O Le Taua o Aoaoga

O aoaoga o se vaega taua o le talalelei ma le saunia e auai i tulaga o tagata lautele ma le tausiga o le tagata lava ia ma lona aiga.¹ Sa saunoa Elder Craig A. Cardon o le Fitugafulu e uiga i le taua o aoaoga i itulau e 54–55 o le lomiga lenei.

“I lenei lalolagi ua faateteleina le faigata, o le aoaoina o se tasi lea o ausiaga aupito taua o le olaga,” sa ia tusia ai. “Ma e ui ina moni e faapea o le tele o le aoaoina o le mea masani o le a taitai atu ai i avanoa mo le faateleina o taui faalelalolagi, ae o le taua sili atu o le malamalama faateleina, o le avanoa lea tatou te maua e avea ai ma faatosinaga sili atu i le ausiaina o faamoemoega a le Alii.”

O loo ta’u mai i le Mo Le Malosi o le Autalavou: “O lau aoga e tatau ona aofia ai aoaoga faaleagaga. Suesue i tusitusiga paia ma upu a perofeta o aso e gata ai.Ia auai i seminare ma inisitituti. Ia faaauau pea ona aoao i lou olaga atoa e uiga i le fuafuaga a le Tama Faalelagi. O lenei aoaoga faaleagaga o le a fesoasoani ia te oe e maua ai tali i luitau o le olaga ma o le a valaaulia ai le mafutaga a le Agaga Paia.”²

Fautuaga mo le Aoao Atu o le Autalavou

Faitau le vaega i le a’oga i le Mo Le Malosi o le Autalavou. Faasoa atu ou lava aafiaga lelei i le suesue i le aoga ma le talalelei. O lenei mea e mafai ai ona e talanoaina lenei tulaga faatauaina faatasi ma lau tama o le autalavou ma tali soo sana fesili e ono i ai.
Fesoasoani i lau talavou e faatulaga ni sini faalegaluega ma faaleaoaoga e faavae i ana taleni ma mea e fiafia i ai. Fesoasoani ia te ia e faailoa nisi o sitepu e amata galue ai i nei sini.
Mafaufau e fai se afiafi faaleaiga i le taua o aoaoga (o se punaoa lelei o se tusiga mai ia Elder Dallin H. Oaks ma Kristen M. Oaks, “Aoaoina ma le Au Paia o Aso e Gata Ai,” Liahona, Ape. 2009, 26–31).
Alu i le youth.lds.org ma kiliki i le “For the Strength of Youth” i lalo o le Lisi Youth. I lalo o le “Education,” o le a e maua ai mau e faatatau i aoaoga, vitio (tagai, mo se faataitaiga, “Surfing or Seminary?”), polokalama leitio o Alaleo a Mamona, fesili ma tali, ma tusiga e aofia ai saunoaga mai le Au Pulega Aoao.

Fautuaga mo le Aoao Atu o Tamaiti

E malie le aoaoina o ni mea fou, ae o le aoaoina e mafai foi ona faigata. O le lomiga o le masina lenei o loo aofia ai se tala e ta’ua “Sauni e Faitau” (itulau e 66). O le tala o loo faamatalaina ai se teineitiiti e faaletonu lona tomai e malamalama ai i le gagana tusitusi o le sa taumafai e faitau leotele ma le auala sa uunaia ai o ia e tamaiti Peraimeri e fai le mea sili na te mafaia. Mafaufau e faitau atu lenei tala i lau fanau ma talanoa faatasi e uiga i fesili nei:

O le a se lagona o Mele a o taumafai e fai se mea faigata? Aisea e taua ai le aoao pea e tusa lava pe faigata?
O a mea na fai e isi tamaiti e fesoasoani ai ia Mele? O le a se mea e mafai ona e faia e fesoasoani ai i isi e aoao i le fale, i le lotu, ma i le aoga?

Ata na tusia e Taia Morley