O Le Tusi a Mamona—Ia Faasoa Atu
Sa ou iloa e moni le Tusi a Mamona ona o mea e tolu sa ou lagonaina i le taimi sa ou faitauina ai.
A o 18 ou tausaga, sa ou nofo i Lima, Peru, lea sa ou fanau ma ola ae ai. O le taimi lena sa fetaui ai lo’u tama i sana uo lelei ua leva e le’i toe vaai i ai.
Sa faagaeetia lo’u tama ona sa foliga laitiiti lava lana uo ma sa laei lelei. Sa ia fesili atu i lana uo pe o le a le mea na tupu ia te ia na mafua ai lenei suiga. “Na faatoa e malo i se lulu?” na ia fesili ai. Sa tali le uo, “Ia, o se mea e sili atu le lelei nai lo lena. O lea ua avea nei a’u ma Mamona, ma ou te manao e faasoa atu le talalelei ia te oe ma lou aiga.”
Sa faapea lo’u tama sa tausua mai lana uo, o lea sa ia fai atu ai, “Ua lelei, afai e te manao e auina mai au faifeautalai, ia fai.” Peitai sa mo’i lava lenei alii, ma i totonu o ni nai aso na o mai ai faifeautalai ma tuitui mai i lo matou faitotoa. O le amataga lena o se aafiaga matagofie.
Sa aoaoina i matou e faifeautalai e uiga i le Tusi a Mamona ma tuu se kopi matou te faitau ai. O lenei mea sa tupu i le vaitaimi o le taumafanafana, ma sa ou faimalologa mai mo ni masina se lua ina ua uma lo’u tausaga muamua i le iunivesite. O lea sa ou aveina ai le tusi i lena aoauli ina ua uma le lesona ma amata loa ona faitau.
Na uma lea itulau ma lea itulau ae sa ou faitau ma faitau pea, ma sa le mafai ona taofi. Sa i ai se faatosinaga sa sau mai le tusi. Ou te fiafia tele e faitautusi ma sa ou faitauina ni tusi se tele, ae sa ese lava le mea lenei. Sa pu’evae a’u e le tusi, ma ina ua uma ona ou faitau mo ni nai itula, sa fai mai lo’u tina, “Juan, tape le moli! Ua fia momoe ou uso.” Ma sa ou fai atu, “Ia, toeitiiti, toeitiiti a,” ma sa faaauau pea ona ou faitau. E ui i le tele o itula sa ou faitau ai, ae sa leai so’u fiaai, leai se fiainu, ma leai se manao e moe.
A o le’i uma ona ou faitauina le tusi, sa ou iloaina sa i ai se mea faapitoa i totonu. Sa i ai sa’u molimau aua e tolu ni aafiaga na ou maua a o ou faitauina le tusi mo le taimi muamua lava.
O le mea muamua na tupu ia te a’u i na itula o se lagona o’oo’o o le toafilemu lea sa ese mai mai soo se mea sa ou oo muamua i ai. O lenei lagona o le toafilemu sa tumau lava ia te a’u mo ni nai itula.
O le mea lona lua sa ou oo i ai a o ou faitau o se lagona o le olioli. Sa le o le fiafia lea sa masani ona ou maua i taimi matou te faatasi ai ma a’u uo po o le taimi sa ou faatauina ai se mea sa sili ona ou manao i ai. Sa le o se lagona o le fiafia; sa o se lagona o le olioli. A o ou faitau, sa amata ona ou tagi ma sa ou manatu, “Oka, ou te fiafia i lenei lagona!”
Ma le mea lona tolu sa ou mauaina o le faamalamalamaina. O le taimi muamua na amata ai ona ou faitau, sa faigata ona malamalama aua sa i ai upu e pei o le Nifae ma le Togiola sa ou le masani ai. Ae ina ua tuanai ni nai itula o faitau, sa tatalaina lo’u mafaufau, ma sa pei sa i ai se sulu i lo’u mafaufau ma sa mafai ona faateleina ma faateleina lo’u malamalama a o faaauau ona ou faitauina le tusi.
Sa ou iloaina mulimuli ane o na aafiaga e tolu o nisi ia o auala e faailoa mai ai e le Agaga ia i tatou. Sa ou mauaina le Agaga, ma sa ou saunia e papatiso, ae sa manaomia lo’u faatali mo le isi vaega uma o lo matou aiga ina ia maua a latou lava molimau. Mulimuli ane i le aso 6 o Aperila, 1972, na papatisoina ai i matou ma lo’u tina, ma lo’u tuafafine. Sa i ai lo’u tamā ma isi o’u tei e toalua ma sa latou matauina ma le totoa mea sa matou faia, ma o ni nai masina mulimuli ane, sa papatisoina ai foi i latou.
Na fetaui lelei le taimi na oo mai ai le Ekalesia ma le talalelei i lo’u olaga. I lo’u tausaga muamua i le iunivesite, sa ou faalogo ai i le tele o filosofia a tagata ma manatu ma auala fou o le olaga sa matuai ese lava mai mea sa ou masani ai. O le tele o tulaga faatauaina sa ou aoaoina i la’u lotu a o ou laitiiti sa lu’iina e manatu fou sa tuu mai i o’u luma.
Sa faigata ia te a’u aua sa ou le mautonu. Sa tele naua ni mea fou sa ou lagonaina e le sa’o, ae sa pei lava o ni mea masani i isi tagata. Ma sa le lava le poto sa ia te a’u e puipui ai o’u tulaga faatauaina.
Ina ua uma ona ou papatiso, sa o se mea na ese ia te a’u le toe foi i le iunivesite. O le taimi nei ua i ai sa’u tala e fai atu e tali atu ai ma le alofa i isi. Ua mafai ona ou fai atu ma le to’a, “Leai, faafetai, ou te iloa e le o se mea lena mo a’u.” Ma o lenei ua ou iloaina le mafuaaga na tatau ai ona ou fai atu faapena. Sa oo mai le Ekalesia ma le Tusi a Mamona ia te a’u i le taimi sa’o lava. Ou te matuai faafetai aua ua suia ai lo’u olaga.
Sa faamanuiaina au ona o la’u filifiliga e auai i le Ekalesia. I totonu o le Ekalesia sa ou feiloai ai i a’u uo sili ona lelei. Sa ou matamuli lava, ma sa sili atu ia te a’u le nofo, suesue, ma faitau toatasi a’u tusi, ma ou fiafia ai lava na o a’u. Ae ina ua oo mai le Ekalesia i lo’u olaga, ua ou aoaoina ai le mea e ta’u o le uo moni. Sa ou maua se tamaitai talavou lelei lava i le Ekalesia o le ua avea ma o’u toalua. Sa ou maua ni taitai perisitua ma ni tagata o e sa popole mo a’u. I le Ekalesia a le Alii, sa ou maua ai le mea sa ou manaomia.
E toatele tagata o le a maua mea o loo latou manaomia i totonu o le Ekalesia. Aua le fefe e tautala atu i au uo ma fai atu, “Ou te talitonu i le mea lenei. Ou te manao e faasoa atu le mea lenei ia te oe.” O nisi taimi e te faalogo ai o tautatala tagata matutua i mea sa’o ma mea sese, ae a i ai sau uo e te lua tupulaga e tautala foi i lena mea e tasi, e te mulimuli atu i lena tagata. Mo ni mafuaaga, o leo o a tatou uo e malolosi atu nai lo leo o tagata matutua. O lea ia fai oe ma faataitaiga lelei aua e te le iloa lava pe o faatalitali ai iina se Juan Uceda. E le mafai ona e iloa seiiloga e tatala lou gutu ma fai atu, “Juan, ou te manao e valaaulia oe e sau i la’u lotu. Ou te manao e te faitau i le tusi lenei.” Afai e te faia lena mea faigofie, e te ono suia ni olaga.
O Elder Uceda (lona lua mai le taumatau) faatasi ma lona aiga i Lima, Peru, a o le’i leva ona auai o ia i le Ekalesia.
Ina ua uma ona auai i le Ekalesia, sa maua e Elder Uceda ni avanoa se tele e faasoa atu ai lana molimau e uiga i le Tusi a Mamona a o avea ma se faifeautalai faamisiona i Peru. Tauagavale, i luga: Elder Uceda (taumatau) o loo tutu ma se aiga liliu mai sa ia aoaoina. Tauagavale, i lalo: O Elder Uceda (laina pito i tua, taumatau) o loo faatasitasi ma isi faifeautalai i fafo o se faletapuai o le ekalesia.
Ata pue o le aiga mai faaaloaloga a Elder Uceda; ata na tusia e Brian Call