Elder S. Gifford Nielsen

Ena Vitusagavulu

E dau taleitaka vakalevu o Elder Stanley Gifford Nielsen na qito, ia e sega ni ka bibi duadua ena nona bula na qito. E vakabauta o koya ni bibi sara me vakatautavata na ka kecega ka yavu ni bulamarau ena gauna oqo kei na veigauna tawamudu na kosipeli.

A sucu ena Okotova ni 1954 vei rau o Harry kei Lois Nielsen, e vakaitikotiko mai Provo, Utah e Amerika, me yacova na nona tauri ivola mai na koliji. Erau vakavuvulitaka vua na nona itubutubu e dua na ivakarau ni veika yaga yavutaki ena kosipeli, sa tubera tiko mai na nona bula.

Ni oti na nona a mavoa vakaca sara ka mai yalana na nona qito vutupolo e koliji, e kaya o Elder Nielsen ni sa vulica mai ni ka bibi duadua ena nona bula ena sega ni rawa ni kauta tani na mavoa.

Ni sa bula vakavinaka mai, a qito kotabeki ena Sotasota Raraba ni Vutupolo, ia a mai kasura na nona gauna ni qito ni oti e tolu na yabaki. A vakacacani e matanalevu. Sa gauna ni raici koya vakataki koya ka me raici na veika dina e vakabauta. “Au vulica ni na sega ni laivi iko na iVakabula, veitalia ga se cava sara,” e kaya o Elder Nielsen, ka sa vakaitikotiko ena gauna oqo mai Sugar Land e Texas.

Kevaka e dua na ivolanikalou sa tovolea me vakatotomuria ena nona ivakarau ni bula, sai koya na Maciu 5:14–16: “Oi kemudou na rarama kei vuravura. … Me caudre vakakina na nomudou rarama ena matadra na tamata, me ra raica na nomudou ivalavala vinaka, ka vakarokorokotaka na tamamudou sa tiko mai lomalagi.”

 “E dolava tu na Turaga na Ligana vei kemudou,” e kaya o Elder Nielsen. “O lomani Koya ena nomu bulataka na Nona kosipeli.”

A sotavi Wendy Olson ni tiko voli ena koliji. Erau a vakamau ena Valetabu e Provo Utah ena ika 23 ni Epereli, 1975. A rawata e dua na diqiri ni veitaratara ena Brigham Young University. A qito ena itutu ni kotabeki ena Houston Oilers ka dairekita ni qito ena kabani ni retioyaloyalo na KHOU ni bera na nona veikacivi me veiqaravi tudei ena Lotu.

Na tamadratou e ono na gone, sa veiqaravi oti o Elder Nielsen vakaqasenivuli ni semineri, peresitedi ni Cauravou, peresitedi ni kuoramu ni italatala qase, bisopi, ka peresitedi ni iteki. A veiqaravi voli vaka-Vitusagavulu ni iWasewase ena gauna e kacivi kina ki na iMatai ni Kuoramu ni Vitusagavulu.