O La’u Tatalo Muamua e uiga i le Uluai Faaaliga

Jing-juan Chen, Taiuani

Ina ua ou filifili e papatiso, sa mafua ona sa foia nisi o o’u faafitauli a o fai a’u lesona. Sa le mafua ona sa ou tatalo ma maua se molimau e moni le Tusi a Mamona pe sa vaai Iosefa Samita i le Tama ma Lona Alo o Iesu Keriso. Sa valaaulia au e faifeautalai ou te tatalo e uiga i nei mea, ae ou te le’i faia lava. Sa na ona ou talitonu lava i mea sa aoao ai a’u e faifeautalai.

O le tolu o tausaga talu ona uma lo’u papatisoga, sa tu ai se tamaitai i le pulelaa o le falesa ma faasoa mai lana molimau e uiga i le Tusi a Mamona ma Iosefa Samita. Sa fai mai o ia i tagata uma e mafaufau loloto i le fesili lenei: “Pe ua tatou tatalo moni ea e uiga i le moni o le Tusi a Mamona ma e uiga i le mea na tupu ia Iosefa Samita?” Sa matuai taia au i lenei fesili, ma ou mafaufau ifo ai ia te a’u lava, “Ou te le’i tatalo lava e uiga i nei mea, ae e tatau ma o le a ou faia.”

Sa faaosofia au e faatino ona o lo’u faatuatua i lena taimi sa vaivai ma sa papa’u foi la’u molimau e uiga i tusitusiga paia. O lena po sa ou tatalo ai i lo’u Tama e uiga ia Iosefa Samita ma le moni o le Tusi a Mamona.

Ou te le’i lagonaina se mea i le taimi muamua sa ou tatalo ai, po o le taimi lona lua. Ina ia ou le lotovaivai, sa ou susueina ai tusitusiga paia i le Iosefa Samita—Talafaasolopito 1:14–17, lea o loo faamatala mai ai le ala na alu atu ai Iosefa i le vao e fai sana tatalo patino:

“Na ou vaaia ai se malamalama faaniutu i luga a’e tonu lava o lo’u ulu, ua sili atu le pupula i le la, ua alu ifo malie lava seia oo mai i o’u luga.

“Sa le’i pine lava ona oo mai ae ou faalogoina ua laveaiina a’u. … Ina ua oo mai le malamalama i o’u luga, sa ou vaaia ni Tagata e toalua.”

A o ou faitau i upu, sa amata ona ou gatete e pei ua sao se galu o le eletise i totonu o lo’u tino atoa. O le taimi lava lena sa ou iloaina ai sa vaai moni Iosefa Samita i le Tama Faalelagi ma Lona Alo Pele o Iesu Keriso. Ua ou iloaina ua tatou maua le Tusi a Mamona ona sa faaliliuina e le Atua e ala i Lana perofeta.

Ou te faafetai ona sa tuuina mai e le Tama Faalelagi lenei molimau ia te a’u i le moni o le Uluai Faaaliga. Ua ou iloaina ana faapea e le toefuataiina mai le talalelei, semanu ou te le iloa lo’u Togiola. Ua ou iloa e moni le atoatoaga o le talalelei, ma ua ou iloa o le a ou maua folafolaga a le Atua pe afai ou te tumau e oo i le iuga.