Mekem Wok blong Fasin blong Sevem Man I Go Hariap
Taem yumi stap invaetem, lavem, mo givim seves long ol narafalawan, yumi kam ol tru disaepol blong Jisas Kraes, mo yumi stap help blong mekem wok blong fasin blong sevem man i stap go hariap.
Nomata we tedei, ol fultaem misinari oli glad tumas blong mekem wok tru long Intanet, mo mekem ol tua long ol mitinghaos, olgeta jenis ia, oli wan smol pat nomo long bigfala wok blong fasin blong sevem man. Wanem i moa impoten, i olsem wanem nao, yumi, olsem ol memba, yumi fit insaed long bigbigfala pikja ia blong mekem wok blong fasin blong sevem man i go hariap. Oli no stap askem yumi blong wok long wan niu program. Oli stap leftemap tingting blong yumi nomo blong stap ol tru disaepol blong Jisas Kraes. Wok blong yumi i blong yumi draonem yumi long fasin blong lavem mo givim seves long olgeta we oli stap raon long yumi—givim kamfot long wan we yumi wok wetem we i stap long nid, blong invaetem ol fren blong yumi blong kam long wan baptaes, blong stap helpem wan neiba we i olfala blong klinim yad blong hem, blong stap invaetem wan lesaktiv blong kam kakae, o blong stap helpem wan neiba wetem famle histri blong hem. Ol wei ia, oli ol nomol wei blong stap glad, blong invaetem ol lesaktiv memba, mo olgeta we oli no blong Jos oli kam insaed long laef blong yumi, mo long semtaem, insaed long laet blong gospel. Taem bae yufala i serem ol gud taem mo ol tabu taem blong laef blong yufala wetem olgeta, bae i bes wei ia nao we eniwan long yumi i save wok long plantesen blong Jisas Kraes from wok blong fasin blong sevem ol sol blong ol man mo ol woman (luk long D&C 138:56).
?Wanem Nao Hem I Wok blong Fasin blong Sevem Man?
Wok blong fasin blong sevem man i wok blong Papa long Heven blong mekem man i nomo save ded mo i kasem laef we i no save finis (luk long Moses 1:39). Impoten wok ia i tekem ol memba i mekem misinari wok, fasin blong holemtaet ol konvet, mekem ol lesaktiv oli kam aktiv bakegen, mekem wok blong tempol mo famle histri, mo tijim gospel.1 Plante taem tumas, yumi tingting se ol defdefren saed ia blong gospel, oli no joen. Be insaed long Wok blong Fasin blong Sevem Man: Wol Lidasip Brodkas long 23 Jun 2013, Elda Rasel M. Nelson blong Kworom blong Olgeta Twelef Aposol i bin tijim se: “Tru, wok ia, oli no save serem long ol defdefren pat. Ol hadwok ia, oli no seperet; evriwan i pat blong wok blong fasin blong sevem man.”2
Toktok ia “Mekem Wok blong Fasin blong Sevem Man I Go Hariap”—nem blong fren websaet blong brodkas ia (hasteningthework.lds.org)—i tokbaot promes blong Lod we i talem se bambae Hem i mekem wok blong Hem i go hariap long stret taem blong hem (luk longD&C 88:73).
Ol stamba prishud odinens—baptaes, konfemesen, odinesen long prishud blong ol man, mo ol tempol odinens—oli stap olsem ol poen blong kasem long rod blong yumi blong gobak long Papa blong yumi long Heven. Taem yumi stap tekpat long wok ia blong fasin blong sevem man, yumi stap folem, mo stap givim insperesen long ol narawan blong folem rod ia blong kavenan.
Ol Memba mo Ol Misinari Oli Wok Tugeta Anda long Ol Ki blong Prishud
Taem ia i kam nao, blong yumi luklukgud bakegen long stamba prinsipol ia, we taem yu yu wan memba Jos blong Lod, i minim se oli singaotem yu blong wok fulwan long wok ia blong Hem blong fasin blong sevem man. Ol stek presiden mo ol bisop oli holem ki blong misinari wok insaed long ol yunit blong Jos blong olgeta3 mo oli stap helpem ol memba blong mekem wanem ol tru disaepol blong Kraes oli stap mekem—oli serem laet blong gospel. Ol misin presiden oli holem ol prishud ki we i mekem i posibol blong oli lidim wok blong ol misinari we oli stap lidim olgeta.4 Ol fultaem misinari, oli trenem olgeta blong tijim olgeta we oli bin rere blong akseptem gospel. Oli helpem ol memba wetem misinari wok blong olgeta, be i no nara wei raon. Long wei ia, ol fultaem misinari, mo ol memba misinari, oli ol patna blong tekem gospel i go insaed long laef blong olgeta pipol we Lod i bin mekem olgeta oli rere blong akseptem.
Long taem blong brodkas, Presiden Tomas S. Monson i bin talem: “Taem naoia, i taem blong ol memba mo ol misinari oli kam tugeta, blong oli wok tugeta, blong wok insaed long plantesen blong Lod blong tekem ol sol oli kam long Hem. Lod i bin rere long ol tul blong yumi, blong yumi serem gospel long plante defren kaen wei, mo bae Hem i helpem yumi long ol wok blong yumi sapos yumi tekem aksen wetem fet blong mekem wok blong Hem i hapen.”5
Elda Nil L. Andesen blong Kworom blong Olgeta Twelef Aposol i bin tokbaot olsem wanem lav i impoten. Hem i bin talem: “Yumi wok tugeta wetem fet mo fasin blong stap wan—wetem fet se Lod bae i lidim wokbaot blong yumi, mo fasin blong stap wan wetem wanwan long yumi, mo wetem ol misinari; mo oltaem lav we yumi gat long Jisas Kraes, lav we yumi gat long wanwan long yumi, mo lav we yumi gat long olgeta we yumi stap wok from bae i pusum yumi long wok ia.”6
Ol Wod Kaonsel Oli Lidim Wok, Ol Wod Misin Lida Oli Kodinetem Wok
Anda long daereksen blong bisop, wod kaonsel i help, i sapotem, mo i kodinetem ol wok blong ol memba blong wod taem hem i mekem ol plan mo hem i stap lidim wod long wok blong fasin blong sevem man.7
Olsem wan memba blong wod kaonsel, wod misin lida “i kodinetem ol hadwok blong wod blong faenem, blong tijim, mo blong baptaesem ol investigeta. Hem i kodinetem wok ia wetem wok blong ol fultaem misinari.”8
Taem hem i bin stap toktok i go long ol wod misin lida, Elda Nelson i talem: “Helpem ol misinari blong fulumap ol apoenmen buk blong olgeta wetem ol gudfala janis mo apoenmen blong mekem se oli no nid blong noknok long ol doa blong stap lukaotem ol pipol blong tij. … Yufala nao, i rop blong joenem ol misinari, wod kaonsel, mo ol memba blong wod.”9
Tru Mak blong Sakses
Olsem ol Lata-dei Sent, yumi gat blesing ia blong stap laef long taem ia, we Lod i stap mekem wok blong Hem i hariap. From se God i gat wan stamba tingting blong putum yumi long wol long taem naoia, nao yumi gat paoa ia blong mekem moa bitim wanem we yumi save mekem. Sapos nomo yumi stap gohed blong go aot long olgeta man mo woman we oli nidim fren mo help wetem kaen fasin mo wetem lav, bambae yumi no save mestem wok ia. Misinari sakses i kam folem insperesen we i stap kam long maen mo hat blong yumi, mo taem yumi stap invaetem nomo olgeta narafala man insaed long laef blong yumi we i folem gospel. Invitesen ia, i mak blong sakses; i no sapos ol pipol oli kasem baptaes o no, o oli kam aktiv insaed long Jos. Olsem we Jefri R. Holan blong Kworom blong Olgeta Twelef Aposol i bin talem abaot bigfala ami blong ol misinari we oli stap go insaed long misin fil: “Taem i kam long yumi blong yumi mas talem naoia ‘luk oli kam.’ Yumi evriwan i mas mekem plan, mo yusum tul ia we heven i sendem long wan wei we wok ia i givim frut blong hem.”10
Hem i taem naoia, blong yumi evriwan i andastenem klia moa, pat ia we yumi mas wokem, blong mekem wok blong fasin blong sevem man i go hariap. Taem yumi stap mekem ol memba misinari wok blong yumi, stap holemtaet ol konvet, stap mekem ol lesaktiv oli kam aktiv bakegen, stap mekem tempol mo famle histri wok, mo stap tijim gospel olsem wan nomol pat blong laef blong yumi, bambae yumi gat bigfala glad, mo bae yumi kasem ol presen blong spirit we yumi nidim blong mekem Jos ia i kam strong moa long namba 21 senturi.
Foto pikja i kam long Deved Stoka
Ol foto pikja oli kam long Jon Luk mo Kodi Bel