Aoao Pea [le Taina o le Piano]
Sa ou manao e togi le solo. Mata o le a i ai se aoga o nei taumafaiga uma?
Ata na pueina e le iStockphoto © Brian Steele
“Ua ou le toe fia alu i lesona ta piano,” na ou fai atu ai i lo’u tina. Ua ou aoga mo ni nai tausaga ma ua ou lelava i le aoao soo [o le taina o le piano]. Sa ou sauni e togi le solo. Ma le isi sa ou le lelei tele ai. Talu ai ou te maua i le faafitauli o le tau le lelei o le faalogo ma e fai a’u masini e fesoasoani i la’u faalogo, o lea ou te le’i mafaufau ai lava o a’u o se tagata e i ai se taleni tau musika. O taimi uma lava e umi se taimi e tau aoao ai le fati o se pese.
Sa le’i tele se tala a lo’u tina na fai mai ae sa na ona fai mai, e tatau ona faaauau pea ona fai a’u lesona seia oo ina mafai ona ou taina viiga. Ina ua tuanai le tele o lo’u faitio ma le tele o le faamalosiauga mai o’u matua, sa ou filifili loa o le a ou le fiu.
Faatelevave i luma i ni nai tausaga ma le faitau afe o maila i se falelotu i atumauga o Kuatemala tutotonu. I le avea ai ma se faifeautalai, sa ou auai i se konafesi faaleitu. Sa ou vave taunuu ma ou tau atu ai i se piano iina, o lea sa ou saofai ifo ai loa ma amata tata ni viiga. O le tele o uarota ma paranesi sa i ai ni piano uila laiti sa faigata ona tata ai, o lea sa matuai ou fiafia ai lava e tata i se piano mo’i. Sa iu ina talosagaina au e ta pese a le aulotu mo le konafesi.
O le a le mea na suia o’u uiga faaalia i le va o o’u tausaga o lo’u talavou ma le taimi na avea ai au ma se faifeautalai? Sa ou lagonaina le mana o le Agaga e ala i musika.
A o ou faamisiona, sa ou maua ni avanoa se tele e faaaoga ai tomai faamusika sa ou aoaoina. Sa ou faamemelo i le tele o avanoa e pese ma ta ai le piano ma tata i le toetoe lava o vaiaso uma i sauniga faamanatuga. O le a ou manatua pea le faalogologo atu i na tagata faamaoni o le ekalesia i Kuatemala o peseina viiga. Sa ou aoaoina atu i le au paia viiga fou latou te le’i masani ai. Sa ou aoaoina atu ni lesona amata o le taina o le piano. Matou te pepese ma a’u soa i tagata sa matou aoaoina. E tusa lava pe sa pa’ulua a matou pese, sa i ai lava iina le Agaga e pai atu i loto o tagata.
Sa ou aoaoina e le afaina po o a au taleni; e mafai lava ona e aoao e atinae tomai faamusika. O le a le avea a’u ma se ta piano iloga, ma o le toatele o le au paia i Kuatemala o le a le i ai lava i le Aufaipese a le Tapeneko. Ae sa le’i afaina. Sa mafai lava ona matou lagonaina le Agaga e ala i musika. Ou te faafetai lava ona sa uunaia a’u e o’u matua e fai pea a’u lesona ta piano, ma ou te faafetai ona sa faaauau pea ona ou aoao pea.