Mi Bin Stap Hom

Stiven Senberi, Kalifonia, YSA

Olsem pat blong wan seves projek, mi bin go long wan trip i go long Rwanda wetem sam narafala dokta blong help wetem sam helt nid. Afta long 2 wik, kolosap long en blong trip blong mi, mi tingting tumas i gobak hom. Mi misim famle blong mi, gudfala bed blong mi, mo hom blong mi.

Long las Sandei blong mi long Afrika, mi bin save stretem taem blong mi blong wok, blong mekem se mi save go long Jos. Nomata we oli no luksave Jos yet long Rwanda, mi bin save faenem, long websaet blong Jos, taem blong miting blong Jos mo daereksen blong go long Jos.

Mo ?wanem nao daereksen i stap?: “Wokbaot i go daon long ston rod i krosem bilding blong Ministri. Lukaotem wan get we i open. Afta wokbaot i go daon long ol step.”

Taem mi bin stap folem ol daereksen ia, mi stat blong harem klia kores blong wan hym we mi save gud. Mi go daon long ol step, mo ol toktok blong “Tijing blong Jisas Oli Stamba blong Yumi” (STSP, pej 6) i kasem sora blong mi. Ol step ia oli stop long wan smol bilding. Insaed i gat ova long 12 pipol i stap fasfas raon long doa blong go insaed. Nomata we mi mi wan strenja long kongregesen we i stap ia, mi filim stret se oli famle blong mi. Plante brata mo sista blong Rwanda oli kam fored blong sekhan long mi, mo taem oli bin mekem olsem, bigfala filing ia se mi stap miwan i kamaot long baksaed blong mi—!Mi bin stap hom!

Taem mi go insaed long bilding, mi go long nomol tri aoa miting, we i no defren nating long hemia we mi stap go long hem long hom wod blong mi long Kalifonia. Olgeta we oli gat Aronik Prishud oli pasem sakramen, ol toktok oli tokbaot Sevya, mo tu long Sandei Skul lesen, i semwan we oli tijim long hom wod blong mi long wik ia.

Moa impoten long hemia, Spirit blong Lod i kavremap blokem ol seves ia. I klia. Lod i smaelgud long ol gudfala pipol ia we oli traem bes blong olgeta blong givim seves long Hem. Mi bin lanem se long ol yia bifo, i gat wan smol namba blong ol man Rwanda we oli stap kam long seves long ples ia. Yet, mi kaontem se i gat ova long 100 we i kam, mo haf long olgeta oli ol smol pikinini we oli smael.

Naoia, Rwanda i open blong oli mekem misinari wok long hem, mo mi ting se ol misinari oli gat bigfala sakses taem Spirit i testifae long wan namba, we i stap go antap, blong ol investigeta blong Rwanda, se Jos we i kambak i kingdom blong God blong ful wol—blong evri graon, blong evri pipol, mo evri pikinini blong God. Mi talem tangkyu tumas from Jos, we i stap long medel pat blong Kalifonia, o daon long wan rod blong ston long medel blong Afrika.