?Bae Matiu I Kambak o Nogat?

Oli no talemaot nem

Mifala i bin gat wan strong grup blong ol yang man insaed long wod blong mifala, be boe blong mitufala, Matiu, i stap go folem wan we i no memba, we i laekem ol trak mo eni samting we i wok wetem enjin. Sore tumas, yangfala man ia i kamaot long wan famle we i no tingting tumas long relijin. Papa mo mama blong hem i letem fasin blong dring mo smok insaed long hom blong tufala, mo oli no bin biliv se i impoten blong stap klin long saed blong seks.

Matiu i kasem top mak long Skaot, be hem i no bin tekpat long awod miting from se hem i bin stop blong laef folem ol standet blong Skaot. Mi tekem evri Skaot awod blong hem, mo mekem wan smol bokis blong putum gud olgeta. Afta, mi putum i go long wan kona, mi hop se wan dei, ol samting ia bae oli kam impoten long hem. Taem hem i kasem 16 yia, Matiu i stap smok, i stap dring, mo i stap tekem ol drag. Hem i dropaot long skul mo i muv i go stap long haos blong gelfren blong hem. Blong 2 yia olsem, mifala i no stap luk hem.

Mifala i bin harem nogud tumas. Mifala i no save se bae hem i kambak long famle blong hem mo long relijin blong hem o no, be mifala i disaed blong folem eksampol blong Alma, long taem we hem i stretem boe blong hem we i mestem rod. Alma i bin gohed blong lavem boe blong hem, mo i bin prea wetem fet se bae “oli save tekem yu i kam long save blong trutok” (Mosaea 27:14).

Mifala i bin prea oltaem blong Lod bae i mekem wan samting long laef blong Matiu, mo mifala i tekem evri janis blong talemaot, long toktok mo aksen, hamas mifala i lavem hem. Taem bae hem i kam long haos, bae mifala i no talem eni samting we bae hem i save tanem olsem wan nogud toktok o wan jajmen. Mifala i stap talemaot glad blong mifala blong stap luk hem.

Wan dei, Matiu i kam hom, mo i talem se hem i wantem toktok. Hem i talem se hem i bin mitim wan gel long wan pati, we i gat kwestin abaot Jos. Bifo hem i talem long gel ia se hem i nomo save ol ansa ia, ol toktok oli stat blong kamaot long maot blong hem. Hem i luk se hem nomo i stap ansarem ol kwestin blong gel ia i kwik nomo olsem gel ia i stap askem kwestin. Matiu i talem se hem i no tingbaot se hem i bin lanem eni samting we hem i bin talem, be hem i save se ol toktok we hem i bin talem oli tru. Hem i stap askem hemwan, se from wanem hem i stap gohed long rod ia blong laef we hem i stap long hem, mo semtaem, i stap biliv yet long gospel.

Afta tri dei we hem i stap luklukgud long sol blong hem, hem i disaed blong livim biaen laef ia we hem i bin stap lidim. Hem i bin kam hom blong askem help blong hem i stat bakegen.

Matiu i ringim wan kasen brata long wan narafala stet, we i bin winim ol semfala hadtaem, mo i bin askem brata ia sapos hem i save stap wetem hem. Kasen brata blong hem i bin agri, mo Matiu i stat blong go long ol miting blong Jos wetem hem, mo i mitim bisop blong kasem help blong go tru long rod blong sakem sin. Hem i bin filim lav, mo sapot, mo i kam aktiv insaed long Jos.

Long stret taem, hem i mitim wan naesfala yang woman we i gat stret mo gud fasin. Tufala i lavlavem tufala mo tufala i bin mared insaed long tempol.

Taem fas bon pikinini blong tufala i bon long wol ia, mi bin go blong visitim tufala mo tekem smol bokis ia we mi bin mekem wetem ol Skaot awod blong hem. Hem i glad tumas, mo wetem gud hae tingting, hem i hangem long wan ples we oli save lukgud insaed long hom blong hem.

Wan enjel i bin kamaot long boe blong mitufala, olsem i bin hapen long Yangfala Alma. Be rod ia blong Matiu i kambak long trutok, i wan merikel nomo.