?Wanem Nao I Tekem Yu Kam long Reksbeg?

Sandra Ras, Aedaho, YSA

Afta plante yia we mifala i laef long ples we ol memba blong Jos oli no plante tumas, hasban blong mi mo mi i muv i go long wan ples long Reksbeg, Aedaho, YSA, we long hem, i gat tu famle nomo we i no memba. Mitufala i laki gud blong stap long saed blong wan long tufala famle ia.

Papa i stap katem gras, hemia long fas taem we mifala i draev long rod i go insaed long haos. Hasban blong mi mo mi i wokbaot krosem yad blong mitufala blong go luk mo save hem. Taem mi stretem han blong mi, mi askem: “So, ?wanem nao i mekem famle blong yu i kam long Reksbeg?”

Hem i ansa: “Wok blong mi—mo mifala i stap lukaotem wan taon we i nidim blong save abaot Kraes.”

Mi filim olsem oli sakem wan baket kol wota long fes blong mi, be mi smael. Mi putum tingting long mi, long taem ia, se nomata wanem niufala neiba blong mitufala i talem o mekem, bae mifala i ol bes neiba ia we famle ia bae i gat. Bae mifala i traem blong mekem samting wetem olgeta long wan wei we i gat kaen fasin, lav mo i stret, semmak olsem we bae Sevya i mekem.

Folem eit yia afta, plante aktiviti i bin tekem ples bitwin ol famle blong mifala. Oli invaetem mama ia i go long ol Rilif Sosaeti mo ol aktiviti blong Rilif Sosaeti. Hem i invaetem mi mo plante Lata-dei Sent long wan Kristin dei aot we Jos blong hem i oganaesem. Oli bin invaetem hasban blong mi mo mi i go long danis blong pikinini blong olgeta mo long piano konset blong olgeta. Oli putum olgeta tu i stap long lis blong ol taem blong kuk mo pati blong ol neiba. Mo ol bigfala pikinini blong olgeta oli stap ringim mifala taem oli nidim blong mifala i draevem olgeta i kambak long haos afta wok, taem oli no save kasem papa mo mama blong olgeta.

Papa mo mama i wari se bae ol pikinini oli stat blong laekem tumas ol Lata-dei Sent, mekem se oli no letem ol boe blong tufala blong joenem Wod Skaot program. Be oli tekem se hom blong mifala i wan sef ples we ol pikinini blong tufala i save kam plei taem ol apu pikinini blong mitufala i stap kam.

Evri taem ol neiba blong mifala oli traem blong helpem mifala blong luk “ol mistek blong fasin blong mifala,” mifala i talem bakegen long olgeta se mifala i gat bigfala respek long bilif blong olgeta mo wei we oli laef mo tijim ol pikinini blong olgeta. Afta, mifala i talemaot se mifala i wantem luk semfala respek from ol bilif blong mifala, we i lukluk tu long ol tijing blong Sevya.

Taem mama i traem blong soemaot se ol samting we oli defren bitwin mifala i bigwan, i tumas mo talem se ol Lata-dei Sent oli stap biliv long wan “defren Jisas,” mi stap talemaot long hem bakegen se mitufala tugeta i biliv se Jisas i kam long heven, mo Hem i Pikinini blong God we God i lavem tumas. Long en, hem mo mi i gat wan gudfala rilesensip.

Famle blong olgeta i muv i go defren ples, be oli no joenem Jos. Be sapos oli save talem se: “Mifala i bin laef long medel blong ol Momon; oli ol gud pipol we oli gat respek, mo ol tru hat,” nao bae mi filim se mifala i gat sakses blong stap olsem ol gud neiba, mo helpem olgeta blong kam moa open mo stret long jajmen blong olgeta abaot ol Lata-dei Sent.