Moomooga o Lo’u Aso Fanau
Angelica Carbonell Digal, Filipaina
Ina ua ou taliaina le talalelei i le 18 o o’u tausaga, sa ou iloaina ua ou tofo i le fua ua sili ona suamalie o fua uma. Sa ou lagonaina le olioli tele, ae sa ou mafaufau i tagata o lo’u aiga, o e sa leiloloa ma se ese. Sa ou lagonaina le faanoanoa tele e na o au le tagata o lo’u aiga e auai i le Ekalesia, ae sa ou le iloa pe faapefea ona ou tatalaina o latou mata ma taliga i le upumoni.
Sa tele ni auala sa ou taumafaia e tauanau ai lo’u aiga ia faalogo i faifeautalai. Ae o le tele o lo’u taumafai, o le tele foi lena o lo latou mumusu.
Sa oo ina ou lotovaivai, o lea sa ou mafaufau ai o le a ou le toe alu i le lotu. Ae sa ou tatalo, sa oo mai i lo’u mafaufau se mau: “Ma a mavae lea ae [e] faafitia a’u, sa sili ona lelei ia te outou pe a na outou le iloaina a’u” (2 Nifae 31:14). Sa atili ai ona ou tatalo malosi, faitau i tusitusiga paia, auai i a’u sauniga a le Ekalesia, ma taulai atu i faamanuiaga i lo’u olaga. O le taunuuga, sa amata ona mou ese le tiga.
A o latalata mai lo’u aso fanau, sa ou lagonaina le musuia o a’u e fai se pati o lo’u aso fanau i lo’u fale ma valaaulia ai a’u uo uma o le Ekalesia, e aofia ai ma faifeautalai faamisiona. Sa ou manao ia maua e lo’u aiga se fegalegaleaiga vavalalata ma tagata o le Ekalesia, o e sa foliga mai ia te a’u o tagata aupito sili ia ona fiafia i le lalolagi. Ia te a’u, o le pati sa pei uma lava o se afiafi faaleaiga.
Ina ua uma lena aso, sa suia mea [i totonu o lo’u aiga]. Sa talia faifeautalai i totonu o lo matou fale ma avea ma ni uo lelei a lo’u aiga. I se tasi aso sa faasilasila mai ai e lo’u tama, ua manao e ta’u mai i lo matou aiga ia faalogo i faifeautalai ma ia o i le lotu. Sa faateia a’u.
O le tolu o tausaga talu ona uma lo’u papatisoga na papatisoina uma ai lo’u aiga. I le sauniga o le papatisoga, sa tuuina atu ai le molimau a lo’u tina, ma sa faafetai atu lo’u tama i faifeautalai. Sa maofa tagata o le uarota i lo latou liua.
Na faapefea ona tupu lena mea? O o’u loimata uma sa maligi ma sini sa ou faatutuina sa faia ai se latou vaega. Ae o le mea sili lava, sa faamaluluina le loto o lo’u tama ona o le alofa ma le faauo o faifeautalai ma tagata o le uarota. Sa avea le au paia atoa ma ni faifeautalai ona o a latou faataitaiga o le ola i le talalelei a Iesu Keriso. Ou te faafetai mo i latou ma mo le fuafuaga a le Tama Faalelagi, lea e mafai ai ona faatasia aiga e faavavau.