?Olsem Wanem Nao Bae Mi Stap Olsem Wan Misinari we I Wok Gud?
Woman we i raetem hemia i stap long Mein, YSA.
Nomata kompanion blong mi mo mi i wokhad, evriwan i stap sakemaot mesej blong mitufala. ?Wanem nao mitufala i save mekem blong kam ol misinari we i wok gud?
Mi bin stap long misin blong mi blong moa long wan yia, afta, mi kasem wan spesel hadtaem. Mitufala i stap long medel blong wan taem we weta i nogud tumas—jes kamaot long kolkol winta mo stap muv i go long springtaem. Mo nomata we kompanion blong mi mo mi i wokhad, evriwan we mitufala i stap toktok wetem, i sakemaot mesej blong mitufala wantaem. Taem mitufala i mit wetem ol narafala misinari, mifala i lanem se wok blong olgeta i gud mo i strong. Mi no save tingabot wan risen from wanem mitufala i no save wok gud. Mi bin stap ia longtaem inaf blong toktok gud lanwis; kompanion blong mi mo mi i gudfala fren, mitufala i kasem tras blong ol memba, mo mitufala i traem blong folem Spirit mo obei stret long ol misin rul.
Be nomata wanem samting mitufala i stap mekem, mitufala i fesem man we i sakemaot mitufala long evri kona. Wik afta wik wetem sem samting, mi letem konkon fasin blong mi i winim gud fasin blong mi. Long wan taem blong mekem plan, mi talemaot: “?Bae from wanem? I no gat man i stap lisin long yumitu ia.” Kompanion blong mi, we lukluk blong hem i gud moa long mi i talem simpol nomo: “Yumitu putum gol blong yumitu blong soemaot fet blong yumitu. Yumitu folemap ol gol blong yumitu blong kaontem ol blesing blong yumitu.”
Taem mi tingting long wanem hem i talem, mi luksave se mi bin stap yusum rong mak blong skel blong jajem sakses blong mi olsem wan misinari. Prijim Gospel blong Mi: Wan Gaed long Misinari Seves i givim wan lis blong ol fasin blong ol misinari we oli gat sakses1 mo mi luksave se evri fasin ia, misinari i save kontrolem. Mi no save kontrolem sapos ol pipol insaed long misin blong mi bae oli akseptem mesej o no, be mi save kontrolem kaen misinari we mi jusum blong kam. Kompanion blong mi i soem se sapos mi gat moa fet long Jisas Kraes, mo moa glad long ol blesing blong Lod, bae mi luksave ol wei we mi kam wan misinari we i wok gud finis.
Fet I Saenem Rod blong Ol Merikel
I putum tingting blong mi i stap daon taem mi luksave se fet blong mi i stap go daon. Mi lukaotem ol ples we mi save mekem fet blong mi i kam strong moa, mo faenem se taem ol samting oli no wokaot folem plan, mi letem tingting blong mi i kam slak. Prijim Gospel blong Mi i talem: “Be, yu no mas lusum hop mo daonem tingting blong yu; fasin blong lusum hop olsem bae i save mekem fet blong yu i go daon, bae wok blong yu i go daon, bae yu nomo wantem blong mekem samting, mo bae yu gat moa hadtaem blong folem Spirit”2 Mi luksave se mi bin letem ol taem we mifala i no gat sakses oli mekem fet blong mi i go daon.
Mi stat blong prea blong gat jenis long hat mo gat moa fet. Mo tu, mi dipen long promes we i stap long Momon 9:21: “Eni man we i biliv long Kraes, mo i no gat tingting nating blong no biliv strong; eni samting we bae hem i askem long Papa long nem blong Kraes, bae i givim long hem; mo promes ia i go long evriwan, hem i long ol en blong wol.” Promes ia i lidim mi blong prea moa strong from ol blesing mo ol merikel we kompanion blong mi mo mi i filim se mitufala i nidim, mo oltaem talem: “Olsem we Yu Yu Wantem.” Ol prea ia oli bin helpem mi blong akseptem ol jenis long ol plan, mo ol taem we mitufala i no gat sakses wetem moa fet, wetem save ia se Papa long Heven i stap ansarem ol prea oltaem—nomata ol ansa oli kam long ol wei we yumi no tingting long hem. Mi kam blong save luksave moa ol wei we Lod i stap lidim mifala long hem truaot long dei blong mifala.
Taem mi wok blong mekem fet blong mi i kam strong moa, mi faenem gud toktok we i stap long Prijim Gospel blong Mi i tru: sapos yu mekem tingting blong yu i kam antap, bae yu wok gud moa, bae tingting blong hat blong yu i gro, mo bae yu save folem Spirit long wan wei we i gud moa. Antap long hemia, mi gat moa hop long misinari wok mo misinari seves blong mi taem mi save luksave mo glad long ol merikel we oli bin stap hapen evri dei.
Fasin blong Talem Tangkyu I Atakem Fasin blong Stap Jalus
Lod i stat blong soemaot long mi se Hem i stap mekem ol merikel long wanwan long mifala evri dei—be mi no bin save luksave kasem taem mi mekem strong tingting blong stap talem tangkyu wetem hat blong mi. Blong talem tangkyu i moa bitim blong i stap olsem wan gud fasin o wan stret fasin. Taem mi talemaot tangkyu long Lod mo long ol narafalawan, mi gat paoa. Mi faenem se mi glad tumas long ol nara misinari taem oli gat sakses, be mi no stap jalus (luk long Alma 29:14, 16). Mi bin save lukluk moa long wanem we mi gat, mo wanem we i bin go gud bitim we blong lukluk long wanem mi no gat, mo wanem i no bin go gud.
Mi bin lanem se fasin blong talem tangkyu i meresin blong posen blong stap komperem yumi long ol narafala man. Ol taem ia, we mi no filim blong stap olsem wan misinari we i wok gud, i hapen from se mi stap talem long miwan: “Mi mi no mekem gud nating semmak long olgeta,” o, “Olgeta oli wok gud moa long samting ia i bitim mi.” Mi bin lanem tu se nomata hem i paten blong Lod blong givim yumi ol stret mo gud eksampol blong mekem folem, hem i giaman blong Setan blong temtem yumi blong komperem yumi blong faenemaot se yumi impoten o yumi gat sakses. Be insaed long Prijim Gospel blong Mi i talemaot klia samting ia: “Yu no mas stap komperem yuwan wetem ol narafala misinari mo stap skelem ol frut blong ol wok blong yu wetem hemia blong olgeta.”3 Long en, fasin blong talem tangkyu i bin helpem mi blong no gat hae tingting mo i mekem mi tingbaot se Lod i bos long wok blong Hem. Mi no nidim blong stap jalus from i luk se ol narafala fren misinari oli gat moa sakses.4
Tru Mak o Skel blong Sakses
Bifo mi jenisim wei blong lukluk long ol samting, mi bin stap lukluk nomo long wan kaen blesing, we i mekem mi fogetem blong livim ae blong mi i open long ol nara wei we Lod i bin stap ansarem ol prea blong mitufala, mo stap blesem misinari wok blong mitufala. Long en, Lod i stat blong blesem misinari wok long eria blong mitufala long sam naes wei we mitufala i no ting long hem. Mitufala i faenem ol pipol we oli rere blong akseptem mesej blong mitufala, be mi bin lanem finis, long taem ia, se mi no mas skelem sakses blong mi wetem joes blong ol narafala.
Presiden Godon B. Hinkli (1910–2008) i serem kaonsel blong wan presiden long saed blong misinari wok: “Mekem bes blong yu, bes we beswan blong yu. Talem prea blong yu mo wok had mo livim Lod i sendem ol man i kam long yu.”5 Prijim Gospel blong Mi i tijim ol semmak samting abaot ol misinari we oli gat sakses: “Mekem bes blong yu blong tekem ol sol oli kam long Kraes, mo luklukgud blong lanem samting mo kam antap.”6
Sapos mi save stap gohed blong wantem sakem sin, sapos mi save ones mo ripot long Lod se mi bin stap mekem bes blong mi, mi save trastem miwan se mi bin wan misinari we i wok gud—nomata se pipol i akseptem mesej blong mifala o no. Long plante wei, mak blong makem sakses blong mi olsem wan misinari, oli save jajem long hamas mi wantem sakem sin, mo hamas mi gat strong tingting blong gohed blong wok.
Mi gat plante merikel we mi rekodem long jenol blong mi abaot taem blong mi long misin. Taem mi bin stap traehad blong stap moa fetful mo talem tangkyu moa, lukluk blong mi i kam gud moa, mi nomo slakem tingting, mo mi bin filim Spirit plante moa long wok ia. Mi bin faenem se wanem we Prijim Gospel blong Mi i stap tijim, i tru: “Taem yu mekem evri samting we yu save mekem, bae yu save yet samtaem, lusum hop, be bae yu no save lusum hop long yuwan o yu no save tingting daon long yuwan. Yu save filim tru se Lod i glad long yu taem yu filim se Spirit i wok tru long yu.”7 Mo taem mi bin filim se Lod i bin glad long mi, mi bin save stanap strong tru long eni tes.
Long plante wei, mak blong makem sakses blong mi olsem wan misinari, oli save jajem long hamas mi wantem sakem sin, mo hamas mi gat strong tingting blong gohed blong wok.
Foto pikja i kam long Del Benson