Elder Arnulfo Valenzuela
Ena Vitusagavulu
A tubu cake o Elder Arnulfo Valenzuela ena veikoloni ni Momani mai Chihuahua, Mexico, ka tauriivola mai na Academia Juárez ka taukena na Lotu. Na nona tubucake mai kea a rawa kina na madigi vakamareqeti me tuberi mai vei ira na tagane kei na yalewa era dau yalodina ki na kosipeli kei na veiqaravi vua na Turaga.
Na lesoni eso a vulica mai na vanua kilai levu oya ni Lotu e Amerika vaka-Latina ena vinaka sara vua ena nona vakayacora tiko na nona itavi vakalewe ni iMatai ni Kuoramu ni Vitusagavulu.
“Au vakila niu vakalougatataki vakalevu sara ena veivakalougatataki oqo meu qarava na Turaga ena dua na ivakarau tudei,” e kaya o koya.
A sucu ena Me ni 1959 vei Gilberto kei Rosa Valenzuela, se gone sara o Arnulfo ena gauna sa vagolei kina ki na veiqaravi ena Lotu. Ni yabaki 19 a ciqoma e dua na veikacivi ki na Tabana ni Kaulotu na Mexico Veracruz. Ena vanua ni sarasara oya e Mexico a vakila kina na vakacegu e basika ena cakacaka vakosipeli kei na reki ni nodra sureti na tani vei Karisito.
Ni oti ga mai vakalailai na nona kaulotu, a sikova e dua na matavuvale ka a toki talega mai ki Mexico City. Na nodratou itokani ena katuba kadua na matavuvale oqo, o Pilar Porras, e dua na lewe ni Lotu vou yalodina. Erau yaco me veitokani o Arnulfo kei Pilar, ka sega ni dede rau sa tekivu veigadivi. Erau a vakamau ena Valetabu na Mesa Arizona ena 6 ni Epereli, 1982, ena dua na gauna se bera kina ni dua na valetabu ena nodrau vanua.
Erau sa susuga cake e tolu na gone, ka tomana tiko na veiqaravi ena Lotu ena nodrau sarava na kena sa yaco o Mexico me vanua ni valetabu. “Keirau sega vakadua ni tadra ni na 12 na valetabu e Mexico, kei na dua se qai tara tiko,” e kaya o koya.
Ena nona gauna vakabisopi, daunivakasala ruarua ena dua na mataveiliutaki ni iteki kei na tabana ni kaulotu, ka Vitusagavulu ni iWasewase, sa vakadinadinataka o Elder Valenzuela na nodra yalodina na lewenilotu vakasakiti e Mexico ka ra tu vakarau tu me ra solia na veika kece e tu vei ira ki na inaki ni Turaga.
Ni dua o koya a taurivola mai na Mexico City’s University of Accounting and Administration Studies, sa cakacaka oti o Elder Valenzuela ena veitutu vakamanidia eso ni veikabani ni veivanua tani.