Stap Invaetem Sevya blong Kam Insaed
“Yufala i luk. Mi mi stap stanap long doa, mi stap kilkilim doa. Sipos wan man i harem tok blong mi, i openem doa, mi bambae mi kam insaed long haos blong hem” (Revelesen 3:20).
Taem mi bin wan smol boe, long taem blong Krismes, mama blong mi bae i putum wan pikja blong Sevya we i stap noknok long doa blong mifala i luk. Mifala i no bin memba blong Jos yet, mo oltaem mi askem, “?From wanem Jisas i stap noknok long doa? ?Huia i stap narasaed long doa?”
Sam yia afta, mi bin faenem se i no bin gat wan handel aotsaed long doa ia we Sevya i stap noknok long hem. Man we i stap insaed i nidim blong openem doa ia. Naoia mi save huia i stap narasaed long doa ia. !Yumi ia nao! Sevya i stap noknok, mo yumi evriwan i mas openem doa ia mo invaetem Hem blong kam insaed long ol laef blong yumi.
Taem mi bin wan yangfala, mi disaed blong invaetem Sevya i kam long laef blong mi tru long baptaes mo blong kam wan memba blong Jos. Ol fren blong mi oli bin ol gud eksampol long mi. Mo apu woman blong mi tu. Hem i bin stap wok long tempol long Los Anjeles Kalifonia Tempol. Bae hem i aot long haos long 4 klok long eli moning blong givim seves long Lod long tempol.
Tu yia nomo afta we mi bin kasem baptaes, mi bin disaed se mi wantem blong givim seves long Lod olsem wan fultaem misinari. Long misin blong mi, mi bin helpem plante man blong lanem abaot Sevya blong oli save invaetem Hem long ol laef blong olgeta.
Samtaem afta, mi bin givim seves olsem wan misin presiden long Samoa. Oltaem mi askem ol niu misinari wetaem nao oli bin disaed blong go long wan misin. Plante oli taem se oli bin jusum blong sevem wan misin taem oli bin stap long Praemeri.
Praemeri bae i helpem yu blong rere from misinari wok. Lanem plante we yu save mekem. Putum wan gol blong go long wan misin. Afta bae yu tu bae yu save helpem ol nara man blong invaetem Sevya i kam long ol laef blong olgeta. Blong stap wan misinari bae i jenisem laef blong yu—i bin jenisem laef blong mi.
I kam long Jenifa Tolman