Fas Presidensi Mesej
Responsabiliti Ia blong Yumi blong Go Sevem Man
Long ol Lata-Dei Sent, nid ia blong go sevem ol brata mo ol sista we, from wan spesel risen o wan nara risen, oli aot long rod blong stap fulwan insaed long Jos, i wan samting we i impoten tumas long taem we i no save finis. ?Yumi save sam pipol olsem, we long wan taem, oli bin akseptem gospel? Sapos yes, nao, ?wanem nao responsabiliti blong yumi blong go sevem olgeta?
Tingting long olgeta we oli lus long medel blong ol olfala, olgeta we oli wido mo olgeta we oli sik. Plante taem tumas, yumi faenem olgeta oli stap long ples we i no gat man long hem we i drae, we oli stap long wan kona, mo samting ia, oli singaotem fasin blong stap yuwan. Taem yangfala taem i pas finis, taem helt i stap go daon, taem paoa i nomo strong, taem laet blong hop i nomo saen strong, i taem nao blong han we i save help, mo hat we i save gat lav mo sore i kam givhan mo sapotem olgeta.
I tru, i gat ol narafala we oli nidim blong oli sevem olgeta tu. Sam oli traehad wetem sin, mo sam narawan oli stap go olbaot from se oli fraet, o oli les, o oli no save samting. Nomata wanem risen i stap, oli mekem olgeta oli stap long kona blong olgeta, oli nomo kam long Jos. Mo bae oli stap lus olsem kasem taem we, insaed long yumi—ol aktiv memba blong Jos—wan filing blong go help mo sevem man i wekap.
Wan blong Soem Rod
Samtaem i pas, mi bin kasem wan leta we i kam long wan man we i bin aot long Jos. Hem i stap olsem eksampol blong plante memba blong yumi. Afta we hem i tokbaot olsem wanem hem i kam blong go inaktiv (nomo kam long Jos), hem i raetem:
“Mi bin gat plante samting, mo naoia mi gat smol samting nomo i stap. Mi no hapi mo mi filim olsem se mi no mekem wan gud samting nating long saed blong evri samting. Gospel i neva aot long hat blong mi, nomata hem i no pat blong laef blong mi. Mi askem ol prea blong yufala.
“Plis, no fogetem mifala we mifala i stap aotsaed ia—ol Lata-Dei Sent we oli lus. Mi save weaples Jos i stap long hem, be samtaem, mi ting se mi nidim wan narawan blong i soemaot rod long mi, i leftemap tingting blong mi, i tekemaot fraet blong mi, mo i talem testemoni blong hem long mi.”
Taem mi bin stap ridim leta ia, ol tingting blong mi oli tingbaot wan visit we mi bin mekem long wan bigfala art eksebisen blong wol—long Miusium ia we oli save gud long hem, Viktoria mo Albet Miusium, long London, Inglan. Longwe, insaed long wan frem, i gat wan Naesfala peinting we Josef Malod Wiliam Tena i pentem long 1831. Peinting ia i soem ol blak klaod we oli hevi, mo solwota we i raf tumas we i minim se i gat denja mo ded. Wan laet we i kam long wan sip we i lusum rod i saen longwe long solwota. Long fored blong peinting, i gat wan bigfala laefbot we ol wef we oli kam brok i saksakem olbaot. Ol man oli pul strong long saed blong laefbot ia taem i stap draon long strong raf solwota. Long soa, i gat wan waef mo tu pikinini i stanap, oli wetwet long ren mo win i blo strong long olgeta. Oli wari mo lukluk i go long solwota. Long maen blong mi, mi katemsot nem blong peinting ia. Long mi, hem i kam Go Sevem Man.1
Long medel blong ol strong win blong laef, denja i stap wet i stap. Ol man mo ol woman, ol boe mo ol gel, oli faenem se oli lus mo oli stap fesem fasin we bae oli prapa spolem olgeta. ?Huia nao bae i stiarem ol laefbot ia, i livim i stap biaen ol gudfala samting blong hom mo livim famle, mo i go sevem man?
Wok blong yumi i posibol blong yumi mekem. Yumi stap mekem wok blong Lod; yumi gat raet long help blong Hem.
Long taem blong seves blong Masta, Hem i singaotem ol man blong pulum fis long Galili, talem long olgeta blong oli livim ol net blong olgeta i stap mo folem Hem: “Bambae mi mekem yufala i kam ol man blong pulum man.”2 Bae yumi joenem ol laen blong ol man blong pulum ol man mo ol woman, blong mekem se bae yumi givhan long wanem we yumi save givhan long hem.
Diuti blong yumi, i blong go aot blong sevem olgeta we oli aot long sefti blong kam long Jos, blong mekem se yumi save tekem olgeta oli kam joenem lafet long tebol blong Lod mo kakae long toktok blong Hem, blong stap glad long kampani blong Spirit blong Hem, mo blong “oli no moa stap olsem we [oli] ol strenja, no [oli] man blong narafala ples. Naoia [oli] gat raet insaed long ples blong God, olsem ol narafala man blong God nomo, [Oli] insaed long famle blong God finis.”3
Prinsipol blong Lav
Mi bin faenem se i gat tufala stamba risen we i stap blong wan i kambak long Jos, mo blong hem i jenisim ol fasin blong hem, ol samting we hem i stap mekem oltaem, mo ol aksen blong hem. Faswan, wanwan man o woman i kambak from se wan i bin soem hem ol plante defren samting we hem i save mekem, mo i bin helpem hem blong mekem i kamtru. Man o woman ia we i no aktiv, i no save stap wetem samting we i nogud tumas taem oli luk se oli save kasem samting we i gud evriwan.
Seken, ol narawan oli kambak from se olgeta we oli lavem, o from “ol narafala man blong God” oli bin folem toktok blong Sevya, mo oli bin lavem neiba blong olgeta olsem we oli lavem olgetawan bakegen,4 mo oli bin helpem ol narafalawan blong mekem ol drim blong olgeta i hapen, mo ol samting we oli wantem long laef i kamtru.
Bigfala poen we i mekem samting i defren long rod ia, i bin—mo bae i gohed blong stap—prinsipol ia blong lav.
Long tru mining blong hem, olgeta pipol ia we oli stanap we oli lus long strong win blong peinting blong Tena, oli olsem plante lesaktiv memba blong yumi, we oli stap wet se olgeta we oli stiarem ol laefbot oli go sevem olgeta. Hat blong olgeta i singaot from help. Ol mama mo ol papa oli prea from ol boe mo gel blong olgeta. Ol waef oli askem long heven blong heven i tajem hasban blong olgeta. Samtaem, ol pikinini oli prea from papa mo mama blong olgeta.
Hem i prea blong mi, se bae yumi wantem blong go sevem hem we i lesaktiv mo tekem olgeta oli kambak long glad blong gospel blong Jisas Kraes, blong oli save gat raet, wetem yumi, long evri samting we ful felosip long Jos i gat blong givim.
Bae yumi go aot blong sevem wan we i lus we i stap raon long yumi: olgeta we i olfala, olgeta we oli wido, olgeta we oli sik, olgeta we oli handikap, olgeta we oli lesaktiv, mo olgeta we oli no stap obei long ol komanmen. Bae yumi stretem han blong yumi i go long olgeta; han ia we bae i help mo hat ia we i save lave mo sore. Taem yumi mekem olsem, bae yumi tekem glad i go long hat blong olgeta, mo bae yumi filim bigfala gud tingting we i kam long yumi taem yumi stap helpem wan narawan long rod ia we i go long laef we i no save finis.
Yusum Mesej Ia blong Tij
Tingting blong askem ol pipol we yu stap visitim sapos oli save eniwan we i bin stap traehad blong kam long Jos. Yu save jusum wan man o woman, mo toktok raon long ol wei blong soemaot lav, olsem blong invaetem hem blong tekpat long wan famle haos naet, o blong kam kakae wetem yu.
Life-Boat and Manby Apparatus Going Off to a Stranded Vessel Making Signal (Blue Lights) of Distress, i kam long Joseph Mallord William Turner © Victoria and Albert Museum, London, www.vandaimages.com