaiu ae tangiraki.