O Le Migao i le Atua O Le Amataga lea o le Poto
Mai se saunoaga o se faauuga na fofogaina i le aso 10 Aperila, 2009, i le Iunivesite o Polika Iaga–Idaho. Mo le saunoaga atoa i le Igilisi, asiasi ane i le http://web.byui.edu/DevotionalsAndSpeeches.
O le poto o le lalolagi, e sili ona taua pe a uunaia ma mulimuli i le poto o le Atua.
Ua tatou ola i se lalolagi ua matua anoanoai ai faamatalaga. Atonu e pei o se faatusa i le lalolagi le Wikipedia, le tusifafau [encyclopedia] aupito sili ona tele i le initoneti. Ina ia e maua sona aotelega, e oo mai i le 2012 ua silia ma le 2.5 piliona upu i le na o le faa-Peretania lava ia ma le silia ma le 22 miliona tusiga mai gagana pe 284. Ua silia ma le 70 lomiga o gagana o le Wikipedia ua tofu ma tala e le itiiti ifo i le 10,000. E silia ma le 4 miliona tusiga i le lomiga faa-Peretania.1
Ua faamaonia le anoanoai tele o tatou faamatalaga faapea foi i le matuai faateleina o saite faaagafesootai o upega fesootai e pei o le Facebook, na amatalia i le 2004 ma ua silia ma le 1 piliona tagata o loo faaaogaina nei i le lalolagi atoa i le 2012,2 po o le YouTube, lea na faalauiloa mai i le 2005, lea ua lipotia mai ai ni ata faavitio ua maimoaina i le silia ma le 100 miliona taimi.
O le i ai o lenei galufafati o faamatalaga, ua tatou matua manaomia ai lava le poto, poto e faavasega ai ma iloatino le auala e faaaoga ai mea o loo tatou aoaoina. O T. S. Eliot, o se Kerisiano talitonu na tusia i le tele o tausaga ua mavae se solo, ma o loo saunoa mai i lo tatou lalolagi i ona po nei:
Oi le lalolagi e o le tautotogo, e fotu mai ma mou atu!
Le li’o e le i’u o manatu ma faatinoga,
O fatufatuga e le uma, suesuega e le uma,
E aumaia le silafia i gaoioiga, ae le o le mateloloa;
Le silafia i le faiva o le tautala, ae le o le gugu;
Le silafia o upu, ma le le iloa o le Upu.
O lo tatou iloa faalelalolagi e tauau ai ina le iloa se mea faalelagi,
O lo tatou valea uma e lata ai ina oti,
Ae o le lata i le oti ae le iloa le Atua.
O ifea le Ola faaleagaga ua galoma atu i le ola faalelalolagi?
O ifea le poto ua galoma atu i le malamalama faalelalolagi?
O ifea le malamalama ua galoma atu i faamatalaga?
O taimi ua pasi o le Lagi i seneturi e luasefulu
Ua atili mamao ese ai i tatou mai le Atua ae lata atu i le Efuefu.3
O le a le tele o lou iloa i le poto? Atonu e manatua e nisi le tamaitai talavou, sa sagisagi fiafia i lana faaipoipoga ua lata mai, ma sa fai atu i ona matua, “Oi, o le a ou faaipoipo. Ua ou i ai nei i le pito o o’u faafitauli.” Ma sa musumusu atu lona tina i lona tama, “Ioe, ae na te le o iloa po o le fea pito.”
O le tele o lo’u aoao i le poto o le Atua, o le tele foi lena o lo’u talitonu o lea faatoa ou i ai i le pito amata o le poto. E faalotomaualalo ai au i lo’u iloaina le tele o mea e tatau ona ou aoaoina. O le taimi nei, ua ou faamoemoe e faatele lo’u naunau ia maua le poto aemaise lava o le poto o le Atua.
O Faamanuiaga o le Poto
Ou te manao e faamamafa atu le tele o mataupu faavae o le poto. Muamua, i lo tatou vaitau o faamatalaga ma le malamalama, e tatau ona tatou saili i le poto. O le poto e tele ituaiga ma e felanulanuai. O le poto e vave ona maua e aumaia ai faamanuiaga maoae. O le poto i se isi itu e le mafai ona feavea’i atu mai se tasi i se isi. Ma le mea mulimuli, o le poto o le lalolagi, e ui o le tele o taimi e taua ai, ae e sili ona taua pe a uunaia ma mulimuli i le poto o le Atua.
O loo faamatala mai e tusitusiga paia ni ituaiga se lua o le poto: o le poto o le lalolagi ma le poto o le Atua. O le poto o le lalolagi e i ai uma itu e lua o le lelei ma le leaga. I se faamatalaga e sili ona leaga, e mafai ona faamatalaina o se afa upumoni, e fefiloi ma le atamai ma le faaaimamago, e faataunuu ai faamoemoega manatu faapito ma faatiapolo.
O se faataitaiga mai le Tusi a Mamona o le tagata o Amiliki. Fai mai le mau “sa i ai se tasi tagata, sa igoa ia Amiliki, o ia o se tagata faitogafiti tele, ioe, o se tagata poto tele e tusa ma le poto o le lalolagi na … [taitaiese] e ia le toatele o tagata.” Na faamatala mai foi e le mau ia Amiliki o se “tagata amioleaga, … [o lona] faamoemoe [o le] faaumatiaina lea o le ekalesia a le Atua” (Alema 2:1–2, 4; faaopoopo le faamamafa). Tatou te le fia mananao i lea ituaiga o poto.
E i ai le ituaiga poto o le lalolagi e le leaga tele. O le mea moni, e lelei lava. O le poto lea, e maua lava e ala i le suesue, mafaufau loloto, mataitu, ma le galue malosi. E taua tele ma fesoasoani tele i mea tatou te fai. I tagata lelei ma tausaafia, e oo mai a o tatou feagai ma mea tutupu i o tatou olaga.
Atonu tou te manatua le faamatalaga a le tusitala Amerika o Mark Twain: “A o ou tamaitiiti ua 14 tausaga, sa matua le iloa e lo’u tamā se mea, ma sa ou matua le fia i ai lava i se mea e i ai lo’u tamā. Ae ina ua 21 o’u tausaga, sa ou ofo i le tele o mea na ia aoaoina i le 7 tausaga.”4 Afai tatou te matauina mea, afai tatou te magafagafa, e oo mai le taimi e mafai ona tele naua mea e aoaoina ai i tatou.
Ou te manatua le taimi o lo’u faauuga mai le kolisi. Sa ou alu atu mai le Iunivesite o Polika Iaga i Preston, Idaho, ISA, i le mea sa nofo ai lo’u tinamatua o Mary Keller. O le taimi lena ua 78 ona tausaga le matua ma ua olomatua lava. Sa maliu o ia i le lua tausaga mulimuli ane. O ia o se tamaitai ofoofogia, ma sa ou iloaina afai ou te faalogo ma aoao mai ona poto masani, e mafai ona ou aoaoina mai ai le poto o le a fesoasoani ia te au.
E mafai ona tatou tulioso i luga atu o le tele o aafiaga faanoanoa e oo mai i nisi i le olaga e ala i le vave mauaina o le poto—poto e i talaatu o tausaga o lo tatou matua. Saili i le poto lea—ia mafaufau loloto, mataitu ma le toto’a, mafaufau i mea e te oo i ai i le olaga.
E mafai foi ona tatou aoaoina le poto i a tatou tulimataiga patino faalematātā ma faaletagata lava ia. Sei ou tuuina atu ni faataitaiga se lua.
O Dr. DeVon C. Hale o se fomai faapitoa i le Aai o Sate Leki ma sa soifua ae i Idaho Falls, Idaho. Ou te maofa lava i lona silafia ma le poto e faatatau i faama’i masani i vaega o le teropika. E le na o le silafia e Dr. Hale ae faapena foi i lona malamalama i le auala e faaaoga ai lena silafia, e faavasega ai ia atulaina o faamatalaga ma fefaatusatusaa’i. O se faamanuiaga le i ai o lena ituaiga o poto mo faifeautalai i le salafa o le lalolagi.
O se faataitaiga lona lua: Ina ua amata le aoga tulagalua a lo ma atalii matua i lo matou nuu i Tampa, Florida, ISA, sa ma naunau lava e feiloai atu i le faiaoga o le aoga faata’ita’i, o Mrs. Judith Graybell. O se tamaitai ua 50 ma ona tupu tausaga, ma e maoae foi lona tomai i tamaiti laiti. Sa ia iloa lelei le auala e faaosofia ai i latou, iloa le taimi e faaviivii ai i ai, ma le taimi e pāū ai. Sa ia te ia le silafia e aoao ai i latou, ae e anoanoai isi tomai sa ia te ia. Sa ma galulue malosi ina ia ave le ma fanau uma i lana vasega faata’ita’i.
Ua faaalia e nei tagata e toalua le poto moomia i le lalolagi. O lo la’ua poto o se fesoasoani i le toatele, ma ua mafai ai e i la’ua ona manuia i a la’ua matata.
Ae peitai, e tatau ona tatou iloa tapulaa o lenei poto. O le poto i se tasi vaega, atonu e le aoga ona tauave atu i le poto i le isi. Mo se faataitaiga, atonu ou te le manao ia Mrs. Graybell e taulimaina faama’i o le teropika, atonu foi ou te le manao ia Dr. Hale e faiaoga i le vasega faata’ita’i a lo’u atalii.
O le mea e sili atu ona taua, o le poto e aumaia ai le manuia i le lalolagi, e tatau ona naunau e la’a i tua o le poto o le Atua ma aua nei mafaufau e mafai ona ia sui ai.
Manatua: e lei foafoaina tutusa le poto uma.
Fai mai le Fai Salamo, “O le mata’u ia Ieova o le amataga lea o le poto” (Salamo 111:10). O le uiga o le mau o le “migao a’ia’i”5 mo le Alii o le amataga lea o le poto. O lena migao a’ia’i e oo mai aua o lo tatou Tama Faalelagi “ua ia te ia le poto uma, ma le mana uma, i le lagi ma le lalolagi” (Mosaea 4:9). E atoatoa Lona poto. E mama a’ia’i. E le manatu faapito.
O lenei poto, e i ai taimi, o le a faafeagai ai ma le poto o le lalolagi, o lona uiga, o le poto o le Atua ma le poto o le lalolagi o le a matua feteenai lava le tasi ma le isi.
O manatua upu a le Alii ia Isaia?
“Aua o o’u manatu e le o outou manatu, o o’u ala e le o outou ala, ua fetalai mai ai Ieova.
“Aua e pei ona sili ona maualuga o le lagi i le lalolagi, ua faapea ona sili ona maualuga o o’u ala i o outou ala, ma o’u manatu e sili i o outou manatu” (Isaia 55:8–9).
O le a le oo mai le poto o le Atua ia i tatou e ala i aia tatau; e tatau ona tatou naunau e sailia. “Ae afai ua leai se poto i so outou, ina ole atu ia i le Atua, o Le foai tele mai i tagata uma ma le le toe tautaua; ona foaiina mai ai lea ia te ia” (Iakopo 1:5; faaopoopo le faamamafa).
O le poto o le Atua o se meaalofa faaleagaga. “aua le saili mo oa ae mo le poto, ma faauta, o le a fofola atu ia te oe mealilo a le Atua, ona faamauoaina ai lea o oe” (MF&F 6:7; faaopoopo le faamamafa).
O le saili mo le poto o le Atua e o faatasi i taimi uma ma le usiusitai i poloaiga.
O le mea masani lava, o le meaalofa faaleagaga o le poto e oo mai i lea laasaga ma lea laasaga, a o tatou sailia ma le faamaoni ma le maelega. “Ou te tuu atu i le fanauga a tagata lea fuaitau i luga o lea fuaitau, ma lea mataupu i luga o lea mataupu … ma e manuia lava i latou o e e faalogologo i a’u mataupu, … ona o le a latou aoaoina le poto; ona o ia o lē na te taliaina o le a Ou tuu atu atili i ai” (2 Nifae 28:30 faaopoopo le faamamafa).
Na saunoa Iosefa Samita: “O mea a le Atua e matuai taua tele; ma e na o le taimi, ma le poto masani, ma le faaeteete ma le mafaufau loloto ma mafaufauga paia, e mafai ai ona maua.”6 E le faamalieina nei lava le sailiga mo le poto o le Atua.
O le mea mulimuli, o le puna o le poto o le Atua e ese mai le puna o le poto o le lalolagi. O le poto o le Atua e maua i tusitusiga paia, i aoaoga a perofeta (e pei o taimi o konafesi aoao), ma le, ioe, i a tatou tatalo (tagai MF&F 8:1–2). Ma o taimi uma lava, taimi uma o lenei poto e tuuina mai ia i tatou e ala mai i le Agaga Paia. Fai mai le Aposetolo o Paulo:
“Po o ai foi se tagata ua iloa mea a le tagata, ua na o le agaga o le tagata o loo i totonu ia te ia? E faapea foi ona le iloa e se tasi mea a le Atua, ua na o le Agaga o le Atua. …
“O ia mea foi matou te tautala atu ai, i upu e aoaoina mai e le Agaga Paia, a e le o upu e aoaoina ai i le poto o tagata, o loo faamatalaina mea faaleagaga i upu faaleagaga” e le o upu e aoaoina ai i le poto o tagata, ae aoaoina mai e le Agaga Paia” (1 Korinito 2:11, 13; faaopoopo le faamamafa).
O le i ai o le poto o le Atua, tatou te vaai atu ai i luga atu o o tatou tulaga o i ai nei, aua e pei ona fai mai le mau, “e tauala mai le Agaga … i mea e pei ona i ai moni lava, ma mea e pei o le a i ai moni lava” (Iakopo 4:13).
O le poto o le Atua o le poto lea e alagatatau ai le tuuto atu i ai o la tatou gauai.
Poto ma le Sefuluai
Atonu o le itu aupito taua o le, e lei fatufatuina le poto uma ia tutusa. E tatau ona tatou iloa, a oo ina i ai se feteenaiga i le va o le poto o le lalolagi ma le poto o le Atua, e tatau ona faamatuu atu o tatou manao i le poto o le Atua.
O i tatou o atalii ma afafine o le Atua. O i tatou o ni tagata faaleagaga o loo i ai i se misiona i la le tino. O i tatou o ē ua tuuto atu i le aoaoina o le poto o le lalolagi ma le poto o le Atua, e le tatau ona fenumia’i pe o le fea poto e sili atu ona taua.
Sei ou faamatalaina se mea na oo i ai se tamaitai o le Au Paia o Aso e Gata Ai i São Paulo, Pasila. Na ia faamatalaina lana tauiviga pe totogi lana sefuluai po o lona pili a’oga. O ana upu nei:
“O le iunivesite … e faasa ai tamaiti aoga sa nofo aitalafu (pe lei totogiina o latou pili) ona sue i suega.
“Ou te manatua se taimi sa ou … feagai ai ma faigata o mea tautupe. O se Aso Tofi, ina ua maua mai lo’u totogi. Ina ua ou tago e faavasega la’u paketi faalemasina, sa ou vaaia o le a le lava se tupe e totogi ai la’u sefuluai ma la’u aoga. Sa tatau ona ou filifili i mea e lua. O suega e ta’ilua masina ma fai, o le a amata i le vaiaso e sosoo ai, ma afai ou te le su’e ai o lona uiga, e le aoga atoa le tausaga o le aoga. Sa ou matua mafatia lava. … Sa tiga lo’u loto.”
O se feteenaiga tonu lava lea i le va o le poto o le lalolagi ma le poto o le Atua. E ui lava ina e lelei tele ma amiotonu, ae o le a e oo i se taimi o lou olaga, afai e te faamaoni ia te oe lava, o le a tiga lava lou loto a o e lagonaina nisi o nei feteenaiga pe a oo mai ia te oe.
O le a ou toe foi i lana tala. Muamua, sa ia totogiina lana sefuluai i le Aso Sa. O le Aso Gafua na sosoo ai, sa ia faamatalaina le mea na tupu:
“O le a uma le taimi faigaluega, ae sau lo’u pule e aumai faatonuga mulimuli o le aso. … E le i umi, ae tu ma tilotilo mai ia te au ma fesili mai, ‘O a mai lau aoga?’ [Sa ia faamatalaina [lona pule] o se tagata faigata, ma na pau lana tala na mafai ona fai atu o le:] ‘O loo lelei mea uma!’”
Ona alu lea. Na faafuasei ona ulufale atu le failautusi i le potu. Fai mai, “Faatoa uma nei ona fai mai le pule e amata atu i le aso, ona totogi atoa e le kamupani lau aoga uma ma au tusi. Ae e te lei alu, sau i lo’u ofisa e ta’u mai le totogi, ina ia oo atu taeao ua mafai ona ou avatua le siaki.”7
Afai e te matauina, o le a e iloaina lou fetaiai ai ma nei ituaiga o tofotofoga i le tele o taimi i le gasologa o lou olaga. O fea o le a e tuu i ai lou faatuatuaga? Faalogo i le lapataiga a le Alii o tuusao mai ia i tatou:
“E, le fiatagata e, ma vaivaiga, ma le valelea o tagata! Pe a aoaoina i latou [i le poto o le lalolagi] ua latou manatu ua popoto i latou, ma latou le faalogologo ai i le fautuaga a le Atua, ona ua latou tuueseina, i le manatu ua latou iloa mo i latou lava [le poto o le lalolagi], o le mea lea, o lo latou poto o le valea lea, ma o le a le aoga ia te i latou. Ma o le a fano i latou.
“Peitai e lelei le aoaoina [i le poto o le lalolagi] pe afai latou te faalogologo i fautuaga a le Atua” (2 Nifae 9:28–29; faaopoopo le faamamafa).
O upu a Paulo:
“Po o ifea le tagata poto? … e le ua avea ea e le Atua le poto o lenei lalolagi ma valea?” (1 Korinito 1:20).
“Aua ne’i ai se tasi e faaseseina o ia e ia. Afai ua ia te outou se tasi o manatu e poto ia i lenei lalolagi, ia avea ia ma vale, ina ia poto ai o ia.
“Aua o le poto o lenei lalolagi o le valea lea i luma o le Atua” (1 Korinito 3:18–19; faaopoopo le faamamafa).
E masani lava o le suega pe o le a tatou faatagaina le poto o le Atua e avea ma o tatou taitaiala pe a faafeagai ma le poto o le lalolagi.
O le auega a Amona, “Ona latou te le saili le poto [le poto o le Atua], pe latou te mananao foi e pulea i latou e le poto” (Mosaea 8:20). Pe a mafaufau ia i latou o e ua naunau e pulea i latou e le poto o le Atua, ua ou mafaufau ai i sau uo mai le atunuu autu o Saina, o Xie Ying, lea sa na ia faia ni osigataulaga tetele ina ia auai ai i le Ekalesia ma faia se misiona i Niu Ioka. Ou te mafaufau i lau fanau teine e toalua, e matuai atamamai ma e tofu ma faailoga o le matuaofaiva, peitai ua la filifilia faamanuiaga faatina ma fanau. Ou te mafaufau i se uo mai Amerika i Saute lea na ia tuua lana galuega e lelei le totogi ina ua ia iloaina o loo taumafai le pule e aloese mai le totogiina o lafoga. Sa tuuina e i latou uma nei le poto o le Atua i luga atu o le poto o le lalolagi.
O le mea e faanoanoa ai, e mafai e le poto o le lalolagi ona faaseseina ia tagata malolosi. Na saunoa mai ai Iosefa Samita: “E toatele alii sili ma le atamamai faapea foi ma tamaitai o loo i lo tatou lotolotoi ua atamamai tele mo le toe aoaoina; o le mea lea e tatau ona oti ai i latou ma lo latou valea, ma i le toe tutu o le a latou iloa a latou mea sese.”8
Poto ma Mea Tautupe
Faatasi ai ma taimi faigata o lo tatou tamaoaiga, ou te fia talanoa atu e uiga i le mataupu o mea tautupe patino. O tatou tulaga o i ai nei ua sili atu lo tatou faamaualalo ma aoaoina—peitai, sei toe mafaufau i tua i nai tausaga ua mavae atu.
O loo aoao e le lalolagi faapea afai tatou te mananao i se mea, e tatau ona tatou mauaina. E le tatau ona tatou faatali i ai. E mafai e le aitalafu ona aumaia lena mea ia i tatou i le taimi lava lenei. E mafai foi ona faia i kata fai faatau faaaitalafu, atonu e mafai foi ona nono mai se tupe mai le faletupe ae faamau i lou fale. E mafai ona tatou faamauina mea o tatou maua, e oo lava i a tatou aoga. O le a agai pea i luga le tau, ma o le a faamanuiaina i tatou. O le poto o le lalolagi e faapea o le aofaiga o le tupe e totogi i le aitalafu faalemasina o le a sili atu le taua nai lo le aofaiga o le nonogatupe. O le a mafai lava ona tatou faafoeina a tatou tuutuuga tautupe, ae pe a le mafai ona totogiina, o le gau lava la tatou filifiliga mulimuli.
Sei o tatou mafaufau i le poto o le Atua e uiga i tupe faaletagata lava ia, o loo aoao mai pea e ala mai i perofeta. O le faavae o le ola faalagolago lea o le tagata ia te ia lava ma le galue. Tatou te tuuina tupe i lana matafaioi sa’o e ala i le totogiina o se sefuluai faamaoni ma limafoai i a tatou taulaga. Ia tatou ola i mea e itiiti ifo nai lo mea tatou te maua, ma ia tatou filifili ma le atamai i le va o mea tatou te manaomia ma mea tatou te mananao i ai. Ia tatou aloese mai aitalafu sei vagana ai o ni mea taua e sili ona manaomia. Ia tatou ola i se paketi. Ia i ai se tatou tupe o teu. Ia tatou faamaoni i a tatou tuutuuga tautupe uma.
Pe tusa o le 14 tausaga ua mavae, sa lapatai mai ai Peresitene Gordon B. Hinckley (1910–2008) faapea: “O loo ou fautuaina atu, ua oo mai le taimi e faatulagaina lelei ai o tatou aiga. Ua toatele naua o tatou tagata e faaaoga uma a latou tupe maua e ola ai. O le mea moni, o nisi o loo ola i tupe nono.… O loo i ai se faailoga o le tau matagia o loo i luma, ma e tatau ona tatou manatunatu i ai.”9
I le tele o tausaga ua mavae ma i le faatumutumuga o lo tatou tulaga manuia, sa saunoa ai Peresitene Thomas S. Monson:
“Ou uso e ma tuafafine, aloese mai le filosofia e faapea o mea na soona fai ananafi ua avea ma mea manaomia i aso nei. E le o ni mea e manaomia sei vagana ua tatou avea ma ni mea manaomia. E toatele ua oo atu i ni aitalafu mo se taimi umi ina ua faatoa iloa e i ai suiga e tutupu mai: e mama’i tagata po o le le toe mafaia o se mea, e faaletonu pe tapuni le kamupani, le toe maua ni galuega, o le oo mai o faalavelave faalenatura ia i tatou. O le tele lava o mafuaaga, e masani lava ona le toe totogia ni aitalafu tetele. E avea a tatou aitalafu e pei o se pelu a Damocle o loo tautau ifo i o tatou luga ma faamata’u mai e faaumatia i tatou.
“Ou te uunaia outou ina ia outou ola i mea ua outou maua. E le mafai e se tasi ona faaauau pea ona faaalu e sili atu nai lo mea na te maua ma tumau ai pea le sologa lelei. Ou te folafola atu ia te outou o le a sili atu lou fiafia nai lo le tulaga e te oo i ai pe afai e te popole pea lava pe o le a faapefea ona toe totogi atu nisi tupe i se aitalafu e le talafeagai.”10
Pe o mafai ona e vaai i le auala e mafai ai ona feteenai le poto o le Atua ma le poto o le lalolagi? Sa le’i matua iloagofie le filifiliga a o foliga lelei mea uma. E toatele tagata o le Ekalesia e moomoo maimau pe ana latou faalogo lelei.
O le poto lenei o le Atua.
Ou te fautuaina oe e vaai ni faafitauli o loo oulua feagai. Tusi se laina mai luga i lalo i le ogatotonu o se fasipepa. Lisi le poto o le lalolagi i le itu tauagavale ma le poto o le Atua i le itu taumatau. Tusi faafitauli e feteenai le tasi ma le isi.
O a filifiliga o e faia?
I le vaega e 45 o le Mataupu Faavae ma Feagaiga, lea o loo talanoa i mea e tutupu e tau atu i le Afio Mai Faalua o le Faaola, o loo toe faamatala mai ai foi e le Alii le tala i taupou e toasefulu ona ia tuu mai ai lea o upu nei ia i tatou: “Aua o i latou o e e popoto ma ua latou talia le upumoni, ma ua latou ave le Agaga Paia mo o latou taiala, ma sa lei faaseseina—e moni Ou te fai atu ia te outou, o le a le tatuuina i latou i lalo ma lafo i le afi, ae o le a latou gafatia le aso” (MF&F 45:57).
Ia tatou saili atu i le poto o le Atua. O loo tatou i ai nei i taimi faigata o le tamaoaiga i le lalolagi atoa, ma ua aumaia ai ni atugaluga a o tatou fuafua mo galuega, matata, ma tupe maua. Ae e tele aso lelei ma le manuia o i luma. E tele naua e mafai ona tatou aoaoina i le taimi nei e uiga i le poto. Ou te folafola atu o le a e maua faamanuiaga a le Alii pe a e saili atu mo le poto—le poto o le Atua.
Ata na tusia e Derek Israelsen