Sauni e Faitau
“Aua ua le foaiina mai e le Atua ia te i tatou le Agaga e mata’u ai; a o le Agaga e faamalosi ai” (2 Timoteo 1:7).
Sa feminoiai solo i luma ma tua Mele i lona nofoa a o faalogologo atu i isi tamaiti o lana vasega Peraimeri o feauauai e faitau mai tusitusiga paia. Sa talotalo o ia ina ia le oo mai lona taimi e faitau ai.
O Mele e i ai se faaletonu i lona aoaoina e ta’u o le dyslexia [tiselesia] po o le faafaigata ona malamalama i le gagana tusitusi. A tilotilo o ia i mataitusi i luga o se itulau, e foliga mai e taufetuli solo ia mataitusi ma sui tulaga e tutu ai. A faitau leotele o ia, o ana upu e lemu lava ma o isi taimi e le fetaui ai. E masani ona ia faitauina ni upu e le o i ai.
O le latalata mai lava o le avanoa e faitau ai Mele, o le faateteleina foi lena o lona fefe. Ina ua oo mai la i lona taimi, sa le mafai e Mele ona toe tatali.
“E tatau ona ou alu i le faletaele,” sa ia fai mai ai ma le faanatinati a o oso ese mai lona nofoa, ma faapea ona salalau ai ana tusitusiga paia i luga o le fola. Sa momoe atu Mele i le auala savali e agai i le faletaele. Sa fiafia o ia ona sa gaogao. Sa tutu o ia i se tulimanu ma amata loa ona tagi.
O ni nai minute mulimuli ane, sa ia faalogo atu ai o valaau mai e Sister Samita lona igoa a o sau o ia i totonu o le faletaele. “Mele, o le a le mea ua tupu?”
Sa le iloa e Mele le tala e fai. Sa matuai ma lava o ia. Sa leai se tasi o isi tamaiti sa i ai lenei faafitauli. “E le mafai ona ou faitau!” sa tagi ai a o sulu lona ulu i lalo o ona lima sa piilima.
“E le mafai ona e faitau?” Sa fesili atu ai Sister Samita, ma lona le malamalama. “Sa ou vaai o e tuuina atu ni lauga i le Peraimeri. Ou te iloa e mafai ona e faitau.”
Sa lulu e Mele lona ulu. “Ou te taulotoina a’u lauga. Ou te faataitaia faafia ina ia ou le taumafai e faitauina i luma o tagata. E le mafai ona ou faitau leotele, ma a o ou faia, e tele ni mea sese ou te faia. Ou te le manao e talie mai isi tamaiti ia te a’u.”
“Auoi, Mele, Talofa e. Ou le a ou le tofia oe e te faitau leotele seiiloga ua ou iloa ua e sauni,” o le tala lea a Sister Samita. “Ma ou te le talitonu o le a ata se isi o le tatou vasega ia te oe. O i latou o au uo.”
“E talie tamaiti o le aoga ia te a’u,” o le musumusu mai lea a Mele.
Sa soloiese e Sister Samita loimata o Mele. “Toe foi mai i le vasega. Vaai la i ai,” o lana tala lea.
Sa la toe savavali faatasi atu i le potuaoga. Sa saofai le uo a Mele o Pesi i le nofoa e sosoo ma Mele, ma faamafolafola itulau felefele o tusitusiga paia a Mele. Sa nofo i lalo Mele, ma sa toe tuu atu i ai e Pesi ana tusitusiga paia ia te ia.
“O ai e manao e sosoo le faitau?” o le fesili lea a Sister Samita.
“O le taimi o Mele,” sa fai mai ai se tamaitiiti o le vasega.
Sa tau musu Mele, ae sa fetilotilofa’i solo o ia i tamaiti o lana vasega ma vaaia ai a latou ataata agalelei. Sa lue mai le ulu o Sister Samita ma ataata foi. Sa fefe Mele, ae sa ia maua lana vaega ma amata lona ona faitau.
Sa lemu le sau o ana upu. Sa i ai ni nai ana mea sese, ae ina ua tau le mautinoa, sa musumusu malie atu Pesi e ta’u le upu sa’o i le taliga o Mele. Sa le’i lelei tele le faitau a Mele e pei o isi tamaiti o lana vasega, ae sa leai se tasi na ata pe taufaalili ia te ia. Ona oo lea i le taimi o le isi tagata, ma alu ai lava le lesona.
A o latou savavali atu i le potu o le Peraimeri ina ua uma le vasega, sa musumusu atu Sister Samita ia Mele e faapea sa matuai mitamita lava ia ia. Sa fiafia Mele sa le’i taumafai e toe nana lona faafitauli o le faitautusi. “O le a faaauau pea ona ou faataitai,” sa ia mafaufau ai. Ma sa ataata o ia, ma le iloa sa i ai ni ana uo lelei i le lotu e lagolagoina o ia i le ala.
Ata na tusia e Apryl Stott