Aoaoga

Elder Craig A. Cardon

O Le Fitugafulu

O le malamalama faateleina tatou te maua ai le avanoa e avea ai ma faatosinaga sili atu i le ausiaina o faamoemoega a le Alii.

Faatasi ai ma se naunautai ma le popole tele mo le manuia o o latou agaga, sa aoao atu ai e Iakopo ia tagata o sa Nifae “e uiga i mea o i ai nei, ma mea o le a oo mai” (2 Nifae 6:4). O ona tagata nei, ma sa ia alofa ia i latou. Sa ia aoaoina i latou i le po o ai moni i latou ma folafolaga a le Alii e uiga ia i latou. A o ia aoaoina i latou e uiga i le Faaola, sa ia alaga atu: “E, le silisiliese naua o le paia o lo tatou Atua! Ona ua silafia e ia mea uma, ma ua leai se mea ua le silafia e ia” (2 Nifae 9:20; faaopoopo le faamamafa).

E taua le manatua o lena mea pe a e mafaufau i le taua o aoaoga. O seneturi na muamua atu, i se isi itu o le lalolagi, sa “saili [ai Tama Aperaamo] i faamanuiaga o tama” sa manao “foi ia avea ma se tasi ua mauaina le malamalama tele, ma avea o se soo sili atu o le amiotonu, ma maua se malamalama sili atu” (Aperaamo 1:2).

O outou uma o atalii ma afafine faapelepele o le Atua¹ ma “o fanau a perofeta; ma o outou o … le feagaiga lea na faia e le Tama ma [Aperaamo]” (3 Nifae 20:25). E pei foi o Aperaamo, ua i totonu ia te outou le gafatia e “aoaoina atoatoa atili” a o aoaoina outou i mea ua “tatau mo outou ona malamalama i ai” (MF&F 88:78).

Ua faailoa mai e le Alii o le malamalama manaomia e aofia ai “mea o i le lagi ma o i le lalolagi, ma o i lalo o le lalolagi; o mea sa i ai, o mea o i ai, o mea ua vave ona oo mai; o mea o loo i le atunuu, o mea o i isi atunuu; o taua ma faafatiatamaiga o atunuu, ma faamasinoga o loo i luga o le laueleele; ma se malamalama foi i atunuu ma malo” (MF&F 88:79).

Ata na tusia e Robert Casey

Aisea? Aisea e matua taua ai le maua o le aoaoina? Sa tuuina mai e le Alii Lava Ia se vaaiga matagofie: “Ina ia mafai ona outou saunia i mea uma pe a Ou toe auina atu outou e faalautele le valaauga lea ua Ou valaaulia i ai outou, ma le misiona lea ua Ou tofia ai outou” (MF&F 88:80).

I lenei lalolagi ua faateteleina le faigata, o le aoaoina o se tasi lea o ausiaga aupito taua o le olaga. Ma e ui ina moni e faapea o le tele o le aoaoina o le mea masani o le a taitai atu ai i avanoa mo le faateleina o taui faalelalolagi, ae o le taua sili atu o le malamalama faateleina o le avanoa lea tatou te maua e avea ai ma faatosinaga sili atu i le ausiaina o faamoemoega a le Alii. E pei ona faamalamalamaina i le Mo Le Malosi o le Autalavou: “O le aoga o se vaega taua i le fuafuaga a le Tama Faalelagi e fesoasoani ai ia te oe ia avea ai e faapei o Ia. E finagalo o Ia ia aoaoina lou mafaufau ma ia atiae ou tomai ma taleni, lou malosi e faatino lelei ai ou tiutetauave, ma lou gafatia e talisapaia ai le olaga.”²

Sa faapena foi ona aoao mai e le Perofeta o Iosefa Samita: “I le atamai e i ai le mana. O le Atua e tele atu lona malosi i lo isi uma lava, aua o loo ia te Ia le atamai tele.”³

Mo pogai lelei, o aoaoga aloaia e manaomia ai oe, mo ni tausaga, ia e fesootai i se vaaiga lautele o tomai ma mataupu, o nisi o na mea atonu e te le masani ai pe atonu foi e te le fiafia e suesue i ai. Ae ui i lea, e tatau ona e filiga i au suesuega, aua o lenei mea e faalauteleina ai lau vaai ma faateleina ai le gafatia o lou mafaufau e aoao i isi foi eria. Ioe, o lo’u fesootai atu i se vaega tele o tomai ma mataupu autu e mafai ai ona e maua le avanoa e faailoa ai na tomai ma mataupu ia e i ai moni sou fiafia i ai. Faatasi ai ma lenei fiafia, a o faaauau ona e faalauteleina au aoaoga, o le a e maua le avanoa e tulitulimatagauina ai i le loloto sili atu na mea e te fiafia moni i ai.

Sa faasoa mai e Peresitene Henry B. Eyring, Fesoasoani Muamua i le Au Peresitene Sili, se fautuaga taua sa ia maua mai lona tamā lea sa fautuaina ai o ia e lona tamā e tulitulimatagau ia aoaoga “e te manao tele i ai ona afai e te le o mafaufau i se mea, o le mea lena o loo e mafaufau i ai.”⁴ Sa ma fautuaina ma Sister Cardon le ma fanau ia tulituliloa se aoaoga ma se matata latou te fiafia i ai o le a faapea ona latou mananao e “musamusa i le galuega.”

Sa lapataia e Iakopo lona nuu mai “vaivaiga, ma le valelea o tagata!” Sa ia faamalamalama mai, “Pe a aoaoina i latou ua latou manatu ua popoto i latou, ma latou le faalogologo ai i le fautuaga a le Atua.” Ona ia faaopoopo mai lea o le upumoni mamalu: “Peitai e lelei le aoaoina pe afai latou te faalogologo i fautuaga a le Atua” (2 Nifae 9:28–29).

Ia aoaoina ma faalogo i le Alii. O le a Ia faamanuia ma faalauolaola oe i le ausiaina o Ona faamoemoega.