Faatuatua, Faamoemoe, ma Mafutaga
O le manao, talitonu, ma le faamoemoe e tatau ona faaosofia i tatou e atiina ae ni mafutaga lea e taitai atu ai i faaipoipoga.
Sa e faia mo’i lava se lisi o mea e aoga ma mea e le aoga?” O le fesili sa fai mai e lo’u atalii i se leo e te’i, sa faatatau i se lisi sa ia mauaina i totonu o se tasi o a’u api o talaaga. Sa le na o soo se lisi o mea e aoga ma mea e le aoga; o se lisi na ou faia i le 30 tausaga ua mavae, ae ou te le’i fai i lona tina ma te faaipoipo. Ou te le iloa pe toafia ni alii e faia se lisi e pei o la’u lisi, ae ina ua ou mafaufau loloto i le manatu e uiga i le faaipoipoga a o avea au ma se alii e 24 tausaga le matua sa aoga i le kolisi, sa foliga mai o le mea tonu lea e fai.
Ou te le manatua nisi lava fesili a lo’u atalii i lena aso e uiga i le ma feoaiga tumau; sa matuai taulai atu lava o ia i le lisi. O loo mafai lava ona ou vaai faalemafaufau ia te ia, o valaau atu i nai ona tei, “Sa fai e Tama se lisi e uiga ia Tina! O mai e vaai i ai!” Ae peitai, a o ou toe tepa i tua, e mafai ona ou manatua le tele o fesili e mafai ona ia fesiligia.
E te le’i alofa ia te ia? O lana fesili muamua lenei e tatau ona i ai. O la’u tali i ai o le ioe; o le mea lena sa ou faia ai le lisi. Sa matuai ou alofa lava ia te ia, ma sa ou manao e sili atu nai lo se isi lava mea ina ia fiafia o ia. O le lisi sa sili atu ona faatatau i le pe mafai ona ou faafiafiaina o ia nai lo le pe sa ou alofa ia te ia pe leai.
E te lua le’i maua faatasi ni taimi fiafia? Ma, o la’u tali foi i ai o le ioe; o le mafuaaga lena sa ou faia ai le lisi. O se auala e iloa ai pe mafai ona tupu lo’u faamoemoega ia ona maua i taimi uma se taimi fiafia pe a ma faatasi.
Pe e te le’i manatu o ia tonu lea? Atonu o le fesili aupito malie lea o fesili uma. Semanu ou te tali atu ioe; sa ou talitonu o ia “tonu lava lea,” ae sa ou manao ia mautinoa o lo’u talitonuga o le a musuia ai le faatinoga o la’u vaega ina ia tutupu ia mea e pei ona sa tatau ona i ai.
E masalo ou te le’i iloaina lelei i lena taimi le mea na faia e aafiaga o aoaoga a lo’u peresitene o le misiona e uiga i le faatuatua ma ona vaega o le manao, talitonu, ma le faamoemoe i la’u aumoega tumau. Faatasi ai ma se vaaiga manino atu i le aluga o taimi, ou te matuai faafetai ai lava ia Peresitene F. Ray Hawkins mo lana faatosinaga ia te a’u. O loo ia te a’u lava ia faamatalaga sa ou tusia a o avea au ma se faifeautalai e 20 tausaga ina ua tatala e lo’u peresitene talavou o le misiona ia tusitusiga paia ma faamatala mai elemene o le faatuatua lea o le a i ai se aafiaga ia te a’u a o ou faia le filifiliga aupito sili ona taua o lo’u olaga.
Aoaoga a Alema e uiga i le Faatuatua
O mea sa faasoa mai e Peresitene Hawkins e uiga i le faatuatua o aoaoga a Alema i tagata matitiva o sa Sorama. Sa faailoa e Alema le manaomia ona i ai o se faatuatua itiiti, lea sa ia faamatalaina o le manao (tagai i le Alema 32:27). O se manao mo mea ia tupu o se faatosinaga malosi lea mo i tatou e faatino ai laasaga talafeagai e faateleina ai lo tatou faatuatua.
O se vaega lona lua o le faatuatua o le mea sa aoaoina atu e Alema lea e sau mai le manao: talitonu. Sa ia aoaoina sa Sorama ina ia faataga le manao e galue ia i latou seia oo ina latou talitonu i se faiga lea e mafai ona latou faaavanoa o latou loto mo ana upu (tagai i le fuaiupu e 27). O le tuufaatasiga o le manao ma le talitonu e amata ona tupu i totonu o o tatou loto, ma tatou te iloa o se mea lelei. E amata ona faateleina ai o tatou agaga ma faamalamalamaina ai o tatou malamalamaaga. E amata ona avea ma mea suamalie. (Tagai i le fuaiupu e 28.)
O le faamoemoe o le tasi vaega taua lea o le faatuatua. Sa ta’u atu e Alema ia sa Sorama lotomaualalo e faapea, o le faatuatua e le o se malamalama atoatoa lea o mea. Sa o se “faamoemoe mo mea e le vaaia a e moni” (Alema 32:21; faaopoopo le faamamafa). Na faapena foi ona aoaoina e Mamona le faamoemoe o se vaega manaomia o le faatuatua ina ua fai atu ia Moronae, “E mafai faapefea ona outou maua o le faatuatua, vagana ai ua ia te outou le faamoemoe?” (Moronae 7:40). O le faamoemoe e mafai ona faamatalaina o le mafai ona vaai atu i se mea e lelei atu i le lumanai.1 O la’u lisi o la’u auala lea o le vaai atu i le lumanai ma se mata o le faatuatua ma, e pei o Aperaamo, sa filifili sa “i ai se fiafia tele atu ma se filemu” (Aperaamo 1:2) mo a’u i lo’u faaipoipo atu i lo’u toalua.
O le i ai o le vaega o le manao o le faatuatua, sa ou manaomia ai le talitonu ma le faamoemoe e faaatoa ai lo’u faatuatua, sa manaomia lo’u faia o se faatinoga e ala i le talosaga atu ia Rosalie ma te faaipoipo. O le lisi—o la’u faaaliga o le manao, talitonu, ma le faamoemoe—sa taua i le tuuina mai ia te a’u o le lototele e fai ai le faatinoga talafeagai e faaatoa ai lo’u faatuatua. Na aoao mai Iakopo e mate le faatuatua pe a leai se galuega (tagai i le Iakopo 2:17). E leai se tele o le manao, talitonu po o le faamoemoe e ono fesoasoani ia te a’u i le mauaina o le fiafia ma le filemu sili atu ua ou mauaina i le faaipoipoina pe ana le taitaiina atu a’u e na vaega e fai atu le fesili tele. (O le mea e faanoanoa ai, o le taimi muamua sa ou fai i ai ma te faaipoipo, sa tali mai Rosalie e leai, ae o le isi lena tala mo se isi taimi. I tulaga faapena—pe a le ogatasi ia tulaga e tusa ai ma a tatou fuafuaga po o le taimi—e i ai lava se vaega taua e fai a le faatuatua i o tatou olaga.) Sa manaomia ai sina faapalepale ma le onosai mo i ma’ua uma, ma sa iu lava ina ma faaipoipo mulimuli ane i se aso kiona ia Tesema o le 1982.
E taua le faatuatua i mea uma tatou te faia, e aofia ai tafaoga faamasani ma aumoega. O le manao, talitonu, ma le faamoemoe e faapea o loo i ai se fiafiaga ma se filemu sili atu o loo faatalitali mai mo i tatou, e tatau ona faaosofia ai i tatou e faagaoioi e atiina ae ni mafutaga lea e oo atu ai i faaipoipoga. E te manao e mulimuli i le fuafuaga o le fiafia? E te talitonu o le mulimuli i le fuafuaga o le a oo atu ai i le fiafia ma le filemu sili atu? (Talitonu mai pe a ou fai atu ia te oe o le mulimuli i le fuafuaga ma le faaipoipo i le malumalu e oo moni atu ai i le fiafia ma le filemu sili atu.) O e faamoemoe mo se faaipoipoga fiafia? Pe o faatagaina e lou faamoemoe oe e te vaai atu ia te oe lava i se tulaga lelei atu i le lumanai? Afai o au tali i nei fesili o le ioe, ona tatau lea ona e faaatoatoaina lou faatuatua e ala i le fai o le faatinoga. Fai atu i se tagata lua te o e eva faamasani! Talia se valaaulia e o e eva faamasani! Tuu oe lava i ni tulaga e mafai ona taitai atu ai i le feiloai atu i isi talavou matutua e tutusa o outou mafaufau. I se faapuupuuga, ia tulituliloa se ala o le a oo atu ai i le fiafia ma le filemu sili atu.
Faataitaiga a Iosefa Samita o le Faatuatua
Sei o tatou tagai ia Iosefa Samita e fai ma faataitaiga o le faatuatua ma le faaalia o vaega o le manao, talitonu, ma le faamoemoe.
Sa fia iloa e Iosefa le Ekalesia moni a Iesu Keriso. Sa malosi lava lona manao o lea sa taitai atu ai o ia i tusitusiga paia, lea tatou te faitau ai, “Ae afai ua leai se poto i so outou, ina ole atu ia i le Atua” (Iakopo 1:5). Sa mafaufau o ia i lenei mau. Sa manao o ia ia ona maua le poto, ma sa ia talitonu e mafai ona ia mauaina pe afai e ole atu i le Atua. Sa ia faia le mea talafeagai e tasi: sa ia tatalo ma ole atu i le Atua. Ia mafaufau i lenei mea mo sina taimi. Sa i ai ia Iosefa le manao e iloa le upumoni. Sa talitonu o ia i upu a Iakopo. Sa faamoemoe o ia mo se tali. Ae ana faapea e gata ai iina, semanu tatou te le o faapenei i le aso. O le faaaogaina o le faatuatua o lona uiga sa tatau ona alu atu i le vao ma tatalo ai. Ou te talitonu ina ua alu atu Iosefa i le vao e tatalo, sa mafaufau o ia o le a savali ese mai e aunoa ma se tali. Atonu na te le’i manatu e vaai i le Tama Faalelagi ma Iesu Keriso, ae sa ia mafaufau i se tali. O se faataitaiga maoae lava o le faatuatua! Sa i ai lona manao, sa ia talitonu, sa ia faamoemoe, ma sa ia faia le faatinoga.
O le faatuatua o se tamaitiiti e 14-tausaga na suia ai le lalolagi. Ona o le tatalo a Iosefa i le Vao Paia, na matala ai le lagi ma toe fetalai mai le Atua i Lana fanau e ala i se perofeta.
O Se Tasi o Ou Avanoa e Faaali Ai le Faatuatua
O loo faaauau pea ona fetalai mai le Alii e ala i Lana perofeta i aso nei. I le na o se tausaga ma le afa ua mavae, sa saunoa mai ai Peresitene Thomas S. Monson:
“O loo i ai se vaipanoa lea e tatau ona i ai se taimi e mafaufau loloto ai e uiga i se faaipoipoga ma le sailia o se soa e te fia manao e faatasi i ai i le faavavau. Afai e te fili ma le atamai, ma afai e te tautino atu i le manuia o lau faaipoipoga, e leai ma se isi mea o lenei olaga o le a aumaia ia te oe se fiafiaga sili atu.
“Pe a e faaipoipo, o le a e manao e faaipoipo i le Maota o le Alii. Mo outou o loo umiaina le perisitua, e le tatau lava ona i ai se isi filifiliga. Ia faaeteete, ina nei e faaumatiaina lou agavaa e te faaipoipo ai. E mafai ona oulua tausia le lua mafutaga i totonu o tuaoi talafeagai a o oulua maua se taimi fiafia.”2
O lou manao, talitonu, ma le faamoemoe atonu e le faaalia i se lisi, e pei ona sa i ai mo a’u, ae po o le a lava le ala e faaali ai nei uiga, o le a fesoasoani ia te oe e faaatoa lou faatuatua e ala i le mulimuli i le perofeta a le Alii i le sailia o se soa e mafai ona e maua ai le fiafia sili atu. O lou manao, talitonu, ma le faamoemoe o le a fesoasoani foi ia te oe e te filifili ai ma le poto.
O faamanuiaga o le filifili e tulituliloa ma faafailele faaipoipoga e faavaau o le a taitai atu ai i tatou e tofo i fua o le talalelei, lea sa faamatalaina e Alema ua “sili ona pele, … ua sili ona suamalie i luga o mea uma ua suamalie, ma … mama i luga o mea uma ua mama.” Sa ia faaauau, “O le a outou taumamafa fiafia i [nei fua] seia oo lava ina outou maoona, o le a outou le fia aai, pe fia feinu ai” (Alema 32:42). Nai lo le fefe i le lumanai, ia faaaoga le faatuatua lea o le a mafai ai ona e maua folafolaga a le Alii.
Ata na saunia e Ann Higgins
Ata na saunia e Craig Dimond ma Justin John Soderquist