Ol Yangfala mo Ol Kavenan blong Tempol
Wetem yia blong save go long misin we i kam daon, plante taosen mo moa yangfala oli stap, naoia, mekem tabu kavenan blong tempol.
Olsem ol man we i wok long tempol, mifala i bin gat blesing blong toktok wetem sam yang adalt we oli stap kam long tempol blong kasem endaomen blong olgeta. Mifala i faenem se i help blong oli gat wan woksop blong rere blong go long tempol, be, stret mo gud paoa blong lidim olgeta we i kam long papa mo mama mo ol lida i mekem wan bigfala wok blong helpem olgeta blong mekem ol kavenan blong tempol. Olsem ol papa mo mama, mo ol lida, yumi nidim blong helpem ol yut, i no blong rere from wan fultaem misinari seves, we i stap sam manis nomo, be tu, blong oli mekem mo kipim ol kavenan blong tempol, we i stap blong taem we i no save finis. Ol fas step i stat long taem we wan i smol pikinini.
Stap Rere long Ol Smol Pikinini
Ol papa mo mama oli save soem long ol pikinini blong olgeta olsem wanem tempol i impoten taem oli go wosip long tempol mo taem oli serem ol testemoni blong olgeta long saed blong wok blong tempol. Iven tu long ol ples we i no posibol blong go long tempol oltaem, ol mama mo papa oli save putum insaed long hat blong pikinini blong olgeta, tingting ia blong wantem go long tempol.
Presiden Howod W. Hanta (1907–95) i tijim ol mama mo papa se: “Bae yumi serem, wetem ol pikinini blong yumi ol filing long saed blong spirit we yumi bin gat insaed long tempol. Mo bae yumi tijim olgeta moa strong mo moa gud long saed blong ol samting we i stret blong talem abaot ol stamba tingting blong haos blong Lod.”1 Ol pikinini blong yumi oli nid blong save se tempol i wan ples we yumi bin kasem ol ansa blong ol prea blong yumi, mo i ples we yumi bin filim lav blong God.
Ol mama mo papa oli save tijim tu ol pikinini blong olgeta blong luk fored mo laef klin inaf blong gat wan limit-yus rekomen, blong mekem se oli gat janis blong kwalifae taem bae oli kasem 12 yia. Taem we taem i kam blong ol yut ia blong go long tempol, mifala i luk glad mo hae tingting we oli gat taem oli soem ol rekomen ia long tempol.
Stap Mekem Ol Yut Oli Rere
Ol mama mo papa oli save helpem ol pikinini blong olgeta blong stap wok long lukaotem famle histri blong olgeta blong mekem se taem oli kasem 12 yia, oli save karem ol famle nem i go long tempol. Long olgeta yut we oli stap mekem hemia, Elda Deved A. Bedna blong Kworom blong Olgeta Twelef Aposol i promesem: “Lav mo tangkyu blong yu from ol bubu blong yu bae i kam antap. Testemoni blong yu long saed blong Sevya mo jenis blong laef blong yu i go long Sevya bae i kam bigwan mo bae i stap. Mo mi promesem yu se bae yu kasem proteksen agensem bigfala paoa blong enemi.”2
Mitufala i bin luk plante eksampol blong promes ia i kamtru. I no longtaem i pas, wan yang woman i talem long mitufala se afta we hem i stap lukaotem nem blong bubuwoman blong hem, hem i kam long tempol blong mekem wok blong hem. Hem i talem se taem hem i stap kasem baptaes long bihaf blong hem, hem i gat klia filing se bubuwoman blong hem bae i welkamem hem long nekis laef. Ol eksperiens olsem, oli mekem testemoni i kam strong moa mo i putum wan filing blong wantem tekem pat moa long ol odinens blong tempol.
Plante yut oli fesem temtesen blong dresap nogud. Taem ol papa mo mama, mo oli lida oli werem ol naes mo gud klos, bae ol yut oli luksave se, olgeta tu, oli save mekem semmak. Ol yut oli nid blong andastanem se wei we oli dresap, mo olsem wanem oli tritim bodi blong olgeta i save soem se oli stap olsem disaepol.
Ol mama mo papa oli save helpem ol yut blong rere blong go insaed long tempol taem oli helpem olgeta blong andastanem ol kavenan we bae oli mekem insaed. Ol kavenan blong tempol i tekem ol promes blong “folem stret loa blong klin fasin mo jastiti, blong help, blong gat gud hat, blong save akseptem tingting blong man nating yu no agri wetem mo gat gud tingting, mo stap klin evriwan; blong givim talen mo nara samting blong serem trutok mo leftemap famle blong man; blong holemtaet strong tingting long wok blong trutok; mo blong lukaotem, long evri wei, blong givhan long bigfala wok blong stap rere, blong mekem se wok bae i rere blong risivim King blong hem—we i Lod Jisas Kraes.”3 Ol mama mo papa oli save testifae se ol yut bae oli kasem ol blesing blong olgetawan mo ol blesing we oli gat paoa long ful laef blong olgeta taem oli stap holemtaet ol kavenan ia, mo ol kavenan ia bae oli gat moa mining long ol yut taem ol mama mo papa blong olgeta i helpem olgeta blong andastanem se blesing mo kavenan i kam posibol tru long Atonmen blong Jisas Kraes.
I gat plante wei we yumi save help blong mekem ol pikinini mo ol yut blong yumi oli rere blong kasem ol blesing blong tempol. Moa oli rere, moa bae oli stap long pis mo oli filim Spirit; mo long wei ia bae oli save gat eksperiens long saed blong spirit taem oli kasem endaomen blong olgeta. Wan eksperiens blong tempol we i leftemap tingting bae i mekem se oli komitim olgeta moa olsem ol disaepol blong Kraes mo oli kam ol misinari we oli moa gud—oli gat strong tingting blong helpem olgeta we oli tijim blong rere blong kasem ol tabu tempol kavenan blong olgeta bakegen.
Pikja i kam long Stiv Krop