Ofu ma Foliga Vaaia: “Tuu atu i le Agaga Paia e Taitai”

Saunia e Mary N. Cook

Fesoasoani Muamua i le Au Peresitene Aoao o Tamaitai Talavou

Ata na pueina e le © Busath Photography

I le avea ai ma sui o Keriso, tatou te faaalia le faaaloalo mo o tatou tino “i taimi uma ma i mea uma, ma i nofoaga uma” e ala i le usitai i tulaga faatonuina faapitoa.

E fai lava e Kim ofu talafeagai i taimi uma. I se tasi aso na ou fesili ai mo lona manatu po o le a le mea e ta’u o le sakete talafeagai, palausi talafeagai, ma se ofu taele talafeagai. Nai lo le talanoa mai i fua mo le uumi ma ua o ofu, na ma talanoaina mataupu faavae e ogatasi ma ofu talafeagai ma le luitau o le mauaina o ofu talafeagai e foliga manaia. Na ma maua le fiafia i le mafaufauina o auala eseese e fou e faaumi ai se sakete. Na iu ina faapea mai Kim, “Afai ou te le mauaina se lagona lelei pe a faatoa fai se ofu, e masani lava o lona uiga e le talafeagai ma o le a ou le maua se lagona lelei pe a ofu. Ua ou aoao e aua lava le faatauina. Na o le toe tuu lava i le fata.”

Ao taumafai Kim e ola agavaa, e mafai e le Agaga Paia ona taitaia o ia i lana filifiliga o lavalava. E ola faamaoni o ia i tulaga faatonuina o laei talafeagai ma e le taumafai e sui tulafono o ofu ma foliga vaaia. E malamalama o ia o lona tino o se malumalu (tagai i le 1 Korinito 3:16) ma e i ai sona tiutetauave e tausia, puipuia, ma faaofuina tatau.

Ao fausia se malumalu, e tele le faaeteetega e manaomia ia mautinoa ua puipuia ma teuteuina matagofie, i totonu ma fafo. O le ki i le fuafuaina o malumalu o le malamalama lea o se malumalu e suia le Alii—o Lona maota. Tatou te faaaloalo i malumalu o ni fale e ulu atu ai na o e agavaa. Tatou te faaaloalo i malumalu ona o sauniga ma feagaiga paia tatou te faatinoina ai e mafai ai ona tatou toe foi atu i lo tatou Tama Faalelagi.

E sili atu le taua o lou tino nai lo le malumalu sili ona taugata i le lalolagi. O oe o se atalii po o se afafine pele o le Atua! O nei lava aoaoga faavae—fai ma sui, faaaloalo, ma le migao—e sili atu le aoga mo le tausia ma le puipuiga e te tuuina atu i lou tino.

Fai ma Sui

Ao tatou fetagofi atu i le faamanatuga i vaiaso taitasi, ua tatou tauaveina i o tatou luga le suafa o le Faaola. O i tatou o Ona sui i le lalolagi. O se tasi o laina taiala i le Mo Le Malosi o le Autalavou e faapea: “O ou ofu ma foliga vaaia, e mafai ona e faaalia [i le Alii] le taua tele o lou tino. E mafai ona e faaali atu o oe o se soo o Iesu Keriso ma e te alofa ia te Ia.”¹

Ina ua faitau se tasi tamaitai talavou i lenei fuaitau, na filifili loa o ia e le toe fia savali latalata i le laina o le le tauagafau. Na vave loa ona ia aveesea soo se mea na i lana pusatu na le talafeagai ma lona avea ai ma sui o le Faaola. Na ia fai mai, “O le a avea au ma tagata poto pe afai ou te le faataitaia soo se ofu i faleoloa ou te iloa o le a ou le ofuina. Aisea e faaosoosoina ai fua?” O le mataupu faavae o le fai ma sui na fesoasoani ia te ia e fai lena faaiuga mausali.

Ata na tusia e Cody Bell

Faaaloalo

I le avea ai ma sui o Keriso, tatou te faaalia le faaaloalo mo o tatou tino “i taimi uma ma i mea uma, ma i nofoaga uma” (Mosaea 18:9) e ala i le usitai i tulaga faatonuina faapitoa. E manaomia e le Alii na o i latou e mama e mafai ona ulu i le malumalu. O lau filifiliga ina ia amiomama o le faailoga lea o lou faaaloalo mo le Alii ma lou tino faaletino.

E tatau foi ona tatou faaalia le faaaloalo i tino o isi ma fesoasoani ia latou ola i ni olaga mama. Na saunoa mai Elder M. Russell Ballard o le Korama a Aposetolo e Toasefululua: “[O tamaitai talavou] e tatau ona latou malamalama a fai ni o latou ofu e fufusi tele, pupuu tele, po o ni ofu e maualalalo tele ua, ua le gata ina latou auina atu se feau sese i alii talavou latou te miomio faatasi, ae ua latou faaputuputuina foi i o latou mafaufau le talitonuga sese e faapea, o le tulaga faatonuina o se tamaitai e fitoitonu lava lea i ona foliga faaletino. O lenei faauigaga e lei i ai lava i le faauigaga amiotonu o se afafine o le Atua.”²

Tamaitai talavou, faaaloalo i lou tino ma fesoasoani i isi, ae maise lava alii talavou, faatumauina mafaufauga ma amioga mama. Faaaloalo i lou tino, ma le iloa o le ola amiotonu i aso uma e te maua ai tulaga faatauaina faavavau.

Migao

Na aoaoina i tatou e Elder Robert D. Hales o le Korama a Aposetolo e Toasefululua: “E pei ona faaalia i laufanua o le malumalu ia le paia ma le migao mo sauniga o loo faia i totonu o le malumalu, o o tatou lavalava foi, e faaalia ai le matagofie ma le mama o o tatou tagata i totonu. O le faiga o o tatou lavalava e faaalia ai tatou te faaaloalo lelei i … sauniga o le malumalu ma feagaiga e faavavau ma pe ua tatou saunia mo le mauaina o ia sauniga ma feagaiga.”³

Faaali lou migao mo le taulaga togiola a lou Faaola i le faia o ou “ofu sili ona lelei” pe a auai i sauniga o le faamanatuga. “E tatau i alii talavou ona faia ofu e mamalu ai pe a faatinoina le sauniga o le faamanatuga.”⁴ Tamaitai talavou, fai ofu e talafeagai.

Tulai ia! Ia avea ma faataitaiga o ofu talafeagai i le fale, aoga, matafaga, siva, po o le taaalo foi i taaloga. Mulimuli i le faataitaiga a Kim i le filifiliga o ou ofu, i le tuuina atu i le Agaga Paia e taitaia oe i au filifiliga. Ia fesili ifo ia te oe lava, ‘Faamata ou te maua le lagona toafimalie lelei i o’u foliga vaaia pe a na fai o loo ou i ai i le afioaga o le Alii?’”⁵

Afai tou te ola i nei mataupu faavae e tolu o le—fai ma sui, faaaloalo, ma le migao—pe a outou filifilia o outou ofu, o le a outou “susulu atu” (Mataupu Faavae ma Feagaiga 115:5) o ni sui pele o le Faaola.