Me iSakisaki ni iTabagone
iSulusulu kei na iRairai: “Me Veidusimaki na Yalo Tabu”
© Busath Photography
Ni da matataka na Karisito, eda na vakarokorokotaka na yagoda “ena veigauna kecega kei na veika kecega, kei na veivanua kecega” ena noda muria e dua na ivakatagedegede.
E dau vakaisulu rakorako e veigauna kecega o Kim. Au a tarogi koya ena siga oya ena nona rai me baleta e dua na liku rakorako, dua na kote rakorako, kei na dua na isulunisili rakorako. A sega ni tukuna mai na kena ivakarau dodonu na belena kei na domona, keirau a veitalanoataka na ivakavuvuli e baleta na rakorako kei na dredre ni noda kunea na isulu rakorako rairai vinaka. Keirau lalasa toka ena neirau veisoli vakasama ena sala me vakabalavutaki kina e dua na liku. Oti sa qai tukuna mai o Kim, “Kevaka au sega ni dau logavinaka ena imatai ni gauna au tokara kina e dua na ka, sa kena ibalebale ni sega ni rakorako kau na sega ni logavinaka keu dara. Au sa vulica meu kua sara ga ni volia. Au na biuta lesu ga ena kena ililili.”
Ni segata o Kim me bula kilikili, ena rawa ni liutaki koya na Yalo Tabu ena nona digitaka na nona isulu. Dau bulataka ena lomasoli o koya na ivakatagedegede ni ivakarau dodonu ka sega ni dau segata me moica na lawa ni vakaisulu kei na irairai. E kila o koya ni yagona e valetabu (raica na 1 Korinica 3:16) ka sa nona itavi me qarauna, taqomaka, ka vakasuluma vakamatau.
Ni dau tara e dua na valetabu, sa dau qarauni na kena taqomaki ka ukutaki vakavinaka na lomana kei na taudaku. E dua na ka bibi ena kena tuvai e dua na valetabu na kena kilai ni valetabu e matataka na Turaga—oqori na Nona vale. Eda rokova na valetabu ni ra sa ka tabu ka ra na curu ga kina o ira era bulakilikili tu. Eda rokova na valetabu baleta ni veicakacaka vakalotu tabu kei na veiyalayalati eda laki cakava kina ena rawa kina vei keda me da lesu tale vei Tamada Vakalomalagi.
E vakamareqeti cake na yagomu mai na valetabu totoka duadua e vuravura. O iko na luvena tagane se yalewa lomani na Kalou! Na ivakavuvuli—veisosomitaki, na veidokai, kei na vakarokoroko vata oqo—me vakayagataki vakalevu cake sara ki na nomu qarauna ka taqomaka na yagomu.
Veimatataki
Ena veimacawa ni da vakaivotavota ena sakaramede, eda sa taura vei keda na yacana na iVakabula. Eda Nona mata e vuravura. E dua na idusidusi enaMe iSakisaki ni iTabagone e tukuna vaqo: “Ena nomu isulusulu kei na kemu irairai, sa rawa ni o vakaraitaka kina [vua na Turaga] ni o kila na kena vakamareqeti na yagomu. Sa rawa mo vakaraitaka ni ko tisaipeli i Jisu Karisito ka ni o lomani Koya.”1
Ni wilika e dua na goneyalewa na itukutuku oqori, sa lewa kina ni sega mada ga ni vinakata me torova yani na isulusulu sega ni rakorako. Ena gauna vata oqori e kauta tani kina mai na nona kovate ni isulu na veika kecega e sega ni ganita e dua e matataka na iVakabula. E kaya kina, “Au na vuku cake kevaka au sega mada ga ni tovolea e dua na ka mai na sitoa au kila ni sega ni dodonu meu daramaka. Na cava mo temaki kina?” Na ivakavuvuli ni veimatataki e vukei koya ena nona vakatauca na lewa tudei oya.
itaba ivakaraitaki mai vei Cody Bell
Veivakarokorokotaki
Ni da nona mata na Karisito, eda vakaraitaka ni da rokova na yagoda “ena veigauna kecega kei na veika kecega, kei na veivanua kecega” (Mosaia 18:9) ena noda vakadonuya me da bulamuria eso na ivakatagedegede. E gadreva na Turaga me ra curuma na valetabu o ira ga era savasava. Na nomu digitaka mo ivalavala savasava sa ivakadinadina ni nomu vakarokorokotaka na Turaga kei na yagomu.
Sa dodonu me da dau vakarokorokotaka talega na yagodra na tani ka vukei ira me ra bulataka na bula ni ivalavala savasava. E kaya o Elder M. Russell Ballard ena Kuoramu ni iApositolo Le Tinikarua: “Me ra kila tiko na [Goneyalewa] ena gauna era daramaka kina na isulu sa rui oso, rui lekaleka, se sa rui lako sobu na kena ikoti, e sega walega ni rawa ni ra vakauta e dua na itukutuku cala vei ira na cauravou era dau veimaliwai kaya, ia era sa vola tale tikoga ena nodra vakasama na itukutuku lasu ni kena yaga e dua na marama e vakatau ga vakatabakidua ena nona rawa ni vakayadrata na gagano. Oqo e sega vakadua ka na sega sega sara ni rorova yani vakalailai na kena ivakamacala dina e dua na luvena yalewa yalodina na Kalou.”2
Kemuni na goneyalewa ni rokova na yagomuni ka vukei ira na tani, vakauasivi o ira na cauravou, me ra dau maroroya na vakasama savasava kei na ivalavala. Rokova na yagomu, ni o kila ni bula dodonu e veisiga ena solia vei iko na veika e tawamudu na kena yaga.
Vakarokoroko
E vakavuvulitaka vei keda o Elder Robert D. Hales ena Kuoramu ni iApositolo Le Tinikarua: “Me vaka ga ni vakaraitaka na lomanibai ni valetabu na tabu kei na kena rokovi na veika e vakayacori ena loma ni valetabu, sa vakaraitaka vakakina na noda isulu na totoka kei na savasava ni lomada. Na ivakarau ni noda isulu e vakaraitaka ni da vakarokorokotaka dina tiko na … cakacaka vakalotu kei na veiyalayalati tawamudu kei na noda sa vakarautaki keda tiko me da ciqoma.”3
Vakaraitaka na nomu vakarokorokotaka na nona isoro ni veivakaduavatataki na iVakabula ena nomu daramaka na nomu “iSulu vinaka duadua ni Sigatabu” mo laki vakaitavi ena cakacaka vakalotu ni sakaramede. “E gadrevi vei kemuni na cauravou mo ni vakaisulu dokai ena gauna ko ni qarava tiko kina na cakacaka tabu ni sakaramede.”4 Kemuni na goneyalewa, ni vakaisulu rakorako.
Tucake! Mo ivakaraitaki ni isulusulu rakorako mai vale, koronivuli, e baravi, ena gauna ni danisi, se ena qito. Muria na ivakaraitaki nei Kim ni o digitaka na nomu isulu, ka laiva me liutaki iko na Yalo Tabu ena nomu vakatulewa. Tarogi iko mada, “Au na yalo vakacegu beka ena kequ irairai kevaka meu a tucake tu ena mata ni Turaga?”5
Kevaka o na bulataka na tolu na ivakavuvuli oqo—veimatataki, veidokai, kei na vakarokoroko—ena gauna o digia tiko kina na isulu mo daramaka, o na “rarama mai” (Vunau kei na Veiyalayalati 115:5) me vaka ni da nona mata lomani na iVakabula.