Vaaia o [Uiga] Lelei o Taili
Sa le mafai ona ma onosaia le tasi ma le isi. Mata e ono mafai ona avea i maua o se uo?
Ata na tusia e Taia Morley
I le vasega fa, sa ou i ai i le vasega sa sili ona lelei sa i ai. O mea uma e uiga i lena vasega sa atoatoa—vagana ai Taili [ua suia le igoa]. Sa agaleaga o ia i le toetoe o tagata uma, e aofia ai ma a’u. Sa ou vaai o ia tuleia isi i le auala savali o le fale faafiafia, ma sa ia tuleia foi a’u i nisi o taimi. Ou te alu i le fale ma le tagi ona sa ou le malamalama pe aisea e taufaafefe ai ia te a’u.
Sa leai se isi na fai ma ana uo. Sa na o ia lana laulau i le taimi o le malologa aua e leai se isi e fia nofo latalata ia te ia. Sa ou faamatala i lo’u tina e uiga ia Taili, ma sa ia tuuina mai ia te a’u ni upu o le poto e suia ai olaga: “Atonu o loo ia manaomia se uo.”
Sa oo mai lenei mea i se tulaga na o’u te’i ai. E mafai faapefea ona faaali le amiolelei i se tasi e le taitai fetuutuunai pe a valaau mai ia te a’u se upu faatiga? Ae peitai, sa ou filifili ma le le naunau i ai ia ou agalelei teisi atu ia Taili ma taumafai e malamalama ia te ia. A o faasolo ina ou masani lelei ia te ia, sa ou iloa ai o le mea moni o ia o se tagata lelei. E lei umi ae ou iloaina o lona olaga sa sili atu ona leaga nai lo le mea na mafai ona ou mafaufauina. Sa faigata se aiga sa nofo ai, ma e taumafai lava e aloaloese mai soo se talanoaga e aafia ai le upu “aiga.”
I se tasi aso i le taimi o le malologa, sa matou saofafai ai ma a’u uo. Talu ai ona sa agaleaga Taili i isi, o lea sa i ai ni isi o teineiti sa faapena ona agaleaga atu foi ia te ia. Sa amata ona latou taufaalilili ia Taili, ma talanoa leotetele ina ia mafai ona ia lagonaina mai i latou. Sa latou faia ni ala e pei o le, “Sau tatou nonofo—TOE AFE!” “O le a lena manogi? Aue, o Taili!” ma le “Aua nei e sau ia i matou!” Sa ou saofai iina ma faalogo i ai.
Ona ou faalogoina lea o se leo itiiti i lo’u mafaufau: “Fai se mea.” Sa ou tu i luga ma lagonaina le tele o mata na tilotilo mai ia te a’u. “Taofi!” na ou fai atu ai. “Aisea o le a tou faia ai na faamatalaga i soo se tagata? Tau lava o le fai faalelei o ia!” Sa filemu tagata uma. A o ou saofai ifo, sa ou tilotilo atu ia Taili. Sa faliu ma vaai mai ia te au ma se agaga faafetai moni.
I le vasega ono sa oo mai lo’u aso fanau e 12 ai o’u tausaga, ma sa ou manao e fai se pati ma ni nai a’u uo. Ina ua fesili mai tina pe ou te manao e valaaulia se isi tagata, sa ou lagonaina lena lava leo itiiti i lo’u mafaufau: “Valaaulia Taili.”
“Ou te manao e valaaulia Taili,” sa ou fai atu ai i lo’u tina.
“E mo’i?”
Sa luelue lo’u ulu. Ina ua uma le pati o le aso fanau, sa fusia i matou ma a’u uo, na aofia ai ma Taili, i se tulaga lea na oo ai ina matou faatasitasi i Aso Faraile uma i masina mulimuli e tolu na totoe o le aoga. Sa sau Taili i taimi taitasi na. Sa avea i maua o se uo sili ona lelei.
O lenei ua ou i ai i le vasega valu ma ua ou siitia atu i se isi setete, ae e masani lava ona ma talanoa ma Taili, o le o loo avea pea ma se tasi o a’u uo lelei. O nisi taimi e fesili mai ai isi a’u uo pe na faapefea ona ma vavalalata.
“I le vasega fa sa avea o ia ma se tagata taufaafefe, ma sa tele lava ina ita le tasi i le isi,” o la’u tala lea.
“Ia, ona faapefea lea ona avea oulua ma uo lelei?”
“Sa ou vaavaai mo uiga lelei ia te ia. E tofu tagata uma ma ni uiga lelei ia i latou, ma sa ou aapa atu e su’e ona uiga lelei.”