Stap Helpem Vaelet

I kam long Salot Mae Sepad

I kamaot long wan tru stori

“Yufala i mas lavem ol man we i stap raonabaot long yufala” (Mak 12:31).

?Olsem Wanem nao Ema i save kaen taem Vaelet i strong tumas?

Ema i hang strong long basket blong hem biaen long bak blong hem, taem hem i stap wokbaot i go long niufala klasrum blong hem. Hem i bin fas dei blong skul. Hem i bin werem dres we hem i laekem tumas, mo Mama i bin fulumap wan spesel kaekae blong hem blong lanj—ol animol biskit.

“Tedei bae i wan gud dei,” Ema i stap tingting long hemwan. “Hemia nomo sapos—”

Ema i stop mo lukluk i go narasaed long klasrum. Hemia hem. Vaelet.

Las yia, Vaelet i bin stap bos nomo long gem blong mangki long evri brek. Hem i bin singaotem Ema long plante nem. !Hem i bin stilim bes fren blong Ema tu!

Vaelet i bin luk Ema mo i soem tang blong hem long hem. Ema i lukluk bak hem wetem kros, wetem han blong hem i hang strong long basket blong hem biaen long bak. Vaelet i no bin gud fren nating truaot ful las yia, mo i luk olsem se yia ia bae i semmak nomo.

“!Welkam long wan niu yia, klas!” Mis Kodwel i talem long fored blong rum. “Bae mi jusum ol jea blong yufala.”

Oli laenemap ol desk long tu tu krosem klasrum. Mis Kolwel i go tru long rolkol wetem fingga blong hem; afta hem i poenem tu desk long biaen. “Ema. Bae yu sidaon biaen longwe.”

Ema i bin sidaon long wan long ol desk biaen. Hem i hop se Lisel bae i sidaon kolosap long hem. O Jem. O—

“Vaelet”

Hed blong Ema i go antap kwik. ?Hem i stap harem stret ia?

Yes. Mis Kolwel i stap poenem yet desk ia we i stap long saed blong hem. “Bae yu stap kolosap long Ema, Vaelet,” hem i talem.

Vaelet i muv slo nomo wetem wan strong fes i go long Ema. Ema i putum hed blong hem antap long desk blong hem mo lukluk i go long wol. Bae hem i wan longfala yia.

Long taem blong lesen blong mats, Mis Kodwel i bin raetem sam problem long blakbod blong klas blong oli faenem ansa blong hem. “Yu save wok yuwan o wetem neiba blong yu,” hem i talem.

Kwiktaem Ema i tanem pepa blong hem i go long hem, mo mekem olsem se hem i bisi. Ol problem ia i isi. Hem i stap traem nomo blong no luksave Vaelet. Hem i no bin lukluk hem nating long ful moning.

Wan samting i stikim solda blong hem. I olsem wan pensel. Ema i no wantem save.

Wan moa stik bakegen. !Vaelet i stap stikim hem! Ema i gohed blong wok strong nomo.

Nambatri taem we Vaelet i stikim hem i so nao. Ema i save filim hemwan se hem i hot insaed. ?Bae ful yia ia i olsem nao? Hem i tingting blong leftemap han blong hem blong talem Mis Kodwel. O ating bae hem i lukluk strong nomo Vaelet.

Afta Ema i harem wan noes blong krae. ?Wan man i stap krae? Pensel ia i stikim hem bakegen. Hem i luk i go mo luk Vaelet we i stap lukluk hem. Pensel blong hem long han, mo wota blong ae long fes blong hem. Pepa blong hem, i fulap wetem toti we raba i mekem.

Vaelet i tantanem pensel long ol han blong hem. “?Yu save helpem mi?” hem i askem kwaet nomo.

Ema i lukluk hem blong wan minit, wetem sapraes. ?Vaelet i wantem hem blong helpem hem? Afta we hem i bin nogud oltaem? Ema i tanem hem bakegen i go long pepa blong hemwan. Vaelet i save wok hemwan. Hem i no gud inaf blong kasem help blong Ema, nomata sapos hem i …

… ?neiba blong hem?

Kwaet nomo, Ema i lukluk i go fored. Hem i save harem Vaelet i stap krae slo kolosap long hem. Ol skripja i talem oltaem blong hem i lavem neiba blong hem—!be Vaelet i defren! Ema i sidaon nomo kolosap long hem long klas!

Ema i bin go bak mekem wok blong hemwan. Afta hem i stop. Ating Vaelet i no bin defren. Ating taem ol skripja i talem blong lavem neiba blong yu, oli minim evriwan. Olgeta we oli nogud tu. Nomata sapos oli had.

Ema i pulum win mo putum sloslo pensel blong hem i go daon. Hem i tanem hem i go long Vaelet mo traem bes blong hem blong smael. ?“Mi save help?” hemi askem.

Vaelet i seksekem hed blong hem blong talem yes, mo waepem wota blong ae blong hem wetem han blong hem.

Ema i lei i go fored long pepa blong Vaelet mo stat blong helpem hem wetem fas problem. Hem filim finis wan gudfala filing insaed long hem. Hem i stap tingting sapos Vaelet i laekem ol animol biskit ia.