Ia Iloa Lorenzo Snow

Saunia e Christopher D. Fosse

O nai mea ia atonu e te le o iloa e uiga i le Peresitene lona lima o le Ekalesia.

O le tausaga lenei, o le tusi lesona mo vasega a le Aualofa ma le Au Perisitua Mekisateko e taulai atu i le soifuaga ma aoaoga a Peresitene Lorenzo Snow (1814–1901). Peitai, talu ai atonu o la outou vaega e le faaaogaina lenei tusi, e le faapea ai o le a le mafai ona outou aoaoina se mea pe lua e uiga ia te ia. Na soifua Peresitene Snow i se soifuaga ofoofogia sa tumu i faigata ma manumalo.

O Se Siamupini mo le Talalelei

Na uluai faafofoga Lorenzo Snow e uiga i le Ekalesia a o laitiiti lava o ia. O le taimi muamua, sa leai sona manao e papatiso, e ui o lona tuafafine o Eliza (le Eliza R. Snow lava lea e tasi na tusia le tele o viiga a le Au Paia o Aso e Gata Ai ma avea ma peresitene aoao lona lua o le Aualofa) na taliaina ma le naunautai le talalelei. Peitai, na ia manatu e manaia tele le aoaoga faavae o le Ekalesia. Ina ua amata ona auai Lorenzo i le kolisi i Oberlin, Ohio, e tele taimi na te faasoa ai talitonuga faale-Lotu i tamaiti aoga o ē na aoaoina e avea ma faifeau Porotesano. E ui e lei tautino atu lava o ia e papatiso, ae sa matua lelei lona tu atu mo le talalelei ma o lea sa toatele ai tamaiti aoga i Oberlin, na ioe e ono tatau ona moni le Ekalesia toefuataiina.

I lona malosi o se faifeautalai e pei foi ona i ai a o le’i ona taliaina le talalelei, e leitioa atili tuuto atu Lorenzo i le galuega ina ua uma ona papatiso. I ona uluai tausaga o le avea ai ma tagata o le Ekalesia, na tofia ai o ia e avea ma faifeautalai faamisiona. Na muamua talai i Ohio, sosoo ai ma Misuri, Kentucky, ma Ilinoi, ISA. Na auina atu mulimuli ane o ia i Peretania Tele e fesoasoani i le faatulagaga o le Ekalesia i Egelani. A o i ai o ia iina, na ia tuuina atu kopi o le Tusi a Mamona i le Tupu Tamaitai o Victoria ma Perenise Alapati. Na faamisiona mulimuli ane i misiona i Italia, Suitiselani, ma nofoaga ia na avea mulimuli ane ma Atumotu o Hawaii.

Vavega i le Vasa

Ina ua tuua e Elder Snow ia Egelani e toe foi i Navu, Ilinoi, sa ia aumaia se vaega toatele o tagata faatoa papatiso. Sa totogi uma o latou pasese i le vaa o le Swanton ma saunia ai mo le malaga umi i Amerika i Matu.

E ui e lei agaleaga le kapeteni o le Swanton i le Au Paia o Aso e Gata Ai i luga o lona vaa, ae sa le’i matuai agalelei foi. Sa masani ona taumamao ese lava o ia mai ia i latou. Peitai, ina ua tusa ma le lua vaiaso ua mavae i luga o le vasa, sa i ai se mea na tupu. Sa matua manu’a tuga le soatau a le kapeteni i se faalavelave. Sa leai se tasi na manatu e aulia e le soatau le ao.

Peitai sa i ai se fautuaga a se tuafafine faatuatua sa fesoasoani i le seila ua tigaina. Sa ia fai atu i le soatau e mafai e Elder Snow ona tuuina atu ia te ia se faamanuiaga ma e ono laveaiina ai lona ola. Sa ioe atu ma le naunau le soatau—o lē sa faigaluega e tausi ai lona toalua ma lana fanau e toalua o loo i —Siamani.

I le tulua o po ma ao, sa fafaguina ai Elder Snow ma sa talosagaina e sau i le potu o le alii lea ua tigaina. Ina ua taunuu mai o ia, sa la fetaia’i ma le kapeteni o le vaa. Sa faafetai atu le kapeteni i lona sau, ae sa ia faailoa atu ua leai se faamoemoe. Sa mafai ona iloa atu e Elder Snow sa tagi le kapeteni.

Sa alu atu o ia i le potu, tuu ona lima i luga o le ulu o le soatau, ma avatu ia te ia se faamanuiaga faaleperisitua. O le taimi lava na uma ai le faamanuiaga a Elder Snow, sa nofo ai i luga le tamaloa ma alu ese mai lona moega. Sa matua faamaloloina atoa le soatau, ma sa toe foi atu o ia i ona tiute i le aso na sosoo ai.

O Le Taua o Agaga

O le faamaloloina o le soatau na suia ai mea i luga o le Swanton. Na amata ona faaalu e le kapeteni le tele o ona taimi sa mafai ona faaavanoa i le Au Paia, ma sa ia suesue foi i le talalelei ma auai i sauniga lotu a le Ekalesia. Na faapena foi ona maofa ia isi seila. Ina ua taunuu le vaa, sa faatofa atu ma le alolofa le auvaa i le Au Paia. E ala i le mana o le perisitua, e le gata ina sa laveaiina ai le ola o se tamaloa, ae e toatele foi isi na tepa ai i le mana ma le alofa o le Atua. Na iu ina papatisoina le soatau ma le toatele o le auvaa.

E tele isi mea ofoofogia na tutupu i le soifuaga o Peresitene Lorenzo Snow. O lea, o le tausaga lenei, a o suesueina e le au matutua Aoaoga a Peresitene o le Ekalesia: Lorenzo Snow, o le a le mea tou te le mulimuli ai foi? I Aso Sa pe a i ai sou taimi avanoa, e mafai ona e faitauina nisi o aoaoga a Peresitene Snow. O le a mafai ona tele sou sao i talanoaga faaleaiga o le talalelei, ma a o faagasolo o le a e iloa ai se tamalii ofoofogia lea na avea ma se perofeta a le Atua.

Auauna atu i se misiona i Hawaii.

Auauna atu i ni misiona i le Iunaite Setete.

Aoao maia mataupu faavae o le talalelei e auauna ai i tamaiti a’oga.

Faamaloloina le soatau a le kapeteni i se malaga toe foi i Amerika i Matu.

Na tuuina atu kopi o le Tusi a Mamona i le Tupu Tamaitai o Victoria ma Perenise Alapati.