Raon long Jos
Mongolia I Selebretem 20 Yia blong Jos
Long Mandei 15 Epril 2013, moa bitim 300 Jos memba i bin kam tugeta long Saisan Hil long Ulanbatar, Mongolia, blong selebretem nambatwante aniveseri blong Jos long kantri ia. Wan kwaea blong 50 memba i bin singsing, mo grup i bin lisin long wan rekoding blong Elda Nil A. Makswel (1926–2004) taem we hem i bin stap dediketem Mongolia blong oli save stat prijim gospel long kantri ia long 1993.
Elda Tai Kwok Yuen, we long wan taem, i bin memba blong Esia Eria Presidensi i bin kam wetem Elda Makswel long Mongolia long 1993, i bin luk olsem wanem “ol han blong Lod i no bin stop blong muv long pat ia blong plantesen blong hem.”
Plante defren aktiviti truaot long wik ia i bin makem aniveseri ia. Wan kam tugeta blong ol misinari i bin tekem 200 riten misinari i kam tugeta. Moa bitim 1,000 misinari blong Mongolia we oli bin wok olsem fultaem misinari—kolosap 1 aot long evri ten memba long Mongolia. I bin gat ol seves blong baptaes truaot Mongolia long Fraedei naet; 24 pipol i bin kasem baptaes long dei ia. Meri N. Kuk, Yang Woman jeneral presiden we i jes rilis nomo, i bin toktok long wan divosen blong ol Yang Woman, mo wan famle histri open haos we i soem wan vidio we i abaot niu Famle Tri Projek. Wan kalja naet we i soem ol rij kalja mo talen blong plante Jos memba blong Mongolia.
Ol Lata-dei Sent long Haiti I Selebretem Aniveseri, Oli Help blong Planem Ol Tri
Long namba 1 Mei 2013, ol memba blong Jos long Haiti oli bin tekem pat long wan bigfala projek blong planem tri raon long kantri. Wan bigfala namba blong ol smosmol plant, oli bin plantem long fas dei blong projek, mo plante moa bae i folem. Taem projek ia i finis, bae samples 400,000 niufala tri i gro long Haiti, mo i gat ol laman, aranis, kokonas, popo, mo ok tri.
Jos i pem ol tri ia olsem pat blong gohed blong sapotem Haiti afta we etkwek i bin spolem olgeta. Projek ia i givim janis tu long ol memba blong mekem wan seves projek blong selebretem 30 aniveseri blong Jos long aelan nesen ia. 30 yia i pas, Presiden Tomas S. Monson, afta we i kam wan memba blong Kworom blong Olgeta Twelef Aposol, i bin visitim Haiti mo dediketem graon ia blong oli prijim gospel we i kambak.
Elda Nil L. Andesen blong Kworom blong Olgeta Twelef Aposol i bin stap long Haiti long taem blong selebresen ia mo prisaed long seremoni ia blong presentem ston ia we oli raet long hem we i makem stat blong Jos long Haiti.
Jos I Donetem Wan Milian Paon blong Kakae blong Stap Fidim Amerika
Long Mei 2013, Jos tru long yumaniterian sapot blong hem, ol Lata-dei Sent oli bin donetem moa bitim wan milian paon blong kakae blong stap fidim Amerika, long bigfala oganaesesen blong fidim ol man long Yunaeted Stet we i no wan bisnis. Long donesen ia i gat insaed ol tin kakae olsem ol frut, vejetebol, mo ol bin, we bae oli givimaot i go long ol famle we oli stap long nid tru long ol komuniti ples blong storem kakae mo ol komuniti haos raon long Yunaeted Stet.
Bob Aiken, presiden mo jif eksekutiv ofisa blong Fidim Amerika, i bin talem se donesen ia bae i inaf blong kukum samples 625,000 plet kakae.
Ol man blong danis wetem fan, oli mekem namba “20” long wan so we i bin tekemples blong tingbaot namba 20 aniveseri blong Jos long Mongolia.
Mongolia Ulanbatar Misin i givim raet blong yusum foto ia
Ol misinari mo ol memba long Haiti we oli planem ol tri long ol hil antap long kaptel siti blong Poro Prins, we i stap biaen long foto ia.
Foto i kam long Jeson Swensen