O Mea Na Aoaoina e Agung mai le Pateminitone
Ua iloa e se talavou Initonesia o le i ai o le faamoemoe e taofia ai o ia mai le fiu.
O se aso susū masani i Jogjakarta, Initonesia, ma sa sisina le afu o Agung mai ona fulufulumata a o faatalitali o ia i le faate’a a lana paga o loo la tauva. Sa pipii lava ai o le taaloga pateminitone, ma e lagona e le talavou e 15 tausaga le finafinau ina ia manumalo.
Ina ua uma se finauga malosi, sa ta mamaoese e lana paga tauva le fulumanu ma sa le mafai ona papai atu i ai Agung. O le le manao e fo’i e foai le ai i se tauvaga vavalalata faapena, o lea na oso atu ai Agung mo le fulumanu ae peitai sa le’i au i ai—ma o lona sesee atu i le malae sima na toto ai [vae ma lima].
E faigofie ona iloa e fiafia o ia i taaloga finau o le pateminitone. Ae peitai e le moemiti Agung e avea o se tagata taalo faapolofesa i le pateminitone. O le a le filifili o ia i le va o le faate’aina o le fulumanu i le Olimipeka ma le faia o se misiona. O lana lava tautinoga, e le lelei tele o ia i le taaloga.
Ae aisea la e taumafai malosi ai lenei talavou laitiiti e tele lana ataata? Faamoemoe.
“Ou te talitonu e mafai ona lelei atili [la’u taalo],” o lana tala lea.
O Se Pogai mo le Faamoemoe
O le faamoemoe o le pogai lea tatou te faia ai le tele o mea. Tatou te faamalositino aua tatou te faamoemoe e mafai ona tatou malolosi ma maloloina teisi atu. Tatou te faataitai pea le faaaogaina o se mea fai musika aua tatou te faamoemoe e mafai ona tatou iloa ona tata lelei. E aoao pea e Agung le taalo pateminitone aua e faamoemoe e mafai ona ia lelei atili ai.
“Afai e leai so’u faamoemoe ia lelei atu la’u taalo ma ia ou manumalo, o le a faigofie lava ona ou fiu,” o le tala lea a Agung.
O le faamoemoe o se elemene taua o le ata o le faaolataga. O le faamoemoe ia mafai ona faamagaloina i tatou e taitai atu ai ina tatou salamo ma toe taumafai pea pe a tatou toilalo i le tausia o se poloaiga.
O Le Osofaiga a Satani i le Faamoemoe
O auupega e lua e sili ona lelei a Satani e faasagatau mai ai ia i tatou o le masalosalo ma le lotovaivai. Sa le mafai ona ia faasalaveia le fuafuaga a le Tama Faalelagi i le taofia o le Togiola. Ae e mafai lava ona ia taumafai pea e taofi aafiaga faamamaina o le Togiola i o tatou olaga pe afai e mafai ona ia faoa o tatou faamoemoe e mafai ona faamagaloina i tatou.
“E manao Satani ina ia leai so tatou faamoemoe,” o le tala lea a Agung, “aua a tatou fiu, ona tatou mamao ese lea mai lo tatou Tama Faalelagi.”
Peitai, a manumalo Satani i le faalotovaivaia o i tatou, o loo i ai ni auala e toe maua ai le faamoemoe.
Mauaina o le Faamoemoe
A tatou manaomia le faamoemoe mo le lumanai, e mafai ona tatou toe vaai i le taimi ua tuanai. E faaaoga e Agung se faataitaiga mai le aoga lea sa aoaoina ai o ia i lenei lesona. “Ua ou iloa afai ou te suesue malosi, e mafai ona faamanuiaina a’u suega,” na ia fai mai ai. “Ona o lena aafiaga, ua i ai lo’u faamoemoe afai ou te koleni malosi, e mafai ona ou alualu i luma i le pateminitone,” o lana tala lea. “O lo’u aafiaga ua aumaia ia te a’u le faamoemoe.”
A tatou manaomia le faamoemoe ia Iesu Keriso, e mafai ona tatou maua i o tatou aafiaga ua mavae i le mana o le Togiola (tagai i le Roma 5:4) ma aafiaga o isi, e aofia ai aafiaga e te ono faalogo i ai i le sauniga faamanatuga, se lesona i le Aoga Sa, i le Liahona, po o tusitusiga paia (tagai i le Iakopo 4:4–6).
A o tatou suesue i saunoaga mautinoa a perofeta, tatalo mo le meaalofa faaleagaga o le faamoemoe, ma iloa le mana o le Faaola i o tatou olaga, o le a faateleina lo tatou faatuatua ia te Ia, e pei foi o lo tatou faamoemoe o le a fesoasoani mai o Ia ia i tatou i le lumanai.1
Aua Le Fiu
E iloa e Agung atonu o le a le mafai lava ona avea o ia ma se tagata taalo faapolofesa, ae ua ia iloa afai lava e tumau pea lona taumafai, e i ai le faamoemoe e mafai ona ia alualu i luma.
Ua ia iloa o le mana sili o le faamoemoe o lenei: “Pau o le mea ia aua lava nei e fiu, o loo i ai le faamoemoe,” sa ia fai mai ai.
I le olaga, o le Togiola a Iesu Keriso o le punavai taua lea o le faamoemoe. Ona o le Togiola e mafai ai ona tatou salamo pe a tatou faia se mea sese. O le uiga foi o lena mea, ona o le Togiola, ua tatou le toilalo ai i le suega o le olaga pe a tatou faia se mea sese sei vagana ua faaui lo tatou taumafai e salamo ma usitai.
O le mafuaaga lena e faaauau ai pea ona valaaulia e Agung ia lona tamā i le lotu i Aso Sa uma. O le mafuaaga lena e taumafai ai lava e tu atu mo le mea sa’o, e tusa lava pe le faia e ana uo. O le pogai lena na te faia ai le malaga e tasi le itula le umi o le alu ma le fo’i mai i le uila i taimi uma e alu atu i le falelotu mo le seminare, Mutuale, sauniga i le Aso Sa, vasega sauniuni a faifeautalai, ma fesoasoani e faamama le falelotu.
“E le faigofie le taumafai e faapei o Iesu,” o le tala lea a Agung. “O nisi taimi ou te lagona ai le lotovaivai, ae peitai ou te le fo’i ai. Ona o Lana taulaga mo a’u, ua i ai lo’u faamoemoe e mafai ona ou lelei atili.”
Ona o le Togiola ua faapea ona i ai le faamoemoe. Ona o le faamoemoe, e mafai e le Togiola ona sui o tatou olaga.
Ata na pueina e Adam C. Olson