Tutu i Tulaga Maualuluga Atu
O le autu o le Mutuale i le 2013 ua aumai mai le Mataupu Faavae ma Feagaiga 87:8: “O le mea lea, ia outou tutu ai i nofoaga paia, ma aua le masi’i ese, seia oo mai le aso o le Alii.” O le fesili ou te faamoemoe o le a mafaufau loloto i ai alii talavou uma i le tausaga a sau o le, Pe o o’u tu ea i nofoaga paia?
A o matou feiloai ma alii talavou totoa i le lalolagi atoa, ua ou molimauina patino ai le faitau afe o outou ua faia lenei mea i le tele o auala. O loo outou tutu i nofoaga e sili ona paia i taimi taitasi tou te ulu ai i le malumalu e faataunuu papatisoga mo e ua maliliu. Ou te uunaia outou ia faaaoga avanoa uma e maua e ulu atu ai i le malumalu ma ia ola agavaa e le aunoa e fai lena mea. O aso taitasi a o outou faataunuu o outou tiute i le Atua, ua outou tutu i nofoaga paia ma ua i ai i se tulaga e sii ae ai isi. Tou te tutu i nofoaga paia a o outou tapena, faamanuia, ma tufa le faamanatuga i Aso Sa taitasi. Tou te tutu i nofoaga paia ao outou faasoa atu le talalelei ma pe a outou galulue o se auauna e tumau—o se tasi e mafai, naunau, ma agavaa i taimi uma e auauna ma faamalosi atu i isi.
I le avea ai ma se tasi e umia le Perisitua Arona, ua tuuina atu ia te oe le tiute e lapatai atu, faamalamalama atu, apoapoai atu, aoao atu, ma valaau atu i tagata uma ia o mai ia Keriso (tagai i le MF&F 20:59). Na saunoa Peresitene Harold B. Lee (1899–1973): “E le mafai ona e sii ae se isi tagata seiiloga e te tu i se tulaga e maualuga atu nai lo le tulaga o loo ia tu ai. … E le mafai ona e faamumuina se afi i se isi agaga vagana ua mumu saesae i lou lava agaga.”1 Alii talavou, o le uiga o lenei mea e tatau ona faaauau pea ona e galue e faamalosia lau molimau ma ia e naunau e faasoa atu i taimi uma.
Ua ia te outou se tiutetauave paia o le avea ma se tufugaaao o le Alii. A o e tatalo ma suesue i tusitusiga paia, taumafai e tausi poloaiga, ma faalogo i musumusuga a le Agaga, o le a faapea ona e tu ai i tulaga maualuluga atu. O se taunuuga, po o fea lava e te i ai e mafai ona avea ma se nofoaga paia. Ma, afai e tulai mai ni tulaga, o le a e maua le malosi, lototele, ma le mafai e sii ae ai isi. O le a e maua le mana ma le puipuiga ua folafola mai e le Alii ia i latou o e tutu i nofoaga paia.
Ou te fiafia i le saunoaga a Peresitene Thomas S. Monson e uiga i nei folafolaga ina ua ia faamautinoa mai ia i tatou a tatou faalatalata atu i le Alii, “o le a tatou lagona Lona Agaga i o tatou olaga, foai mai ia i tatou le naunau ma le lototele e tutu malosi ma mausali ai i le amiotonu—e ‘tutu … i nofoaga paia, ma aua le masi’i ese’ (MF&F 87:8).
“A o feagia’i mai matagi o suiga ia i tatou ma faaauau ona fai ifo le ute o amioga lelei i le lalolagi i luma tonu o o tatou mata, tau ina ia tatou manatua le folafolaga faapitoa a le Alii ia i latou o e faalagolago ia te Ia: ‘Aua e te fefe; aua ou te ia te oe: aua le fetepatepai; aua o A’u o lou Atua: ou te faamalosia oe; e moni, ou te fesoasoani ia te oe’ (Isaia 41:10).”2