Wan Bokis blong Ol Pikja
Sindi Hegi, Albeta, Kanada
Sam yia i pas, hasban blong mi mo mi i stap go sakem ol doti long ples blong doti taem mi luk wan woman we i wok long ples ia, i pikimap wan bokis blong putum long masin blong faea blong bonem doti. Be, bokis ia i brok, i open, mo sam foto oli foldaon.
Taem mi stap lukluk i go, mi gat strong filing blong go mo karem bokis blong pikja ia. Mi jiamaot long trak blong helpem hem blong pikimap ol pikja. Woman ia mo mi i filim se ol foto ia, ating oli mestem mo oli sakem, mo mi winim tingting blong hem blong hem i letem mi tekem ol pikja ia blong traem faenem wan we i wantem gat ol pikja ia.
Taem mi gotru long plante handred foto insaed long bokis ia, mi faenem wan envlop wetem wan adres blong wan long Wobeg, Albeta, Kanada. Ova long ol yia we i kam afta, mi bin raetem sam leta i go long sam pipol wetem semfala las nem ia, be mi neva gat wan ansa.
Afta we famle blong mifala i kasem Intanet, mi faenemaot se i bin gat wan histri sosaeti long Wobeg. Mi bin askem sapos eniwan we i wok long ples ia i luksave ol nem we mi bin faenem long bak blong ol pikja ia.
Wan manis afta, mifala i kasem wan telefon kol i kam long wan man we histri sosaeti i bin kontaktem hem. Hem i talem se sista blong hem i stap kolosap long mifala, mo hem i askem sapos hem i save luk ol pikja. Yes, mifala i talem yes long hem.
Long nekis dei, Floed mo Bet Hotorn, tufala i Lata-dei Sent, tufala i kam blong luk ol pikja. Taem mi openem bokis, Brata Hotorn i talem: “Yes, hem hemia,” i poenem i go long pikja we i stap antap evriwan. Hem i pikja blong bubuman blong Sista Hotorn.
Taem oli pikimap wan pikja folem nara pikja, Brata mo Sista Hotorn i talemaot stori abaot ol pipol long wanwan foto. Tufala Hotorn i gat tu tingting se tufala i famle wetem man o woman we i bin sakem ol foto ia, mo oli no save from wanem ol foto ia oli go kasem ples blong doti.
Mi bin gat strong filing se Papa long Heven i bin helpem mi blong givimbak ol foto ia long Hotorn famle. Mi testifae se wok blong famle histri i wan long ol wok we i impoten blong yumi mas mekem. Sapos yumi glad blong mekem wok, Lod bae i helpem yumi blong mekem wok ia.