2013
Na Sala ni Turaga
Me 2013

Na Sala ni Turaga

Mai vei Elder Stanley G. Ellis

Ena Vitusagavulu

Na sala ni Turaga sa ikoya meda vakarorogo ki na nodra ivakavuvuli na noda iliuliu, kila na ivakavuvuli dodonu, ka liutaki keda tiko kina.

Elder Stanley G. Ellis

Vitusagavulu

Au veiqaravi vaka dua na Vitusagavulu. Era vakatokai na Vitusagavulu me ra dauvunau [me vaka ena tikina, V&V 107:25]—me ra wasea na vosa ni Turaga me vaka saraga na nodra ciqoma mai vei ira na iapositolo kei na parofita kei na Yalotabu ka mera ivakadinadina dua tani ni yaca i Karisito, ena kena vunautaki na kosipeli e vuravura taucoko, ena kena tara cake na Lotu, ka vakayacori na kena cakacaka (raica na V&V 107:25, 34).

Gone Tagane ni Veiteitei

Au a tubu cake ena dua na teitei volekati Burley, Idaho—dua dina na “Gone tagane ni veiteitei mai Idaho!” Ni vakaoya, au a vulica:

  1. Mo cakacaka—kevaka o sega ni teitei, o na sega ni tamusuka.

  2. Mo cakacaka vakamaqosa—kevaka o vakasuasuataka ka vakabulabulataka, o na tamusuka vakalevu cake sara.

  3. Na bibi ni kena gauna—kevaka o sega ni tea ena kena gauna donu, edua na uca cevata totolo e rawa me vakarusa na tatamusuki.

  4. Na caka ni ka e gadrevi se dodonu me caka kevaka madaga e marautaki, kena gauna vinaka, se ke veiganiti—mo na loba sucu ni bulumakau ena gauna e gadreva kina mo lobaka, ka sega ni gauna o vinakata kina.

  5. Me’u kaya vakadodonu—ni oka kina na susu manumanu kei na iyaya vakamisini, e sega kina na “vakaoti gauna” se leqataki ni veitovaki. (Ena vuku ni ka oqo, ena noqu sa veiqaravi raraba Vakalotu, au dau taroga vakawasoma, “O vinakati au meu vosa vakadodonu se wereubiubi?” Me vaka na kena lawa, era a sa digia na Yalododonu “vakadodonu!” Au vosa vakadodonu nikua.)

  6. Kena itinitini, vaka dua na gone tagane ni veiteitei e Idaho, au sa vulica meu dau tu dei ena kena yavu.

E sega tale ni dua na ka e yavu vakalevu cake vei keda kece, mai na noda ivunau, mai na dina ena imatai ni yavu ni vakabauta: “Keimami vakabauta na Kalou na Tamada Tawamudu, kei na Luvena ko Jisu Karisito kei na Yalo Tabu” (Na Yavu ni Vakabauta 1:1).

Me kena ikuri, o Koyae Tamada Vakalomalagi, ka kilai keda, e lomani keda, ka vinakati keda meda lesu tale Vua. O Jisu noda iVakabula ka Dauveivueti, ena nona Veisorovaki a vakadeitaka o koya na noda na vorata na mate ka bula tale ka rawa kina vei keda meda vakalagilagi ka noda na bula tawamudu. Na Yalo Tabu sa dauveivakacegui, dauvakatakila, qasenivuli, dauvakadinadina, ka dauniveidusimaki.

Ni vakasamataka mada, kemuni na taciqu kei na ganequ—eda sega ni luveniyali vakayalo! Eda sega ni da tu duadua.

Na cava na vinaka ni vakaitubutubu—ka sega ni luveniyali? E da vuli mai vei ira, tiko vinaka ena veika yaga era a sa sotava, levea na veika rerevaki vunitaki tu era vakasalataki keda kina, ka kila vakavinaka cake na ka ena nodra rai. E sega ni dodonu meda yali, veilecayaki, vakaisini, se takiveiyaga. Oqo e ka dina taucoko me baleta na Tamada Vakalomalagi, sa vakatavulica keda ka vakaraitaka vei keda ni sega ni dua ga na sala e rawa, ia na kena sala duadua ga.

E Tiko Vua na Kalou na Sala

Na kena dina sa ikoya ni tiko vua na Kalou na sala ni bula,1 ni loloma,2 ni veivuke,3 ni masu,4 ni vosa,5 veivakauqeti vei ira tale eso,6 ni veiliutaki,7 ni vakamau,8 ni susu gone,9 ni vuli,10 ni kila na dina,11 ni wasei ni kosipeli,12 digitaki vakavuku ni ka eda kania,13 vte.

Me rau sala vata kei na ivolanikalou, so na veiivurevure cecere ni kena kunei na sala ni Turaga ena Tudei ena Vakabauta, Me iSakisaki ni iTabagone, kei na so tale na ivakavuvuli ni iapositolo kei na parofita bula.

  1. Me kena ivakaraitaki, a vakatavulici keda na Turaga ena ivolanikalou:

    “Ni sa dua tani na noqu vakanananu ka dua tani na nomudou vakanananu, ka sa dua tani na noqu ivalavala ka dua tani na nomudou ivalavala, sa kaya ko Jiova.

    “Me vaka na kena cecere cake na lomalagi ki vuravura, sa cecere cake vaka kina na noqu ivalavala ki na nomudou ivalavala, kei na noqu vakanananu ki na nomudou vakanananu” (Aisea 55:8–9).

  2. E dua vei ira na ivalavala ca ena iotioti ni itabagauna oqo sa ikoya ni “ra sa dui muria ga na lomadra na tamata yadua” (V&V 1:16). Eda sa vakasalataki ena Vosa Vakaibalebale meda “kakua ni vakararavi ki na nomu yalomatua” ka mo “kakua ni nanuma ni ko sa vuku” (raica na Na Vosa Vakaibalebale 3:5–7).

  3. Eda sa vakatavulici ni kevaka eda cakava na veika ena sala ni Turaga, ena vakalougatataki keda vakaidina o Koya ka sa noda na Nona yalayalala; ia kevaka dou sa sega ni muria na noqu ivakaro, dou na sega ni rawata na ka sa yalataki (raica na V&V 82:10).

  4. Na Turaga a vakatautauvatana Nona sala vata kei na noda sala ena Nona a vakatavulica na parofita o Samuela, ka talai me vakasaqara e dua na tui vou: “A sa kaya vei Samuela ko Jiova, Mo kakua ni raica na matana, se na kena balavu; niu sa sega ni digitaki koya: ni sa sega ni raica ko Jiova me vaka sa raica ko ira na tamata; ni sa raica na ka esau ko ira na tamata, ia sa raica na yalo ko Jiova” (1 Samuela 16:7).

  5. Ia me vaka mada ga na gagadre ka sa matau tu ki vei ira na tamata yadua me ra vukei ira na dravudravua kei na vakaloloma, na Turaga e lomavata ena noda inaki ia e vakasalataka, “Ia me na vakayagataki ena sala sa dodonu vei au” (V&V 104:16). Kevaka e sega, ena noda sasaga ni vukei ira ga vakaikeda, eda na rawa ni vakamavoataki ira tale. A sa vakatavulica vei keda na Turaga na gadrevi ni veivakauqeti meda rawati keda vakataki keda. Kevaka mada ga e rawa meda veivuke, e sega ni dodonu meda solia se vakarautaka na veika e rawa ka dodonu me ra cakava me baleti ira. E sa tovolei e veivanua kece, na vuravura e sa vulica na ivalavala ca e lako vata mai na kena dau soli eso na veika ka sega ni dau kerei na tamata me cakacakataka. Ka sa kila vinaka tu oqori na Kalou.

Meda vakasamataka mada eso tale na ivakaraitaki. E tu Vua na Turaga na sala me vakayacora kina na cakacaka ni daukaulotu. E sa vakamacalataki ena ivolanikalou kei na Vunautaka na Noqu Kosipeli ka vakayagataki me vaka na veidusimaki ni Yalotabu.

Sa tu na Nona sala na Turaga, se na sala ni loloma. O ira na kai vuravura era kaya ni ka e bibi duadua sa ikoya ni rua na tamata me rau veilomani. E vakatavulica na Tamada Vakalomalagi ni bibi vakaidina me rau veilomani vakairau e rua tamata, ia e levu cake sara na ka e vakatavulica vei keda o Koya: ni sa tiko e dua na kena sala e vakatarai me vakaraitaki kina na loloma oqori.

Liutaki Keda Vakaikeda

A vakatavulici o Josefa Simici ena sala ni Turaga mai na gauna e se gone kina. Ena gauna a tarogi kina, se liutaka vakacava na Lotu, a vakamacalataka ni a vakavuvulitaka vei ira na ivakavuvuli dodonu, era liutaki ira ga.14 Taciqu kei na ganequ era sa vakatavuvulitaka tikoga na iapositolo kei na parofita na ivakavuvuli dodonu. Na taro qo,” eda sa vakayagataka tiko li na ivakavuvuli dodonu me liutaki keda?”

E dua na ka e dau vakatavulici wasoma vei keda sa ikoya meda se ena vanua eda teivaki kina. Ia ena so na gauna eda temaki meda toki tale ki na dua na vanua vou, noda nanuma ni o ira na luveda ena levu cake kina na nodra itokani ka na vinaka cake talega kina na parokaramu ni itabagone.

Kemuni na taciqu kei na ganequ, eda nanuma tiko li na ka bibi ena nodra vakabulai na luveda na vanua kei ira eda vakaitikotiko vata? Era dau vakatavulica wasoma na iapositolo kei na parofita ni veika e yaco ena loma ni vale e bibi cake sara mai na nodra sotava na luveda e tautuba. Na noda susugi ira vakacava na luveda sa ikoya e bibi cake sara mai na vanua era susugi kina.

E dina ni ra tu eso tale na veika era okati ena vakatulewataki ni vanua meda tiko kina, ka da vakavinavinakataka vakalevu, na Turaga ena dusimaki keda kevaka eda vakasaqara na Nona veivakadeitaki.

E dua tale na taro sa ikoya “Evei na vanua eda gadrevi kina?” Au a veiqaravi ena mataveiliutaki ena iTeki e Houston Texas North ena 16 na yabaki. E vuqa na tamata era a toki mai ki neimami vanua ena loma ni yabaki oqori. Vakawasoma neitou dau ciqoma na talevoni me vakaraitaki nona sa toki mai e dua kei na kena tarogi se na tabanalevu cava e uasvi duadua. Se qai vakadua ga ena 16 na yabaki na noqu ciqoma e dua na qiri ka tarogi au mai kina e dua, “Na tabanalevu cava e gadreva e dua na matavuvale vinaka? Evei e rawa me keitou veivuke kina?”

Ena veiyabaki ni Lotu e liu, o Peresitedi Brigham Young kei na so tale era na kacivi ira na lewenilotu me ra lako ki na dua na vanua me lai tara kina e dua na Valenilotu. Na kena lasa sa ikoya ni gauna mada ga oqo era tu ena veivanua kece ga na lewe ni Lotu yalodina era na dau lako ena veivanua cava ga e gadreva na parofita me ra lako kina. Eda namaka dina tiko li vei Peresitedi Monson me tukuna vakayadua vei keda e sivia e14 na milioni se evei na vanua e gadrevi kina na noda matavuvale? Na sala ni Turaga sa ikoya meda vakarorogo ki na nodra ivakavuvuli na noda iliuliu, kila na ivakavuvuli dodonu, ka liutaki keda tiko kina.

Bibi Duadua

Ena veika kece sa yaco tiko ena Lotu nikua, kei na nona sa vakatotolotaka tiko na Nona cakacaka na Turaga ena yasana kece sara, sa bibi vakalevu cake sara kina na noda vakayacora na veika kece eda vakayacora ena na Nona sala!

Vakauasivi ena cakacaka ni veivakabulai, eda vulica ni “sa vakarautaka na Kalou e dua na sala uasivi sara ena isolisoli ni Luvena” (Ica 12:11). Na ivunau i Karisito “sa ikoya oqo na sala; ia sa sega sara e dua tale na sala se na yaca sa soli e ruku ilomalagi me ra rawata kina na matanitu ni Kalou” (2 Nifai 31:21).

iTinitini

Me vaka ni da raica e vuqa na tamata ena vuravura nikua ena nodra bula veilecayaki se, ca sara, era sa muria na sala tani ka ra sa lako sese kina ka vakararawataki wale tu yani ena vuku ni veidigidigi cala oqo, sa vakavuna meu via kacivaka me vaka a cakava o Alama:

“Raica meu agilosi mada ga meu tabalaka na domoqu me vaka na davui ni Kalou sa yavalati vuravura, meu vunauci ira kina na tamata kece ga me ra veivutuni!

“Io meu vunautaka … me ra veivutuni na tamata kece ga me ra bula kina; io me ra veivutuni ka lesu vua na Kalou [kei na Nona sala], me ra marau kina e delai vuravura” (Alama 29:1–2).

Au vakadinadinataka tale, sa tu vua na Turaga na sala! E kilai keda na Tamada Vakalomalagi, lomani keda, ka via veivuke. E kila o Koya na sala vinaka duadua me veivuke kina. Eda sega ni luveniyali vakayalo!

Na noda iVakabula, o Jisu Karisito, sa ikoya “na sala, na vu ni dina, kei na vu ni bula” (Joni 14:6; raica tale ga na Alama 38:9). Na Nona sala e yavutaki ena dina tawamudu ka liutaki keda ki na “vakacegu ena bula oqo ka rawata na bula tawamudu ena bula sa bera mai” (V&V 59:23). Au vakadinadinataka ena yaca i Jisu Karisito, emeni.