Mai Mate o Elder Eldred G. Smith ni yabaki 106
A mate mai na nona itikotiko ena ika 4 ni Epereli o Elder Eldred G. Smith, ka a veiqaravi vaka-Peteriaki ni Lotu mai na 1947 ki na 1979. Sa yabaki 106 o koya.
Ni vakabauti me tamata qase duadua e Utah, e balavu cake na bula nei Elder Smith mai vei ira kece na Vakaitutu Raraba e liu.
A sikovi Elder Smith na Peresitedi ni Lotu o Thomas S. Monson ena siganisucu nei Elder Smith ena 9 ni Janueri, 2013. “Na noqu itokani vinaka o Eldred Smith,” e kaya o Peresitedi Monson. “A gauna balavu na neirau sa lakova vata mai e vuqa sara na ka. Au daulomana ka rokova sara na turaga oqo.”
A kacivi o Eldred G. Smith me Peteriaki ki na Lotu ena 10 ni Epereli, 1947, mai vua na Peresitedi ni Lotu ena gauna o ya o Peresitedi George Albert Smith ka iotioti ni tamata me taura tu na itutu oqori. A soli vua na itutu vakaemeritu ena 1979. A tekivutaki na itutu oqo ena 1833 ena nona kacivi o Josefa Simici Levu, na tamana na Parofita o Josefa Simici. O Elder Smith e makubuna vakarua na tuakana na Parofita o Hyrum.
Ena gauna ni nona veiqaravi vaka-Peteriaki ni Lotu, a lako kina o Elder Smith ki na vuqa na veivanua e vuravura ka solia kina e vuqa na veivakalougatataki vakapeteriaki ena veivanua e sega kina na peteriaki. Ena 1966 erau a lako vata kei Elder Monson ena gauna oya, ki Ositerelia kei Samoa me soli veivakalougatataki vakapeteriaki vei ira na lewenilotu mai kea. Oqori na imatai ni gauna me sikovi Samoa kina e dua na peteriaki vakatulewa. Nikua e vuqa na iteki sa tiko e dua na kena peteriaki ka vakaitikotiko ga ena loma ni iteki.
Erau a vosa ruarua ena veibulu vei Elder Smith o Peresitedi Monson kei Elder M. Russell Ballard ena Kuoramu ni iApositoloLe Tinikarua. A wilika o Peresitedi Monson e dua na nodratou ivola ni duavata ena o ni rarawa na Mataveiliutaki Taumada, qai vakuria vaqo, “Sa takali yani vakawawa mai vei au e dua na noqu itokani vinaka.”
O Elder Ballard, ka makubui Hyrum Smith talega vakarua, e vosa ena cau nei Elder Smith ena kena vakabulai tiko na itukutuku ni nodratou matavuvale. “Keimami marautaki koya me vaka ni Peteriaki ki na Lotu ka peteriaki ni neitou matavuvale rabailevu,” e kaya o koya. E vakuria ena nona kaya ni kila ni a vakila o Elder Smith ni ka cecere duadua e sa rawata na nona matavuvale.
A vakamautaki Jeanne Audrey Ness o Eldred Smith ena 1932; e lima na luvedrau. Ni oti na nona mate ena June 1977, a vakamautaki Hortense Child; a veiqaravi voli kina vakadaunivakasala ki na mataveiliutaki raraba ni Goneyalewa. A mate ena Me ni 2012.
Sa biuta koto mai o Elder Smith e rua na luvena tagane kei na dua na yalewa (e dua tale na yalewa sa mate), 22 na makubuna (e rua tale sa mate), 63 na makubuna vakarua, kei na 22 na makubuna vakatolu.
A cau mai ki na itukutuku oqo o Gerry Avant.
O Peresitedi Thomas S. Monson, imatau, sikovi Elder Eldred G. Smith, ka a veiqaravi vaka-Peteriaki ki na Lotu mai na 1947 ki na 1979, ena nona ika 106 ni siganisucu, 9 ni Janueri, 2013. A mai leqa o Elder Smith ena 4 ni Epereli mai nona vale.
iTaba mai vei Gerry Avant, iTukutuku ni Lotu