Piko [Pickles], Tunipa, ma le Molimau Musumusuga mai le Soifuaga ma Aoaoga a Lorenzo Snow
A o outou suesueina aoaoga a Peresitene Lorenzo Snow i lenei tausaga, o le a outou iloa ai o ia o se perofeta, tagatavaai ma se talifaaaliga ua matua talafeagai lelei ana fautuaga ma le taimi nei.
Afai ua e vaai i se ata o Lorenzo Snow, le Peresitene lona lima o Le Ekalesia a Iesu Keriso o le Au Paia o Aso e Gata Ai, atonu e te manatua lana soesa uumi ma ona foliga agalelei. Ma afai e te nofo mo ni nai minute ma vailiili lelei lena ata, atonu e tosina atu oe i fofoga [mata] o Peresitene Snow—ua lē lava ae lē vaivai, ua afu le soifua ae tumu i le malamalama ma le malosi.
Atonu na outou faalogo na musuia Peresitene Snow e talai atu e uiga i le sefuluai, atonu foi tou te manatua le faitau i se mea e uiga i se aafiaga paia sa ia maua i le Malumalu i Sate Leki.
Ae tou te silafia le mea na tau atu ai i lena aafiaga i le malumalu ma le mea na tulai mai ai? Pe tou te fia iloa le tala e uiga i le faaaliga na ia mauaina e uiga i le tulafono o le sefuluai?
Ae o le a se tala i ona fofoga ma ona foliga? Ina ua maea se fonotaga ma Peresitene Snow, sa tusia e se faifeau o se isi faatuatuaga: “O lona foliga o se mana o le filemu; o lona faatasi ai o se tatalo mo le filemu. I le filemu loloto o ona mata, sa le gata o le ‘nofoaga o le tatalo le leoa’, ae o le apitaga o le malosi faaleagaga. … ma le lagona ese na segia ai a’u, faapea sa ou ‘tu i luga o nofoaga paia.’”1 Pe e te fia iloa e uiga i mea uiga ese, o tofotofoga, o manumalo, faanoanoaga, olioliga, ma faaaliga na tuufaatasia e fatufatu ai na ituaiga o foliga?
O le tausaga nei, o le a aoaoina ai e tuafafine o le Aualofa ma i latou e umia le Perisitua Mekisateko ia Aoaoga a Peresitene o le Ekalesia: Lorenzo Snow. A o outou aoao mai i aoaoga a Peresitene Snow ma talanoaina i le lotu ma le fale, o le a outou iloa ai o ia e sili atu i lo na o se alii foliga agalelei i se atavali ua leva. O le a outou iloa ai o ia o se tagata o le Atua—o se perofeta, tagatavaai, ma se talifaaaliga ua matua talafeagai lelei lava ana fautuaga ma le taimi nei.
Tau lava ina faaosofia lou naunau, o nai faataitaiga nei o aoaoga ma tala o le a e mauaina i suesuega o lenei tausaga. I parakalafa nei, o numera o mataupu ma itulau e faasino i Aoaoga a Peresitene o le Ekalesia: Lorenzo Snow.
Atonu e te manatua se saunoaga manaia i le konafesi aoao lea na faatusa ai e Elder David A. Bednar o le Korama a Aposetolo e Toasefululua le faagasologa o le liua i le faagasologa o le tuuvinekaina o se kukama.2 O Elder Bednar e le o se Aposetolo muamua lea ua faia lenei faatusatusaga. Na faamatala mai e Peresitene Snow se silafia faapena i le 150 tausaga na muamua atu:
“Ia tuu se kukama i totonu o se paelo vineka ma o le a e iloa ai e itiiti se aafiaga e tulai mai i le itula muamua, e faapea foi i le 12 itula muamua. Toe vaavaai i ai, ma o le a e iloaina, o le mea ua tupu ua na o le pa’u ua aafia, aua e manaomia se taimi umi e faasaoina ai meaai e le vineka. O se tagata ua papatisoina i le ekalesia ua i ai se aafiaga ia te ia, ae le o le aafiaga e faasaoina ai loa lava o ia. E le faatuina ai le tulafono o le aia tatau ma le tiute mo ia i le 12 po o le 24 itula muamua; e ao ona ia tumau i le ekalesia, e pei o le kukama i totonu o le vineka, seia mafai ona faatumuina o ia e le agaga sa’o.”3
Pe a talanoa mai Peresitene Snow e uiga i le liua, e na te talanoa mai mai aafiaga. E masani lava ona ia faamatalaina ni mea se lua na tutupu—e tasi na tupu ae e le i auai i le Ekalesia ma le tasi na tupu ina ua faatoa uma lona papatisoga ma le faamauga—lea na fesoasoani ia te ia e “faatumuina e le agaga sa’o.” E mafai ona faitau i tala o nei aafiaga i itulau e 1, 3, 59, ma le 61–62.
“Aisea e valaauina ai [se] alii e galue o se peresitene o se nuu?” Sa fesili Peresitene Snow i se tasi taimi. “Pe ina ia maua ai se malosiaga, ona faaaogaina lea o lena malosiaga mo lona lava viiga? E leai, ae i le isi itu, ua valaauina o ia e galue i se tofiga lea e ogatasi ma le aoaoga faavae, lea e pei ona sa faia e le Alo o le Atua ina ua tuuina atu le perisitua ia te Ia, e tatau ai ona Ia faia osigataulaga. Mo ia lava? E leai, ae mo le manuia o tagata lea ua ia pulefaamalumalu ai. … Ia avea ma auauna mo ona uso, e le o lo latou matai, ae ia galue mo lo latou lelei ma le manuia.”4
I le avea ai ma se taitai o leEkalesia, sa faataitai e Peresitene Snow lenei mataupu faavae, ma o nisi taimi na te maua ai ni auala fatu e faia ai. Mo se faataitaiga, na ia faaaogaina ai i se tasi taimi ni tunipa, ie moega, ma lauvao e siitia ai agaga o se vaega pagatia o le Au Paia. O loo maua lenei tala i le mataupu e 7. Ina ia faitau i nisi o ana aoaoga e uiga i le taitaiga o le Ekalesia, tagai i le mataupu e 18.
O Peresitene Snow o se taitai mamana, fatufatua’i, ma mataalia aua sa ia silafiaina le Taitai moni. Sa ia aoao mai, “O le galuega tele ua faataunuuina nei—le faapotopotoina o tagata mai malo o le lalolagi, e le’i tupu mai i se mafaufau o soo se tagata, po o se vaega o tagata; ae na tupuga mai i le Alii Silisili Ese.”5 I le tali atu i se faapotopotoga o tagata o le Ekalesia sa faamamaluina o ia i lona aso soifua lona 85, na ia saunoa ai, “Ou te lagonaina faapea, o le a lava se mea ua ou ausiaina, e le faapea ona o Lorenzo Snow, ma mea na tutupu na aumaia ai a’u i lenei tofiga o le avea ma Peresitene o le Ekalesia, —e le o Lorenzo Snow, ae o le Alii na faia.”6
Sa ia aoao atu lenei upumoni i lana auaunaga atoa, peitai na faamanatu atu ia te ia i se ala paia ma le patino ae le o toe mamao ona avea lea ma Peresitene o le Ekalesia. Sa avea o ia ma Aposetolo sinia i le Ekalesia ina ua maliu Peresitene Uilifoti Uitilafi i le aso 2 Setema, 1898. I lona manatu ifo o ia lava e le agavaa e tauave lenei tiutetauave, sa alu ai na o ia i se potu i le Malumalu i Sate Leki e tatalo ai. Sa ia augani atu mo se taitaiga ae sa ia lei mauaina se tali i lana tatalo, o lea ina ua mavae sina taimi, sa ia tuua le potu ma ulu atu ai i se faapaologa lautele. O iina na oo mai ai le tali. Sa tu atu le Faaola toetu i ona luma, pe tusa ma le tolu futu (1 m) i luga a’e o le fola, ma ta’u atu ai ia te ia e alu ma taitai le Ekalesia. Ina ia iloa atili e uiga i lenei aafiaga, tagai i le mataupu e 20.
Ua lauiloa Peresitene Snow i le taliaina o se faaaliga e uiga i le tulafono o le sefuluai. Mo tagata o le Ekalesia i le 1899, na amata lenei faaaliga i se tautinoga lototoa: “Ua oo mai le taimi mo tagata taitasi o le Au Paia o Aso e Gata Ai, o e ua fuafua e saunia mo le lumanai ma tutu malosi i luga o se faavae tatau, e faia le finagalo o le Alii ma totogia ma le atoatoa lana sefuluai. O le afioga lena a le Alii mo outou.”7
Sa tali atu ma le faatuatua le Au Paia o Aso e Gata Ai i le fautuaga a lo latou perofeta, ma o le taunuuga sa faamanuiaina i latou e le Alii e le gata i tagata taitoatasi ae o se faalapotopotoga foi. O loo faaauau pea le uunaiga o lena faaaliga i ona po nei, a o mauaina e tagata o le Ekalesia i le lalolagi atoa ia faamanuiaga faaletino ma faaleagaga i le lalolagi atoa e ala i le usiusitai i le tulafono o le sefuluai. Ina ia faitau e uiga i le aafiaga na afua ai lenei faaaliga ma faamanuiaga na mulimuli mai ai, tagai i le mataupu e 12.
E faapei foi o perofeta uma, na tuuina mai e Peresitene Snow se molimau mamana e uiga ia Iesu Keriso. “Tatou te faalagolago uma lava ia Iesu Keriso, i lona afio mai i le lalolagi e tatala le auala lea e mafai ai ona faamausali le filemu, fiafia, ma le faaeaga. Ma a na ia le faia nei taumafaiga, semanu e le mafai lava ona tatou maua nei faamanuiaga ma avanoa ia ua faamautu mai ia i tatou i le talalelei.”8 Na ia molimau mai e uiga i le soifua mai o le Faaola, o Lana auaunaga i la le tino, Togiola, o Lona auai patino i Lana Ekalesia toefuataiina, ma le Afio Mai Faalua. Mo nisi tala e uiga i le molimau ia Iesu Keriso, tagai i le mataupu e 24.
E moni, o lenei tusiga puupuu e mafai ona e maua ai na o se tofo i le soifuaga ma le auaunaga a Peresitene Snow. I lau suesuega o Aoaoga a Peresitene o le Ekalesia: Lorenzo Snow, o le a e maua ai le tele o isi tala musuia, e aofia ai tala o lona uluai avanoa faafaiaoga a o avea o se faifeautalai, o lona matuai ofo tele i le valaauina i le Korama a Aposetolo e Toasefululua, o ona lagona i le taimi na i ai i luga o le Vasa Atelani i se afa matautia, ma isi taimi e fa na laveaiina ai tagata (e aofia ai ma Lorenzo Snow lava ia) mai le oti, i le mana o le perisitua. E tele mea e mafai ona e aoaoina mai i ana aoaoga e uiga i ni mataupu eseese, e aofia ai le lotogatasi, lotomaulalo, feagaiga, galuega i le malumalu, sootaga faaleaiga, taumafai ia atoatoa, perisitua, Aualofa, ma le olioli i le faasoaina atu o le talalelei.
Afai e te faaaluina se taimi e faitau ai ma manatunatu loloto i tala ma aoaoga o loo ta’ua i lenei tusiga—pe ua e fuafua foi o le a e faitauina i se taimi lata mai—e mafai ona faamautinoaina oe o le a fiafia Peresitene Snow i au taumafaiga. O ia o se tagata na aoao i lona olaga atoa, ma sa ia aoao mai e tatau ona tatou “faaaogaina e i tatou lava” ina ia mafai ai ona “agaigai i luma [lo tatou iloa] i mataupu faavae o le upumoni” ma “faateleina le malamalama faalelagi.”9 Sa ia fautua malosi mai, “O aso mulimuli taitasi, po o vaiaso faaiu, e tatau ona avea ma taimi sili e mafai ona tatou mauaina, o lona uiga, e tatau ona tatou agai teisi atu i luma i aso uma, i le malamalama ma le poto, ma, i le agavaa e ausia ai le lelei.”10
Ia faatamaoaigaina lou soifua i lenei tausaga e ala i lou suesueina o Aoaoga a Peresitene o le Ekalesia: Lorenzo Snow. A o e suesue, e mafai ona e maua se aafiaga e pei foi o lena faifeau lelei na feiloai fesagai ma Peresitene Snow. O le vaai i luga atu o na foliga agalelei ma na fofoga toafilemu, e mafai ai ona e lagonaina o loo e tu i luga o se nofoaga paia—e le faapea e te silafia Lorenzo Snow, ae ona ua e latalata atili atu i lou Tama Faalelagi ma Iesu Keriso, lea na avea ai o ia ma molimau.
Sa folafola atu e Peresitene Snow e faapea, o le totogi o le sefuluai e maua mai ai faamanuiaga. Sa masani ona taliaina sefuluai i ofisa e pei o lea e faaali atu i i (Aai o Sate Leki, 1880). Tauagavale: I tapenapenaga e talimalo i ni uo, sa faia ai e Peresitene Snow ni tuugalamepa mai tunipa e faamalamalama ai lona fale ogalaau.
Sa i ai se aafiaga paia o Lorenzo Snow na vaaia ai le Alii toetu i le Malumalu o Sate Leki.
Tauagavale: tua atu © Artbeats; ata na saunia e John Willard Clawson © IRI; taumatau: ata na pueina e Robert Casey
Mai le tauagavale: ata na saunia e Brian Call; ata na pueina e Robert Casey; ata mai le faaaloaloga a le Faletusi o le Talafaasolopito o le Ekalesia
Ata mai le faaaloaloga a le Faletusi o le Talafaasolopito o le Ekalesia; faamatalaga mai O Le Afio Mai Faalua, saunia e Grant Romney Clawson © IRI