Tamaitai Talavou ma le Faaiuga e Faamisiona
O le auala na faaaoga ai e nei tamaitai talavou matutua le fautuaga faaperofeta e tusa ai ma le auaunaga faafaifeautalai faamisiona.
I le konafesi aoao o Oketopa 2012, na faasilasila mai ai e Peresitene Thomas S. Monson e faapea “o tamaitai talavou e gafatia, ma agavaa ma ua i ai le manao e faamisiona, e mafai ona fautuaina atu mo le galuega faafaifeautalai e amata i le 19 tausaga, nai lo le 21.” Sa ia faapea mai e ui o tamaitai talavou “e le o i lalo o le poloaiga e tasi e auauna atu e pei o alii talavou,” ae latou te “faia se saofaga taua o ni faifeautalai, ma e matou te talisapaia la latou auaunaga.”1
E faapefea ona filifili se tuafafine pe auauna atu? O tala nei o loo faasoa mai ai ni auala sa taialaina ai e le Agaga ni tuafafine i le filifiliina po o le a le ala sa sa’o mo i latou.
O Le Sooga o Loo Misi
Pe a fesili mai se tasi ia te au a o ou laitiiti pe ou te alu i se misiona, ou te fai i ai e leai. Sa faamalūlūina lou loto i lena manatu a o faasolo ina ou matua, o se vaega o lea mea ona sa ou vaaia ou tei matutua o auauna atu. Ae sa ou le manatu mamafa pea lava i ai o se mea o le a ou faia.
Ina ua atoa lou 21, sa amata ona ou mafaufau pe tatau ona ou alu i se misiona, ae sa ou le tatalo faamaoni e uiga i ai. A o faagasolo pea le taimi, sa amata ona ou lagonaina se mea o loo misi. Sa ou tau atu i lou tina ou lagona, ma sa ia fautua mai ia ou toe mafaufau i se misiona. Sa ia fai mai a o pei lona matua o au, sa ia lagonaina foi lagona lava ia e tasi o loo ou lagonaina. O le auauna atu i se misiona o le tali lena mo ia, atonu foi la o le tali lea mo au.
Sa ou fefe ou te tatalo e uiga i se misiona. Se tasi mafuaaga sa ou le mafaufauina ai lava se misiona muamua ona sa ou manatu e le lava sou malosi e faia ai. le a ou tuua ou tulaga mafanafana ma masalo e aoao se gagana fou. Ao le isi, ou te lei manatu sa lava lelei sou iloa o le talalelei e aoao atu. A o ou tatalo faatasi ma le faamoemoega, sa ou lagonaina le mou ese atu o lou fefe. O le tali sa ou mauaina sa matua mamana lava: e alofa le Alii ia te au, ma sa Ia finagalo ou te auauna atu i se misiona.
Sa ou maofa i le talitonuga sa ou lagonaina ina ua ou mauaina la’u tali. Sa ou le toe lagonaina se popole po o le le agavaa. Ae sa ou fiafia e faasoa atu le talalelei, ma sa amata loa ona ou galue i au pepa o le misiona. Sa mulimuli ane valaauina au i le Misiona a le Lotoa o le Malumalu i le Aai o Sate Leki Iuta.
Rebecca Keller Monson
O Se Olaga Faafaifeautalai
Ina ua 17 ou tausaga, sa amata ona tuufesili mai tagata ia te au pe o le a ou auauna atu i se misiona. Ou te lei filifili lava i ai, o lea sa ou aloese ai lava mai le tali sao atu ia i latou.
Ae a o latalata mai lo’u aso fanau lona 21, sa amata ona ou mafaufau i ai. Sa ou faitau lou faamanuiaga faapeteriaka, talanoa i ou matua, ma tatalo.
Sa oo mai le manao; sa ou le lagonaina lava na manaomia ona ou auauna atu. Sa ou mafaufau i le fautuaga a Peresitene Gordon B. Hinckley (1910–2008), lea na saunoa mai e ui e taliaina faifeautalai tamaitai, ae “e le o faamalosia i latou e o i ni misiona.”2 Sa faamanatu mai foi ia te au le fetalaiga a le Alii i le Mataupu Faavae ma Feagaiga: “Afai ua ia te outou le manao e auauna atu i le Atua, ua valaaulia outou i le galuega” (4:3).
Sa fesoasoani lena mau ia te au e filifili ai e aua nei auauna atu i se misiona. Ina ua ou tau atu i le Alii i le tatalo e uiga i lau faaiuga, sa ou lagonaina le filemu ma se faamautinoaga o loo i ai foi nisi ala e mafai ona avea ai au ma se faifeautalai e aunoa ma se auaunaga faamisiona. Talu mai lena taimi ua ou iloa ai lava e mafai ona ou faasoa atu lau molimau i le tele o ala—e auala i se talanoaga e uiga i le alofa mutimutivale agamalu o le Alii, i taimi e fai ai asiasiga faalefaiaoga asiasi, po o le faia o galuega o talafaasolopito o aiga ma malumalu. Ua ou tuuto atu au lava ia i le galuega faafaifeautalai e ala i le taumafai e ola i le talalelei ma mulimuli i musumusuga a le Agaga.
Amy Simon
Ia Lototele
I le amataga o le 2010, sa ou tauivi ma nisi o tofotofoga ma sa ou savalivali ai e faasaoloto lou mafaufau. A o ou savalivali, sa ou lagonaina le musumusu mai o le Agaga e le tatau ona ou popole i le tuanai; ae, e tatau ona ou mafaufau i lou lumanai. A o amata ona ou iloiloina lau sini o le faamaeaina o le aoga, sa uunaia au e mafaufau e uiga i le auauna atu i se misiona. Ou te lei mafaufau muamua lava i se misiona, ae a o tāa’ina atu i le manatu, sa faapena foi se fiafiaga ma se manao e auauna atu. Peitai, sa ou filifili ou te fia manao i sina taimi e mafaufau ai i se faaiuga tele faapea.
O isi masina na sosoo ai sa faatumulia i uunaiga e auauna atu i se misiona. A o ou lagonaina pea lena lava manao ma le fiafia i taimi sa oo mai ai uunaiga, sa faapena foi ona oo mai ai ma masalosaloga ma le fefe. Sa ou iloaina e uunaia tamaitai e auauna atu pe afai latou te mananao i ai ae e le faamalosia e fai. I le taimi lea, sa ou maua ai ni faamanuiaga faaleperisitua na tau mai ai ia te au o le a fiafia le Alii e tusa lava po o le a le mea ou te filifilia.
I le taumafanafana na sosoo ai sa ma potu faatasi ai ma se uo ua maea lana misiona. Sa ia fai mai sa ia lagonaina foi le fefe a o lei faia lana faaiuga e oo foi ina ua ia filifili e faamisiona. Sa ia fesoasoani mai ia te au e malamalama e le fetalai mai le Agaga e ala i le masalosalo ma le fefe (tagai 2 Timoteo 1:7). A o ma talanoa, na pai mai le Agaga ia te au. Sa ou toe foi atu i lou potu ma faitau se tusi mai se uo sa auauna atu i se misiona. Sa uunaia au e le tusi e faitau le Iosua1:9, ma sa ou lagonaina le uunaiga a le Agaga ia te au e toe sue i ai.
Na tuia e upu lou agaga: “Ia e faamalosi ma lototele; aua e te fefe, aua e te matau: aua o Ieova lou Atua o loo ia te oe i mea uma e te alu i ai.” Sa ou lagonaina e pei o loo fetalai tuusao mai le Alii ia te au. Sa ou iloaina e mafai ona ou auauna atu i se misiona. Sa le manaomia ona ou fefe—Na tuia e upu lou agaga: “Ia e faamalosi ma lototele; aua e te fefe, aua e te matau: aua o Ieova lou Atua o loo ia te oe i mea uma e te alu i ai.” Sa ou lagonaina e pei o loo fetalai tuusao mai le Alii ia te au. Sa ou iloaina e mafai ona ou auauna atu i se misiona. Sa le manaomia ona ou fefe.
E tasi le masina mulimuli ane sa maua ai lou valaauga i le Misiona a Filipaina Iloilo, lea na avea ai le Iosua 1:9 ma autu a le misiona.
Kristen Nicole Danner
O Se Misiona Ese
Sa ou fuafua i lou olaga atoa e auauna atu faamisiona. Ae ina ua ou alu i le Iunivesite o Polika Iaga (Iuta, ISA), sa amata ona ou popole. E mafai faapefea ona ou iloa pe tatau moni ona ou auauna atu i se misiona? Sa alu le tausaga a o lumanai lou aso fanau lona 21 i le aioi atu i le Tama Faalelagi e tau mai ia te au pe tatau ona ou auauna atu. Ona saunoa lea o se tasi o au polofesa o mataupu faalelotu i se mea na suia ai lou olaga: “E le mafai ona taialaina e le Alii lou olaga pe afai e leai sau galuega o faia.” Sa ou filifili e galue.
Sa auina atu ou pepa, maua lou valaauga, faatau lavalava faifeautalai, ma tietie atu i le fale mai Iuta i Carolina Matu—o nei mea uma ona o le saunia mo lau misiona faatasi ma le tatalo faatauanau, suesue, ma le anapogi.
Ina ua ou foi atu i le fale i Carolina Matu, sa lele atu se alii talavou sa ma feiloai i le aoga e asi au, ma sa ma talanoa moni e uiga i le ma mafutaga.
Sa toe oo foi ina matuai tatalo atu ma le faatauanau ma le augani, ae sa faaauau pea ona ou lagonaina le faatuatuaina o au e le Alii e faia au lava faaiuga. Sa ou lagonaina le mamafa o le tiutetauave ae faapena foi le faamautinoaga matagofie lea pe afai ou te filifili i le faatuatua, o le a lagolagoina lava e le Alii lau faaiuga.
Toe sefulu aso ou tuua loa [mo le misiona], ae talosaga mai lau uo e fia faaipoipo ia te au. Sa toe tolopo lau misiona ia ou maua ai se taimi e mafaufau ai. Ina ua ou filifili e faamau ia te ia, sa faamautu mai e le Agaga ia i maua ma la’u manamea o le mea sao lea.
E ui ou te lei auauna atu faamisiona, ae o le saunia mo se misiona na suia ai lou olaga. O le faalatalata atu i le Alii na fesoasoani ia te au e avea ma tagata na finagalo o Ia e avea ai au mo lau misiona o se ava ma se tina.
Cassie Randall
O Aafiaga o se Olaga Atoa
Sa faamanuiaina au i se molimau malosi ma le alofa mo le talalelei a o talavou, ae ou te le manatua se taimi se tasi na manino mai ai lou iloaina o le auauna atu i se misiona sa sao. Sa ou iloa lava i taimi uma o le a ou alu. Sa ou vave faatu se sini e ola i se ala o le a ou agavaa ai e auauna atu i se misiona.
Ina ua ou amata ona saunia lau talosaga mo se misiona, sa ou anapogi, tatalo, ma auai i le malumalu. A o ma galulue ai ma lou epikopo, sa faaauau ona ou lagonaina le filemu lea na ou lagonaina i lou olaga atoa e uiga i le auauna atu i se misiona.
Sa faigata le faagasologa i nisi taimi: sa foliga mai na faafuasei lava ona taugata tele le olaga, ma faasolo ina faigata tele le aoga ma le galuega. Sa ou alu i se kolisi na mamao ese mai lou aiga, ma sa foliga mai e pei o le a faaipoipo uma au uo. Sa taufaamatau le iloaina o tagata sa ou popole i ai o loo faaauau pea ona suia a o ou alu ese ai.
Ona sa ou lei mauaina se mea faaleagaga se tasi na tupu e faamautu ai lau faaiuga e auauna atu, o lea sa faigofie ai ona masalosalo pe a oo i ni mea faigata. Ae na faamanuiaina au e le Alii ina ua maua lou valaauga i le Misiona a Chile Santiago East e atiae se alofa mo tagata i lau misiona, e oo lava i le taimi ou te lei tuua ai. Ua i ai nei sou olaga o aafiaga na maua ai se faamaoniga o se misiona o se filifiliga lelei lea mo au.
Madeleine Bailey
Agavale: ata na tusia e Robert Casey; taumatau: ata o le pine na pueina e Emily Leishman Beus © IRI
Luga: ata na tusia e Derek Israelsen; taumatau: ata na tusia e Jerry L. Garns