Bigfala Misinari Raet blong Yumi
Evri misinari, blong bifo o blong tedei, oli givim seves wetem hop blong mekem laet i moa gud long ol nara pipol.
Ol misinari blong tedei, oli tekem wetem olgeta, wan bigfala histri blong fulumap wol wetem save abaot Lod (luk long Aesea 11:9). I stat long Ebraham i go long Pol, i go kasem Wilfod Wudrof, ol misinari long ol skripja mo histri blong Jos oli stap ol bigfala eksampol long ol misinari blong tedei.
Nomata yumi ol memba misinari, o yumi stap rere blong wan fultaem seves, o yumi stap long wan misin, o yumi kambak long wan misin, yumi save tekem strong paoa long tingting mo insperesen we i kam long ol eksampol ia.
Misinari Raet blong Yumi insaed long Baebol mo long Perel we I Gat Bigfala Praes
Ol misinari blong bifo, olsem Jona, oli bin singaotem olgeta blong givim wan voes blong woning long ol pipol (luk long Esekiel 3:17–19). Aot long eksampol blong Jona, yumi luk se i impoten blong sakem sin mo blong stap obei. Stori blong Ebraham i tijim yumi long saed blong laen mo paoa blong Melkesedek Prishud.
Ol misinari blong Niu Testeman, olsem Pita mo Pol, oli wok blong holemtaet ol tijing blong Jisas Kraes. Be, wetem taem, wol i bin foldaon long apostasi. God i putumbak gospel tru long Profet Josef Smit. Yumi stap wok naoia, semmak olsem ol misinari oli bin stap mekem, blong holemtaet mo serem ol tijing blong Jisas Kraes.
Jona long Soa blong Nineve, i kam long Daniel A. Lewis. Jona i bin sakem sin mo i bin go prij mo konfemem se Jehova i rul evri ples mo i no stopem lav blong Hem long wan nesen o pipol nomo (luk long Jona 1–4).
© 2002 Daniel A. Lewis
Pita mo Jon long fored blong Ol Man blong Rul long Jerusalem, i kam long Saemon Veda. Oli bin tekem Pita mo Jon i kam long fored blong kaonsel, mo hae pris i bin askem tufala, “?Weswe? Mifala i tok strong long yufala finis se bambae yufala i no moa yusum nem blong man ya blong tijim ol man. ?Be naoia olsem wanem? Yufala i mekem we ples ya Jerusalem, i fulap finis long ol tok blong yufala. … Nao Pita … i talem se, “Mifala i mas obei long God, mifala i no save obei long man” (Ol Wok 5:28–29).
Jos Histri Miusium i glad blong serem
Aposol Pol, i kam long Karel Skreta. Long ol wokbaot mo leta blong hem, Pol i bin serem strong testemoni blong hem long saed blong Sevya, hemia long Smol Esia mo plante ples long wol we oli bin save se i stap long tetaem ia.
BPK, Berlin / Gemaeldegalerie Alte Meister, Staatliche Kunstsammlungen, Dres / Elke Estel / Hans-Peter Klut / Art Resource, NY
Melkesedek I Blesem Ebram [Ebraham], i kam long Wolta Ren. Melkesedek i blesem Ebram (luk long Jenesis 14:18–20) mo tu, i givim prishud long hem (luk long D&C 84:14). Long wan narafala taem, Lod i bin kamaot long Ebram, i talem se Hem i gat wan stamba tingting blong mekem Ebram i kam wan wokman we bae i tekem nem blong Hem i go long ol defren ples. Mo bae Ebram bae i kasem wan blesing long laen blong hem we bae i kam afta long hem; se long han blong olgeta bae i tekem seves ia mo Prishud bae i go long evri nesen (luk long Abraham 2:6, 9).
Jos Histri Miusium i glad blong serem
Misinari Raet blong Yumi insaed long Buk blong Momon
Alma, Amulek, mo ol boe blong Mosaea, mo Samuel man blong Leman, oli samfala eksampol blong bigfala misinari eksampol we yumi faenem insaed long Buk blong Momon. Aot long olgeta, yumi luk ol eksampol blong fasin blong sakem sin, stap obei mo gat paoa long tingting. Semmak olsem olgeta, yumi save dipen long insperesen mo revelesen we i kam long God blong lidim misinari seves blong yumi.
Amon long fored blong King Lamonae, i kam long Geri L. Kap. Amon i wan long ol boe blong Mosaea, mo hem i bin sevem ol grup blong animol blong King Lamonae. Taem we king i bin askem long Amon sapos God nao i bin sendem hem, Amon i talem se Tabu Spirit nao i singaotem hem blong i tijim gospel “long pipol ia [blong Lamonae], blong hem i save karem olgeta i kam blong save samting we i stret mo i tru” (Alma 18:34).
© Geri L. Kap, oli no save mekem kopi
Hem I Tekem Glad Nius I Kam long Sol blong Mi, i kam long Wolta Ren. Wan enjel i bin visitim Samuel, man blong Leman, mo i tekem “glad nius i kam long sol [blong Samuel]” abaot taem we Sevya bae i kam (Hileman 13:6–7). Olsem pat blong koling blong hem blong prij long ol man blong Nifae, Samuel i klaem long ol wol blong taon blong Sarahemla mo i bin serem ol glad nius ia wetem ol pipol.
Jos Histri Miusium i glad blong serem
Misinari Raet blong Yumi insaed long Doktrin mo Ol Kavenan
Afta long taem blong Restoresen blong gospel, ol misinari oli kam wan pat we i nid blong gat. Ol misinari olsem Dan Jons, Orson Haedi, mo Parli P. Prat i bin serem Buk blong Momon mo gospel blong Jisas Kraes. Sam, olsem brata blong Profet Josef, Samuel, oli bin givim seves kolosap long hom blong olgeta. Ol narafala, oli bin go longwe blong serem gospel long ol ples olsem Taelan, ol Sanwij Aelan (Hawae), Denmak, mo Inglan.
Ol fas misinari ia, plante taem oli stap long ol longfala mo fulap misin. Oli livim papa mo mama, ol swithat blong olgeta, ol waef, ol pikinini, mo ol apu pikinini, semmak olsem we yumi stap mekem tedei. Long yumi, tedei, oli stap olsem ol eksampol blong fet, strong paoa long tingting, fasin blong stap obei, save wok longtaem mo wok wetem strong tingting.
Ol Momon Prija, i kam long Arnold Fribeg, folem wan orijinol peinting we i kam long Kristen Dalsgard. Pikja ia we i soem wan Lata-Dei Sent misinari we i stap tijim gospel blong Jisas Kraes long wan famle blong Denmak we i stap long hom blong olgeta long rural eria, i wan gud eksampol blong ol misinari wok long namba 19 senturi. Ol misinari oli bin stap tij tu taem oli stanap long ol kona blong rod, o long ol miting rum long taon.
© IRI, Arnold Fribeg i glad blong serem
Wilfod Wudrof I Rere blong Mekem Baptaes long Benbo Fam, i kam long Rijad A. Merei. Lod i bin lidim Wilfod Wudrof long ol yia 1840 i go long fam blong Jon Benbo long Hirefosae, Inglan. Wilfod i raetem: “I bin gat wan pipol i stap long ples ia we i bin stap prea blong oda blong ol samting i kambak olsem i bin stap bifo. Wanem i hapen, i we, ol fas teti dei afta we mi kasem ples ia, mi bin baptaesem sikis handred man. … Long eit manis wok long kantri ia, mi bin tekem eitin handred (wan taosen eit handred) man i kam long Jos. ?From wanem? From se i bin gat wan pipol we i bin stap ia we i rere from Gospel” (“Discourse,” Deseret Weekly, 7 Nov. 1896, 643).
Stap Bildimap Yumi Folem Misinari Raet blong Yumi
Stat long taem we Presiden Tomas S. Monson i bin anaonsem long Oktoba 2012 jeneral konfrens se ol yang man mo ol yang woman oli save go long wan misin long wan yia we i daon, plante taosen blong ol Lata-Dei Sent oli bin fulumap misin graon.
Long Epril 2013 jeneral konfrens, Elda Nil L. Andesen blong Kworom blong Olgeta Twelef Aposol i ademap witnes blong hem long misinari wok, mo i leftemap tingting blong wanwan long yumi blong kam wan impoten pat blong merikel ia taem yumi gihvhan blong faenem olgeta we oli rere blong harem gospel: “Olsem we i tru we Lod i stap singaotem plante moa misinari blong go givim seves, Hem i stap wekemap ol tingting mo openem olgeta hat blong ol gud mo ones pipol blong akseptem ol misinari blong Hem. Yu save olgeta finis o bae yu save olgeta yet. Oli pat blong famle blong yu mo stap laef long komuniti blong yu. Oli wokbaot bitim yu long rod, oli sidaon wetem yu long skul, mo oli stap konek wetem yu long intanet” (“Hem i Wan Merikel,” Konfrens Ripot, Mei 2013).
Ol misirani we oli jes kam oli baptaesem ol manples blong Sanwij Aelan (Hawae), hemia long ol yia 1851. Foto ia, deit blong hem i afta long yia ia.
Oli no save mekem kopi
Serem Gospel long Ol Smol Rod, i kam long Ken Spensa. Tufala misinari ia, tufala i stap serem gospel wetem wan man long fored blong wan bukstoa long Niu Branswik, Niu Jesi, YSA.
Jos Histri Miusium i glad blong serem
Misinari Oltaem, i kam long Juei Ing Jen. Ol memba blong Jos long Taewan, semmak olsem ol memba misinari long evri ples, oli lukluk blong serem glad blong olgeta long gospel mo ol skripja. Ol skripja oli stap long tebol; mo insaed long tolfala blu kontena i gat ol skrol we i gat wan pikja blong Taepe Taewan Tempol.
© IRI, Juei Ing Jen i glad blong serem
Ol Man blong Leman bae Oli Kam Bigwan Semmak Olsem Wan Ros Flaoa, i kam long Joselito Jesus Asevedo Garsia. Pikja ia i soemaot spirit blong misinari wok long medel blong ol pipol we oli toktok lanwis blong Spein. Tufala misinari i rere blong tijim gospel taem ol narafala pipol oli go mekem wok blong olgeta evri dei. Lima Peru Tempol, we i stap long medel blong ol smol hom mo animol blong kantri ia, i ripresentem olsem wanem Jos i stap gro.
Jos Histri Miusium i glad blong serem
Ol Lata-Dei Sent Misinari long Siera Leone, i kam long Emile Wilson. Fas misin long Siera Leone i bin oganaes long Fritaon long namba 1 Julae 2007. Fritaon i kam namba 3,000 stek long Jos long namba 2 Disemba 2012.
Jos Histri Miusium i glad blong serem