Molimau a Evelina i le Malumalu

Saunia e Miche Barbosa ma Marissa Widdison

E faavae i se tala moni

Sa fiafia lava Evelina e sau i le Peraimeri. O taimi uma lava e sii ai lona lima e fai ia tatalo. E fiafia foi o ia e fesoasoani i ona faiaoga.

Ae o le aso lenei, o le aso muamua lea o Evelina e tuuina atu ai se tautalaga. A o savali atu o ia i le pito i luma o le potu, sa pei e feminoia’i solo lona manava. Ona amata lea ona topetope le tata o lona fatu. Patū-patū. Patū-patū. Patū-patū.

“Talofa,” o le tala lea a Evelina ina ua taunuu i le pito i luma o le potu. “O lo’u igoa o Evelina. Na faatoa o atu lo’u aiga i le malumalu ina ia mafai ona matou toe faatasi e faavavau.”

Sa faamatala atu e Evelina i tamaiti o le Peraimeri e uiga i le ofu pa’epa’e sa ia ofuina. Sa ese foi le pa’epa’e o le malumalu ia. Sa ia ta’u atu ia i latou sa faamauina faatasi e faavavau o ia ma lona uso ma ona matua.

“Ou te iloa e alofa le Tama Faalelagi ia i tatou,” o le tala lea a Evelina. “Na te faatagaina i tatou e o atu i le malumalu ia faatasi ai e faavavau ma o tatou aiga.”

Sa toe foi Evelina e saofai i lalo. Sa ia lagonaina le fiafia. Sa pei na susulu atu se malamalama mafanafana i lona tino. Sa fiafia o ia ona sa alu i le malumalu.

Ata na tusia e Katie McDee