Tatou te Talanoa ia Keriso
Ua Lava le Atoatoa
E mafai faapefea ona ou suia napekini, saunia se meaai o le afiafi, pe faanānā la’u fanau ae na o le tasi le lima?
Ina ua 17 o’u tausaga, sa mutu le tele o lo’u lima agavale i se faalavelave tau taavale. O lenei aafiaga na suia ai lo’u olaga atoa. E ui sa i ai aso faigata ma taimi lu’itauina, ae o lenei afi faamama na ou maua ai le avanoa e molimauina ai le mana o le Togiola i se ala e tulaga ese.
O lo’u olaga atoa i le taimi nei ua faatatau i le avea o a’u o se ava ma se tina, o ni matafaioi se lua ua ou matua fiafia tele i ai. A o lei fananau mai la’u fanau, sa ou taumanatunatu i lo’u agavaa e avea o se tina. E mafai faapefea ona ou suia napekini, saunia se meaai o le afiafi, pe faanānā la’u fanau ae na o le tasi lo’u lima? I le sefululima tausaga mulimuli ane, sa ou i ai i le totonugalemu o lo’u tulaga faatina ma se fanau lelei e toalima. Sa lelei ona ou fetuuna’ia, ma sa toetoe lava ina le matauina e la’u fanau se eseesega o a’u mai i isi tina. Ua le toe avea le leai o le isi o’u lima o se papupuni ae o se faailoga o le alofa. O se punavai o le mafanafana e mau ai la’u fanau pe a fetagisi pe fia momoe i le po. Atonu e tele ni mea e faasino i ai, ae ou te vaai i ai o se faamaoniga o le mafai e le Alii ona fatuina se mea lelei mai se mea matautia.
E le mafai ona ou faamatalaina le suamalie ou te lagonaina i le mafai e lena vaega o a’u ona aumaia se mafanafana faapena i la’u fanau. O le tulaga faatina ua aumaia ai se vaaiga taua i lo’u tulaga tapulaa faaletino, ma ua ou lagona ai ua amata ona faamaloloina au e le Togiola.
O tiute i aso taitasi o le tulaga faatina, o nisi taimi e faigata. O taimi faigata ou te maua ai le mafuaaga e manatunatu ai i le moni o le Toetu ma le gafatia e le Faaola ona faamalolo a’u. O le mea lea, o faataitaiga o le faamalologa e siitia ai le faatuatua o loo maua i tusitusiga paia, e i ai lona uiga faapitoa ia te au. O se tasi o faataitaiga ou te fiafia i ai, o le taimi lea na asiasi ai le Faaola i Amerika ma faamalolo i e mama’i. Na ou mafaufau pe faape’ī pe ana o a’u o se tasi o i latou sa faamaloloina e le Faaola. E amata le tala i Lana valaaulia alofa:
“E i ai ea ni isi o ia te outou ua mamai? Ia aumai i latou iinei. … E i ai ea ni isi o outou ua pipili, pe ua tauaso, pe ua setu, pe ua manua, … pe ua puapuagatia i soo se ala? Ia aumai i latou iinei ma o le a ou faamaloloina i latou, ona ua ou agaalofa tele ia te outou; ua tumu lou loto i le alofa mutimutivale. …
“… Aua ua ou iloa ua lava lo outou faatuatua ou te faamaloloina ai outou.
“… Ma sa oo ina ua uma ona fetalai mai o ia faapea, sa o atu faatasi uma le motu o tagata, ma o latou tagata mamai ma o latou tagata puapuagatia, ma o latou pipili, ma o latou tauaso, ma o latou gugu, ma i latou uma o e na puapuagatia i soo se ala; ma sa ia faamaloloina i latou uma taitoatasi” (3 Nifae 17:7–9).
Ia te au lava ia, o se tasi lenei o mea aupito ootia o loo faamatala mai i tusitusiga paia. Peitai ua suia la’u vaaiga ina ua ou faatauaina lo’u tulaga faatina ma lo’u lima e tasi. Sa ou mafaufau i se tasi taimi, o a’u o se tasi o tagata ua sili ona sagisagi atu i le Toetu ma le manatu o le a faaatoatoaina ai. Peitai, ou te le o toe popole i ai. Ae ua faateleina lo’u lagona ua aoga le Togiola i lo’u olaga i le taimi nei. Ua ou iloa e le tau amatalia le mana faamalolo pe a tulai mai le Toetu. O lea lava ua amata le atoatoa pe a, uuina ma le le gaoia, i po uma, e se tasi o la’u fanau le toega o lo’u lima ma faagaugau ifo ai. Ua tutusa lava le ‘anoa o lenei iloa ia te a’u e faapei o soo se vavega o le faamalologa. Ua tonu ia te au e faapea, mo le taimi nei, ua ou atoatoa lava e pei ona ou manaomia ai.
I luga: ata na pueina e Robert Casey