Aoaoga Anoa i le Aiga

Saunia e Darren E. Schmidt

O auala e fa tatou te aoao atu ai a tatou fanau i lesona taua o le olaga.

O le faaaogaina o taimi e aoao atu ai le ma fanau e toavalu, sa faigata ma sa tauia. Peitai o le iloa ai “o le aiga o le nofoaga muamua lea ma le sili e aoao ai e fanau lesona o le olaga,”¹ na ma taumafai ai ma lo’u toalua e faia mea uma ma te mafaia e fesoasoani ai i le ma fanau e aoao na lesona. O nai mataupu faavae ia sa fesoasoani ia i ma’ua.

Fai Mea Silisili

Ina ua aofia ai le ma fanau i le tele o gaoioiga, sa oo ina ua faateleina le tatau ai ona faatulaga mea e faamuamua. Na faamanatu mai e Elder Dallin H. Oaks o le Korama a Aposetolo e Toasefululua e faapea “e le faapea a lelei se mea, ona lava ai lea o se mafuaaga e faia ai. … O nisi mea e lelei tele nai lo le lelei, ma o mea na e tatau ona matuai taulai atu i ai le faamuamua i o tatou olaga.” Na ia toe saunoa mai: “E tatau ona gaoioi matua ina ia faasaoina le taimi mo tatalo faaleaiga, suesueina o tusitusiga paia e le aiga, afiafi faaleaiga, ma isi faatasiga taua ma taimi e feiloai taitoatasi ai lea e fusia faatasi ai se aiga ma fesoasoani ai i fanau e faataua mea na e faavavau le aoga. E tatau ona aoao atu e matua mea e faamuamua o le talalelei e ala i mea latou te faia faatasi ma a latou fanau.”²

Ua faamaonia le lelei o lenei fautuaga mo lo matou aiga. Ina ua ma faia ma lo’u toalua ia gaoioiga i fafo atu o le fale, o se mea e mafaufau loloto i ai ma tatalo ai, sa avea nisi o mea sa ma manatu e taua ma ni mea e le talafeauga. Sa sili ona ou ofo ina ua ou fesili i le ma fanau pe fia i ai i se ‘au pasiketipolo ae ou faiaoga ai. O la latou tali o le, “Ailoga,” ma le “Tama, o la e i ai le tatou mama i luma, ma e matou te fia taaalo ai ma oe ma fai ai foi a tatou taaloga ma o tatou tuaoi. E tele ai le taimi matou te maua ai le polo!”

Suesue ma Faatino Tusitusiga Paia

E tele se eseesega i le va o le faitauina o tusitusiga paia ma le suesueina. Na aoao mai e le perofeta anamua o Iosua e faapea, o le faamanuiaina i le suesueina o tusitusiga paia e maua pe a tatou “mafaufau i ai i le ao atoa ma le po” ma le “anaana ina ia faia e tusa ma mea uma ua tusia ai” (Iosua 1:8; faaopoopo le faamamafa). I taimi o a matou suesuega o tusitusiga paia, sa sili ona faamanuiaina pe a ma tuu atu i le fanau le taimi e mafaufau loloto ai i ni fesili patino, ona tuu atu lea ia i latou o se valaaulia e “faia ai e tusa ma mea uma ua tusia ai.”

I se tasi afiafi sa ‘ai a matou sukalati i fafo ma faitau le Tusi a Mamona e uiga i le pau o sa Nifae. Sa uunaia au e fesili i le fanau pe aisea na matua amioleaga ai sa Nifae. Fai mai Celeste e ono ona tausaga, sa manatu o ia ua le toe faia tatalo a sa Nifae ma sa Lamana i aso taitasi. Sa matou ioe uma lava na amata le pau o sa Nifae i le galo ona tatalo ma isi mea laiti naua. I lena taimi, na oo mai se manatu ia te au e valaaulia le fanau e tatalo ma le mafaufau atili ma lagona.

O le aso na sosoo ai sa ou fesili ai i ai pe na faapefea a latou tatalo. O iina na maua ai se avanoa latou te faasoa mai ai o latou aafiaga ma ou maua ai se avanoa e saga faasoa atu ai la’u molimau i le tatalo. E le faapea na faapea le lelei o aafiaga uma o suesuega i tusitusiga paia, ae a fai a matou talanoaga ma valaaulia e faatino e avea o se vaega o la matou suesuega, e sili atu ona anoa ia tusitusiga paia.

Fesoasoani i Tamaiti ia Avea ma o Latou Tiute

Ua ma iloaina le mana tele i le tuuina atu o tofitofiga i le ma fanau ma tuu latou te mafaufauina le faiga mo i latou lava. A ma faaaofiaina le ma fanau e faia nisi o faaiuga faaleaiga, e sili atu la latou faatinoga. Latou te atiina ae foi se lagona o i latou e ona, ma o latou foi e tali atu, ma ua latou aoao ai e “faia mea e tele i lo latou lava loto malie, ma faataunuuina ai le amiotonu tele” (MF&F 58:27). O nai mea nei ua fesoasoani i le ma fanau ia atili ai ona avea ma o latou tiute:

Mo afiafi faaleaiga, fesoasoani ia i latou e saunia se lesona, mau, po o se taleni e filifilia lava e i latou.
Tuu atu ia i latou e filifili se viiga mo tagata uma e pepese ai i le taimi e suesue ai faaleaiga ia tusitusiga paia, ona valaaulia lea o se tamaitiiti e faia le tatalo.
Tuu atu ia i latou e fesoasoani e fuafua ma avea ma tiute se vaega o se malaga faaleaiga.
Fai se fonotaga faaleaiga ma i latou e uiga i mataupu tautupe ma tuu i ai latou te fesoasoani i le faiga o faaiuga e uiga i faatauga.
Aoao i latou i le faiga o se galuega patino, ma tuu i ai latou te vaaia lena galuega mo se vaiaso.
Fai se galuega fesoasoani faaleaiga i masina taitasi, ma tuu latou te filifili po o ai le aiga e fesoasoani i ai.
Feauaua’i i latou e piki se tagata e asiasi i ai i se Aso Sa.
Tuu latou te pikiina se gaoioiga faaleaiga mo se afiafi faapitoa o le masina.

Taiala i Latou

Sa i ai taimi ma te manatu ai ma lo’u toalua ma te faamalosia le ma fanau mo tatalo po o le suesueina o tusitusiga paia. Ae o isi taimi, sa ma lagonaina ai se agaga matagofie e maua mai a o ma taialaina moni ma tausia si a ma’ua lafu laiti. A ma le faaeteete, e faigofie lava ona ma le mauaina nei taimi e taialaina ai.

O se tasi o na taimi na oo mai, a o ou faataootoina la’u fanau i o latou moega o le a momoe. Sa fesili mai se tasi o o’u atalii, “Papa, o le a se mea e faaosoosoina ai oe?”

Sa ou te’i i le fesili.

Ona ia fai mai lea, “Sa matou talanoa i mea e faaosoosoina ai i matou, ma sa matou taumanatunatu pe o a ni mea e faaosoosoina ai oe.”

Sa ou iloa o se taimi lelei tele lenei e aoao ai i latou, ae sa ou matua vaivai mai se aso umi sa faigaluega ai. Sa ou lei manatu e faia se talanoaga loloto ma atalii e toalua i le tuneva o le po, aemaise o le po o le aso a’oga.

Peitai, na oo mai i lo’u mafaufau le tala i le Faaola i le vaieli. E ui lava ina sa savali i le 30 maila (48 km) pe sili atu foi, ae sa Ia faaavanoaina lava se taimi e aoao ai le fafine Samaria (tagai i le Ioane 4). Sa tonu ia te au atonu o se tasi lea o na taimi i le “vaieli”, o lea sa ou nofo ifo ai i lalo ma fesili pe la te manatu o se agasala pe a tofotofoina. Sa umi se taimi o leai se tala, ona amata lea ona matou talanoa ma faalogo le tasi i le isi. Sa ou aoaoina i la’ua i le fetaia’iga a le Faaola ma Satani (tagai i le Mataio 4) ma tuuina atu la’u molimau i faamanuiaga e maua mai le teenaina o faaosoosoga.

O se tasi o na taimi faapitoa i le avea ai o se matua. Sa fai si tuai ona matou momoe, ae o le olioli na ou oo i ai sa sili atu ona tauaogaina ai le ositaulagaina o le moe.

“O se tasi o o tatou avanoa faanatinati e tali atu ai i se tamaitiiti, o le taimi e fesili naunau mai ai, manatua latou te le fesili i taimi uma, e le aoao gofie i taimi uma, e le faalogo foi i taimi uma,” na aoao mai e Elder Richard L. Evans (1906–71) o le Korama a Aposetolo e Toasefululua. “Ma e tele taimi e tatau ai ona tatou tali atu ia i latou i o latou tulaga, i o latou taimi, ae le faapea o taimi uma i o tatou tulaga, ma o tatou taimi. … Afai latou te iloa e mafai ona latou faatuatuaina i tatou i nai a latou fesili laiti, e mafai ona latou faatuatuaina i tatou i a latou fesili e sili atu ona ogaoga i se taimi mulimuli ane.”³

Filifilia ma Lagolagoina e le Alii

O le tiutetauave o le vaavaaia o le fanau a le Atua e mamafa. Soo se taimi lava ou te lagonaina ai lo’u le agavaa o se matua, ou te faamanatuina lava ia te au se mea na saunoa i ai Elder Neal A. Maxwell (1926–2004) o le Korama a Aposetolo e Toasefululua: “O le Atua lava e tasi na tuuina le fetu i se siosiomaga patino i le afe tausaga a o lei alia’e mai i Peteleema i le faamanatuga o le soifua mai o le Pepe, ua tuuina mai ai le gauai lava e tasi i le faatulagaga o i tatou taitoatasi i siosiomaga o tagata ina ia mafai ai, pe afai o le a mafai, ona tatou malamalama i o tatou olaga taitoatasi, ina ia le gata e taitaiina ai isi e lo tatou malamalama, ae faamafanafanaina ai foi i latou.”⁴

E faagaeetiaina lava au i lenei saunoaga, pe a ou lotovaivai. E maua ai e i ma’ua ma lo’u toalua le lototele i o ma’ua gafatia o ni matua, i le iloa ai ua tuuina le ma fanau i totonu o lo ma’ua “siosiomaga” mo se mafuaaga ma ua talitonuina i ma’ua e le Tama Faalelagi.

Ia faamanuia e Ia lo outou aiga a o outou aoaoina faatasi le talalelei, fesoasoani i lau fanau ia avea o se tiutetauave, ma faaaoga na taimi taua e aoao atu ai.

O Le Mamoe na Leiloa, saunia e Del Parson