Na ika 183 ni Koniferedi Raraba e Oka Kina Nodra Tokoni na Mataveiliutaki Raraba Vou ni Goneyalewa

“Sa lauti na yaloda,” e kaya o Peresitedi Thoma S. Monson ena soqoni isogo ni 183 ni Koniferedi Raraba Vakayabaki ena 7 ni Epereli, 2013, “ka vaqaqacotaki na noda ivakadinadina ni cakacaka vakalou oqo ena noda vakila na Yalo ni Turaga. Me balavu na noda nanuma tu na veika eda sa rogoca ena rua na siga sa oti oqo.”

E Rawa ni o Veivuke

Erau a veivakayaloqaqataki o rau o Peresitedi Thomas S. Monson kei Elder Russell M. Nelson ena Kuoramu ni iApositolo Le Tinikarua vei ira na lewenilotu me ra cau ki na iLavo ni Kaulotu Raraba (General Missionary Fund). Me yacova na ika 4 ni Epereli, 2013, sa 65,634 na daukaulotu tudei era veiqaravi tiko, ka rauta ni 20,000 tale era sa ciqoma nodra veikacivi.

Ena soqoni idola ni koniferedi raraba, a tukuna kina vaqo o Peresitedi Monson, “Me veivuke ena kena qaravi na mataivalu daukaulotu oqo, vakakina baleta ni levu vei ira na noda daukaulotu era lako mai ena veiituvaki dravudravua eso, keimami sa sureti kemuni, kevaka o ni rawata, mo ni cau mai ena lomasoli ki na iLavo Raraba ni Kaulotu ena Lotu.”

E rawa ni da cau na lewenilotu ena kena vakayagataki na tikidua ni ikatini ka vola na levu ni ilavo eda via cau kina ena ruku ni iLavo Raraba ni Kaulotu (General Missionary Fund). E rawa talega vei keda na lewenilotu me da cau ena initanetildsphilanthropies.org.

E sivia ni 100,000 na tamata era tiko rawa ena lima na soqoni ni koniferedi raraba ena Vale ni Koniferedi e Salt Lake City, Utah, Amerika, ena ika 6 kei na 7 ni Epereli. E milioni e vuravura raraba era sarava se rogoca ena TV, setilaiti, retio, kei na kakaburaki ena initaneti. Ena kakaburaki bula kei na vidio ena initaneti, vakarorogo, kei na itukutuku ni koniferedi ena LDS.org, a rawa kina vei ira na lewenilotu me ra yacova yani na koniferedi ena 95 na vosa.

A dolava o Peresitedi Monson na koniferedi raraba ena nona kacivaka na ituvatuva me tara na valetabu mai Cedar City, Utah, Amerika, kei Rio de Janeiro e Brazil—sa na kauta mai na iwiliwili ni valetabu sa kacivaki se sa tara tiko ki na 29. Ena gauna oqo sa vakayagataki tiko e 141 na valetabu.

E vica na veisau a vakayacori ena veiliutaki ni Lotu ena soqoni ena yakavi ni Vakarauwai. Eratou sa vagalalataki taucoko na mataveiliutaki raraba ni Goneyalewa, ka vagalalataki talega o Elder Walter F. González mai nona lewena tu na Mataveiliutaki ni Vitusagavulu. Era a vagalalataki talega e Limasagavulu kadua na Vitusagavulu ni iWasewase.

Sa tokoni o Elder Ulisses Soares mai na iMatai ni Kuoramu ni Vitusagavulu me lewena na Mataveiliutaki ni Vitusagavulu.

Eratou sa tokoni me mataveiliutaki raraba vou ni Goneyalewa o Bonnie Lee Green Oscarson, peresitedi; Carol Foley McConkie, imatai ni daunivakasala; kei Neill Foote Marriott, ikarua ni daunivakasala.

Eratou a tokoni talega e tolu na lewe vou ni iMatai ni Kuoramu ni Vitusagavulu: Elder Edward Dube mai Zimbabwe; Elder S. Gifford Nielsen mai Sugar Land, Texas, Amerika; kei Elder Arnulfo Valenzuela mai Queretaro, Mexico. Eratou tokoni talega e lima na lewe vou ni iKarua ni Kuoramu ni Vitusagavulu.

O Elaine S. Dalton, na peresitedi raraba ni Goneyalewa e liu, sa veiqaravi tu mai ena mataveiliutaki raraba ni Goneyalewa, vakadaunivakasala se vakaperesitedi, ena loma ni 11 na yabaki ni bera na nona mai vagalalataki ena Epereli.

Raica e dua na lisi taucoko ni veitokoni kei na veivagalalataki ena tabana e 26.

Raica na kedra itukutuku na iliuliu kacivi vou tekivu ena tabana e 139.