Kasem Taem Yumi Mit Bakegen
Mi Swea …
Ol toktok blong swea i fas gud long ol toktok blong mi olsem ol nil blong gras ia we i fas long hea blong dog.
Kaen lukluk ia we i stap long fes blong Mama blong mi, i brekem hat blong mi. Hem i sek. Wari. Harem Nogud. Ol samting ia i bin fulumap ol ae blong hem wan afta narawan mo afta i mekem hem i harem nogud bigwan.
Nomata ol tijing blong hem long mi kasem we mi gat 15 yia blong gat hona long Papa long Heven long ol toktok mo wok, mi stanap i stap, harem nogud long wan rabis toktok we mi mestem i kamaot long maot blong mi.
Mi no bin minim blong swea. Bifo long yia ia, mi neva yusum ol rabis toktok. Be long sama ia mi bin wok blong Gem Fising Dipatmen long Yuta mo pikmap sam fasin blong ol narafala boe we i stap wok tu wetem mi.
Wok blong mifala we mifala i stap mekem oltaem i blong katemaot ol rabis gras long saed blong ol rod. Mifala i bin disaed kwik se Arctium minus (Aktium Maenes) i wan rabis gras we i spesel lelbet. Hem i gro long wan hip long eniples, mo i kavremap eni narafala plan. Ol nil blong hem i stikim eni samting we i fas long hem.
Wetem ol savel long han, mifala i traehad blong karemaot ol gras ia long ful sama kasem we mifala i taed gud—mo wetem rabis toktok. Long fastaem mi bin faenemaot se ol toktok blong olgeta i oraet nomo. Afta mi stat blong akseptem. Long en, mi stat yusum. I kam long en blong sama, Ol swea toktok i fas gud long ol toktok blong mi olsem ol nil blong gras ia we i fas long hea blong dog.
Aksen blong mama from mi mestem toktok blong mi, i givim strong tingting long mi se mi nid blong jenis.
Hem i no bin isi. Blong swea i no wan joes nomo blong ol toktok. Hem i wan fasin tu blong tingting. Ol storian we yumi letem i kam long ol laef blong yumi, ol toktok we yumi ridim, mo ol pikja we yumi luk i jenisem tingting blong mifala.
Wetem fasin blong talem tangkyu, mi bin aktiv blong atendem jos mo seminari. Fasin blong swea i karem i kam plante hae tingting, be from mi stap long wan ples we i isi blong fas wetem olgeta we oli gat hae tingting, i mekem se ol rus i gro bakegen. Mi bin tingting strong blong ridim olgeta skripja evri dei mo stap prea. Mi no bin watjem ol muvi mo televisen program we i save soem bakegen ol tingting blong tudak
Slo slo, mi luk se lanwis blong mi i stap kam moa gud. Long en blong yia ia, mi bin kamaot long fasin ia blong stap wea.
Afta long eksperiens ia, mi bin lanem plante abaot paoa blong ol toktok. Ol toktok i save statem wan samting o i save smasem gud. Oli save mekem man i harem nogud, o oli save hilim man. Oli save spolem nogud man, o oli save ol planem ol sid blong hop mo lav.
Mi luk hemia i intresting se Sevya Hemwan, we i Krietem heven mo wol, oli lukluk long hem olsem ol Toktok (luk Jon 1:1–4 D&C 93:6–11).
Mi bin lanem se fasin blong swea i gat ol stret mining semmak olsem hemia we i no stret. Mifala i swea blong talem trutok long wan kot loa. Mifala i promes, o swea, blong kipim ol komanmen blong God taem yumi kasem baptaes. Semmak, yumi mekem ol tabu promes blong kipim ol tempol kavenan blong mekem se yumi save kasem ol bigfala blesing long Papa long Heven.
En blong stori i olsem: Yumi kam moa olsem Toktok ia taem we ol toktok blong yumi i givim hona long Hem mo i soem glori blong Hem.
oto i kam long Ana Lorent