Mekem Gud Pat blong Yu
I kam long wan Jos Edukesen Sistem faeasaed blong ol yang adalt we hem i bin givim long Brigham Yang–Aedaho long 4 Maj 2012. Blong kasem ful toktok we oli raetem, visitim lds.org/broadcasts/archive/ces-devotionals/2012/01?lang=eng.
Stap stret mo gud. Bildimap wan famle. Faenem wan stret wei blong givim wanem we wan i nidim. Givim seves olsem we oli singaotem yu blong mekem. Rere blong mitim God.
Plante taem, Presiden Deved O. MaKei (1873–1970) i stap storian long wan tru stori we i bin hapen taem mi stap long misin long Skotlan. Hem i stap filim se hem i wantem gobak hom afta we hem i stap long misin blong sot taem, mo hem i bin spendem sam aoa blong lukluk ples kolosap long Steling Kasel. Taem we hem mo kompanion blong hem i kambak long wokbaot blong tufala blong visitim kasel ia, oli bin pas long fored blong wan bilding we oli raetem wan toktok long ston we i stap antap long doa, mo toktok ia i blong Sekspia we i stap talem: “Nomata Huia Yu, Mekem Gud Pat Blong Yu.”
Taem hem i tokbaot eksperiens ia bakegen, Presiden MaKei i bin eksplenem: “Mi talem long miwan, o Spirit we i stap insaed long mi: ‘Yu wan memba blong Jos blong Jisas Kraes blong Ol Lata-dei Sent. Moa long hemia, yu yu wan ripresentativ blong Lod Jisas Kraes. Yu bin akseptem responsabiliti olsem wan ripresentativ blong Jos.’ Afta nao, mi tingting long wanem mitufala i bin mekem long aftenun ia. Mifala i bin go lukluk ples, mifala i bin kasem save abaot histri blong ples, hem i tru, mo mi glad tumas long hemia. … Be, hemia i no misinari wok. … Mi bin akseptem mesej we i bin kam long mi long ston ia, mo stat long taem ia, mitufala i bin traem blong mekem pat blong mitufala olsem ol misinari long Skotlan.”1
Mesej ia i bin impoten tumas mo i bin tajem gud laef blong Presiden MaKei, mekem se hem i bin yusum blong givim insperesen long hem long ful laef blong hem. Hem i bin mekem strong tingting se nomata wanem responsabiliti bae hem i gat, bae hem i mekem gud long hem.
No Mekem Samting Olsem se Yu Wan Narafala Man
Wetem lukluk i stap long ol plante gudfala samting we yufala, yufala we i yangfala jeneresen blong Jos i gat, ?wanem nao wari blong mi long saed blong fiuja blong yufala? ?Wanem kaonsel nao mi save givim long yufala? Faswan, bae man i pusum yu blong yu mekem samting olsem se yu yu wan narafala man—blong yu haedem fes blong yu—mo kam wan we i no yu, mo wan we yu no wantem kam olsem.
Eli long histri blong Jos, Profet Josef, Ema mo twin pikinini blong tufala we tufala i gat 11 manis, Josef mo Julia, oli bin stap long Haeram, Ohaeo, long Jonson fam. Tufala pikinini i bin sik long sik misel. Josef mo smol boe blong hem, tufala i bin silip long timba bed kolosap long doa.
Long naet, wan grup blong ol man we oli pentem fes blong olgeta i blak, oli pusum doa mo oli pulum Profet i go aotsaed, mo oli kilim hem mo oli kapsaetem kolta long hem mo Sidni Rigdon.
Pat we i moa nogud long trabol taem ia, i we smol Josef i bin stap long kolkol blong naet taem oli bin pulum papa blong hem i go, mo hem i kasem wan nogud flu. Olsem risal, hem i bin ded sam dei afta.2
Olgeta we oli bin tekpat long taem blong kilimded Profet Josef from bilif blong hem, mo olgeta we oli kilimded brata blong hem, Haeram, oli bin pentem ol fes blong olgeta blong traem haedem huia olgeta.3
Tedei, fasin blong no stap talemaot nem blong yumi i moa isi bitim bifo, be long narasaed, i gat ol impoten prinsipol blong folem blong no stap haedem fes, be blong stap “tru long fet we sam man oli bin ded from.”4
Wan long ol bigfala proteksen agensem fasin blong mekem ol nogud joes, i blong no haedem nem blong yu. Sapos yu luk se yu wantem olsem, plis, yu mas save se hem i wan saen blong bigfala denja, mo hem i wan tul blong enemi blong pusum yu blong mekem wan samting we bae yu no mekem sapos man i save nem blong yu.
Hem i wan praktis tedei blong wan i haedem nem blong hem blong raetem ol toktok we i talem nogud man, i daonem man, hemia long intanet. Sam oli singaotem hot toktok.
Aposol Pol i bin raetem:
“Yufala i no krangke: rabis toktok i save spolem fasin blong man.
“Yufala i mas stretem tingting blong yufala, mo lego ol sin blong yufala. I gat sam long yufala we oli no save God nating” (Fas Korin 15:33–34).
Hem i klia se rabis toktok i no wan kwestin blong nogud fasin nomo, be sapos olgeta we oli ol Lata-Dei Sent oli stap praktisim, bae oli spolem olgeta we oli no save God nating, o oli no gat wan testemoni abaot Sevya.
Eni fasin blong yusum Intanet blong mekem man i fraet, spolem nem blong wan man, o putum man long nogud ples, i rong. Wanem yumi stap luk long sosaeti i we, taem ol pipol oli stap blokem fes o nem blong olgeta, bae oli mekem ol kaen fasin ia we i spolem gud olgeta long fes blong pablik. Hem i agensem tu ol stamba prinsipol we Sevya i bin tijim.
Sevya i bin eksplenem se Hem i no bin kam blong panisim wol be blong sevem wol. Afta, hem i tokbaot wanem ia i panismen:
“Delaet i kam long wol finis, be ol man oli no laekem delaet, oli laekem tudak from we fasin blong olgeta i no stret.”
“Man we i stap mekem fasin we i no stret, hem i no laekem delaet, i agens long hem, mo i no save kam long delaet, from we delaet ya bambae i soemaot ol fasin blong hem.
“Be man we i stap mekem ol stret fasin nomo, hem i save kam long delaet, blong delaet ya i soemaot we ol fasin we hem i stap mekem, be God i bin givhan long hem blong i mekem.” (Jon 3:19–21; luk tu long ol ves 17–18).
Man we i stret mo gud i no nidim blong blokem fes blong haedem nem.
Mekem Samting Folem Ol Tru Bilif blong Yu
Mekem samting i folem ol tru bilif blong yu, taem yu spendem taem long ol samting we bae i bildimap mo developem fasin blong yu mo bae i helpem yu blong kam moa olsem Kraes. Mi hop se i no gat wan long yufala i lukluk se fas samting long laef i, “taem blong fani mo pleplei,” be bae i luk se i “wan taem blong rere blong mitim God” (Alma 34:32).
Wan gudfala eksampol blong mekem gud pat blong yumi mo yusum gud taem long stret fasin, i kamaot long wan samting we i bin hapen long laef blong Elda L. Tom Peri taem we, olsem wan Marin soldia, hem i bin stap long ami fos blong Yunaeted Stet long Japan long en blong Wol Wo 2. Elda Peri i bin serem hemia taem hem i bin talem spesel witnes blong hem abaot Sevya, we oli stap soem long senta blong ol visita.
“Mi bin pat blong fas grup blong ol Marin we i go soa long Japan afta long saening blong pis triti afta long Wol Wo 2. Taem mifala i go insaed long siti blong Nagasaki we i smas gud, hem i bin wan long ol eksperiens long laef blong mi we i sore tumas. Wan bigfala pat blong siti i bin smas fulwan. Sam long ol ded oli no berem olgeta yet. Olsem tim blong wok, mifala i statem mekem ol hedkwota mo bin go long wok.
“Situesen ia i no bin gud nating, mo sam long mifala i bin wantem blong help moa. Mifala i bin go long hedkwota blong mifala mo askem raet ia blong helpem bildimbak ol Kristin Jos. From nomo gavman i bin stopem long taem blong wo, ol jos ia i bin stop blong wok. Sam bilding i bin smas gud evriwan. Wan grup blong mifala i bin wiling blong fiksim mo plastarembak ol japel ia long taem we mifala i no wok blong mekem se mifala i save gat bakegen ol Kristin seves.
“… Mifala i bin faenem ol man blong wok blong God we oli no bin save wok long taem blong ol yia blong wo, mo leftemap tingting long olgeta blong gobak long ol pulpit blong olgeta. Mifala i bin gat wan gudfala eksperiens wetem ol pipol ia taem oli kasem bakegen eksperiens blong fridom blong praktisim Kristin bilif blong olgeta.
“Wan samting i bin hapen taem mifala i stap livim Nagasaki blong gobak hom we oltaem mi stap tingbaot. Taem mifala i stap go insaed long tren we bae i tekem mifala i go long ol sip blong tekembak mifala i go hom, i bin gat plante nara Marin we oli bin jikim mifala. Oli bin gat ol gel fren blong olgeta we oli stap talem tata long olgeta. Oli bin laf long mifala mo talem se mifala i bin mestem ol gudfala taem, taem mifala i bin stap long Japan mo mifala i bin westem taem blong mifala blong wok mo plastarem ol wol.
“Taem oli stap gohed blong jikim mifala, antap lelebet kolosap long stesen blong tren, kolosap 200 long ol impoten Kristin Japanis we mifala i bin fiksim ol jos blong olgeta i stap singsing “Go Fored Ol Kristin Soldia.” Oli bin kamdaon mo givim long mifala plante presen. Afta oli stanap laen folem rod blong tren, mo taem tren i stat blong folem rod, mifala i putumaot ol han blong mifala i go aotsaed mo tajem ol fingga blong olgeta taem mifala i go. I nomo gat toktok; mifala i sore tumas long olgeta. Be mifala i glad tumas se mifala i save givim smol help long wan wei blong bildimbak Kristin laef long wan nesen afta long wo.5
Plis tingting hevi mo tekem step blong jusum olsem wanem bae yu yusum taem blong yu. Olsem we yufala i save luk long eksampol insaed long vidio blong Elda Peri, mi no stap tokbaot se bae yufala i putum relijin blong yufala i flasem klos blong yufala, o blong yufala i priten blong stap fetful. Hemia i save mekem yufala i sem, mo mekem sem long Jos. Mi stap tokbaot blong yufala i mas kam huia yufala i mas kam.
Setem Ol Gol we Oli Stret
Nambatri kaonsel blong mi i abaot sam long ol gol we yufala i mas tingting long olgeta. Long kolosap semtaem we Elda Peri i bin stap long Japan wetem ol Marin, Presiden Boed K. Peka i bin stap long Japan wetem Eafos long en blong Wol Wo 2.
Long 2004, mi bin go wetem Presiden Peka mo sam narawan moa i go long Japan. Hem i gat wan janis blong gobak long step blong hem mo tingtingbak long sam long ol eksperiens mo desisen we hem i bin mekem long taem ia. Hem i tokbaot sam long seminari toktok ia. Wetem raet blong hem, mi serem sam tingting mo filing blong hem.
Presiden Peka i tokbaot ol eksperiens we i bin hapen long wan aelan aotsaed long kos blong Okinawan. Hem i talem se hemia hil blong hem long ples we i stap hemwan. Hao hem i bin rere mo taem hem i mitim ol nara memba i mekem bilif blong hem long gospel tijing i kam strong moa. Be hem i no gat yet wan konfemesen—stret save ia long saed blong wanem hem i bin filim se i tru.
Man we i raetem laef blong Presiden Peka i talem wanem i hapen: “Agensem pis blong konfemesen we hem i bin stap lukaotem, hem i kam blong fesem wan rabis faet agensem ol man we oli gat nating wetem wo. Hem i wantem wan taem blong stap hemwan, wan taem blong tingting, nao wan dei hem i klaem long wan ples we i hae moa bitim solwota. Long ples ia hem i faenem ol hafhaf blong wan olfala haos, mo wan plantesen blong poteto we i gro olbaot. Long medel blong ol plan we oli stap go ded, hem i luk ded bodi blong wan mama wetem tufala pikinini blong hem. Hemia i mekem hem i harem nogud tumas, mo i miks wetem ol filing blong lav long famle blong hemwan, mo evri famle.”6
Afta, hem i go insaed long wan ples we ol ami oli bildim, mo i lukluk ples, i tingting hevi, mo i bin prea. Presiden Peka, taem i lukbak long taem ia i talem se i wan taem we hem i kasem konfemesen. Hem i bin kasem insperesen long wanem bae hem i mas mekem wetem laef blong hem. I tru, hem i no save nating se bae hem i kasem hae mo tabu koling ia we hem i gat naoia. Visen blong hem, i blong hem i kam wan tija, we i tokbaot bigwan ol tijing blong Sevya. Hem i bin mekem tingting blong hem we bae hem i gat wan laef we i stret mo gud.
Tingting i kam strong long hem se bae hem i gat wan waef we i stret mo gud mo tugeta, bae tufala i lukaotem wan bigfala famle. Yangfala soldia ia i bin luksave se wok ia we hem i jusum bae i givim naf mane long hem, mo waef blong hem bae i serem ol sem tingting mo bae i wantem blong laef wetem smol samting nomo. Sista Dona Peka, hem i bin, mo hem i stap yet, long Presiden Peka, wan kompanion we i stret evriwan. I neva gat taem we mane i ova smol, be tufala i bin gat evri samting we tufala i nidim. Tufala i bin lukaotem 10 pikinini mo tufala i bin mekem sakrifaes. Naoia tufala i gat 60 apupikinini mo 79 smol apupikinini.
Mi serem tru stori ia wetem yufala, from se plante taem tumas, gol blong yumi i folem wanem we wol i luk i impoten. Ol stamba samting oli simpol nomo blong ol memba we oli bin kasem ol odinens blong sevem man. Stap stret mo gud. Bildimap wan famle. Faenem wan stret wei blong lukaotem famle. Mekem wok taem oli singaotem yu. Rere blong mitim God.
Sevya i bin tijim se “stamba blong prapa laef blong man i no stap long ol samting we hem i gat” (Luk 12:15).
Bildimap Kantri blong Yu mo Komuniti blong Yu
Antap long ol fasin, kwaliti mo desisen we yufala i gat, sapos yufala i mas stap olsem jeneresen we yufala i nid blong stap, bae yufala i bildimap kantri blong yufala, mo komuniti we yufala i stap laef wetem. Jeneresen blong yufala, olsem jeneresen we i hae moa, bae i nidim blong protektem stret mo gud fasin mo fridom blong relijin. Jiu/Kristin laef we yumi karem long ol olfala i kam, i bigwan, be tu, i wan samting we i nid blong stap long plan blong Papa long Heven. Yumi nidim blong holemtaet blong ol fiuja jeneresen oli yusum. Yumi nidim blong joenem ol gudfala pipol, mo tu, ol pipol blong nara jos—speseli olgeta we oli filim se oli mas ansa long God. Ol pipol ia nao we bae oli save andastanem kaonsel ia we i se “nomata huia yu, mekem gud pat blong yu.” Sakses blong leftemap ol Jiu/Kristin valiu mo fridom blong relijin bae i makem jeneresen blong yufala olsem jeneresen we i hae moa we yufala i mas kam.
Wetem ol jalenj we oli stap long wol tedei, Fas Presidensi mo Kworom blong Olgeta Twelef oli wari se yufala i mas tekempat long rod blong politik long kantri we yufala i stap long hem. Jos i stanap hemwan, i no gat saed long politik mo i no sapotem ol kandidet o pati. Be mifala i wantem luk, se ol memba blong jos oli stap fulwan blong sapotem ol kandidet mo ol pati we oli jusum, we oli stanap long ol prinsipol we bae i protektem wan gud gavman. Doktrin blong yumi i klia; yumi mas wok strong blong lukaotem ol man we oli ones mo waes (luk long D&C 98:10).
Mifala i gat bigfala tras long yufala. Lidasip blong Jos i ones blong talem se hem i biliv se yufala i save bildimap kingdom i bitim ol jeneresen blong bifo. Yufala i gat lav mo tras blong mifala, be tu, prea mo blesing blong mifala. Mifala i save se sakses blong jeneresen blong yufala i stamba blong Jos i gohed blong stanap mo blong kingdom i gro. Mifala i prea se bae yufala i mekem gud pat blong yufala: yufala i no stap blokem fes blong yufala, mo yufala i mekem samting folem huia yufala, setemap ol stret gol, mo bildimap kantri mo komuniti we yufala i laef wetem.
Foto blong Elda Kwentin L. Kuk we i kam long Kreg Daemon; foto pikja i kam long Skot Deves
Elda L. Tom Peri i bin mekem gud pat blong hem taem hem i bin stap long Japan.
Elda L. Tom Peri © IRI
Presiden Boed K. Peka i bin kasem blesing blong setem ol gol we oli stret mo gud.
Foto blong Presiden Boed K. Peka, oli no save mekem kopi