Oktoba Konfrens Notbuk
Samfala Tingting blong Jeneral Konfrens
Woman we i raet ia, i stap long Wasington, YSA.
“?Traem Talem se Huia I Stap Kam Kakae Tedei long Naet?”
Fiftin dei bifo stat blong wanwan jeneral konfrens, famle blong mifala i hangem wan notis we i anaonsem stat blong “?Traem Talem se Huia I Stap Kam Kakae Tedei long Naet?” Afta, mifala i ademap ol las pikja blong ol profet, sia mo reveleta we i stap long ol las konfrens edisen blong ol magasin blong Jos.
Mi rere fastaem taem mi lukaotem ol samting abaot profet we bae mifala i welkamem long naet ia. Samtaem, mi faenem ol samting raon long haos we bae i ripresentem sam samting we mi bin faenemaot, mo mi putum olgeta long wan plet. Long taem blong kakae long naet, taem mi stap talem ol stori abaot wanwan samting ia, evriwan i traem blong faenemaot se huia nao man ia. Sam narafala taem, mi talem wan o tu stori we profet i bin serem long taem blong las jeneral konfrens.
Mi sapraes tumas long ol samting we ol pikinini blong mi oli tingbaot abaot ol profet mo aposol blong yumi we yumi lavem tumas; mo tu, mi save se simpol gem ia i mekem lav mo save blong mi abaot ol bigfala man ia i kam antap.
Kopi blong Mi blong Konfrens
Taem Elda Nil L. Andesen blong Kworom blong Olgeta Twelef Aposol mo waef blong hem, Keti, i bin visitim stek konfrens blong mifala, Sista Andesen i bin serem wan stori wetem mifala. Hem i talem se taem oli bin stap laef long Franis, hem i bin mekem ol fotokopi blong ol toktok blong konfrens blong wanwan pikinini blong olgeta—wetem ol smol yangfalawan tu. Hem i sek taem hem i faenemaot praes blong ol fotokopi, we i sas tumas. Afta, tingting i kam long maen blong hem: ?Hamas nao i impoten long yu mo famle blong yu blong gat ol toktok blong ol profet?”
Stori ia i tajem mi, mo mi mekemsua se evriwan long famle blong mifala i gat kopi blong hemwan blong ol toktok blong konfrens. Ol gel blong mitufala i glad tumas. Mifala i yusum olgeta long famle haos naet mo long taem blong skripja stadi. Mi lavem blong luk wan gel blong mi i ridim ol toktok ia hemwan mo i stap makem olgeta wetem haelaeta. Wan nara gel, we i jes baptaes, i plis long mi blong ridim ol toktok wetem hem, mitufala nomo.
Konfrens Jalenj
Olsem pat blong lesen blong mi long Rilif Sosaeti, mi bin givim jalenj long wanwan sista blong luklukbak long ol toktok blong las konfrens; sam sista oli ridim bakegen ol toktok ia, samfala oli lukluk bakegen olgeta toktok ia long Intanet. Samfala sista oli talemaot olsem wanem oli bin filim se oli rere moa from konfrens we i stap kam.
Foto pikja i kam long Kalos Isrel Giteres Robles