Blong Ol Yut Oli Kam Strong
Stap Strong, Stap Helti, Stap Smat
?Yu wantem filim gud moa mo gat moa tras long yuwan long saed blong bodi mo filing? Blong mekem spot oltaem bae i help.
I no longtaem i pas, mi bin ridim wan gudfala tingting abaot fasin blong mekem spot. Mi ridim se sapos yu girap eli long moning, yu putum klos blong spot, mo tingting: “bae mi werem hemia, go wokbaot aotsaed, mo sapos mi stat blong harem gud, bae mi stat blong ron,” ating bae yu mekem wan gud spot taem bifo yu luksave. Sapos yu kam antap wetem wan simpol plan olsem, hem i save helpem yu blong divelopem ol gud fasin blong mekem spot, mo kea long bodi blong yu. Long plante pipol, blong stat mo stap gohed oltaem, i pat ia we i moa had. Sapos yu tingbaot se blong mekem smol spot bae i blesem bodi blong yu, be tu, maen blong yu mo waes blong yu, bae i helpem yu blong wantem kam fit moa long saed blong bodi blong yu. Taem yu stap mekem smol spot, bae i kam wan man o woman we i gat fulap paoa, we i filim se hem i strong, i gat tras, i luksave kwik ol samting, mo i gat sekuriti.
Yu no stap olsem les pijin we i stap salem feta blong hem blong gat sam wom.
Pikja i kam long Kreg Niubold
Mi tingbaot stori blong wan pijin we i stat blong salem ol feta blong hem blong save kakae ol wom. Hem i wan isi kaekae blong kasem long wei ia, mo pijin i tingting se hem i gat plante feta. Taem hem i stap gohed blong stap salem ol feta blong hem, pijin ia i stap glad blong no stap girap eli long moning blong lukaotem wom bakegen. Hem i sidaon nomo long bed blong hem ful dei, mo i neva muvum wan masol blong hem. Be long en, pijin i nomo save lego fasin ia, mo i luksave se hem i nomo save flae from se hem i lusum ol impoten feta blong hem.
Hemia i save hapen long eniwan we i foldaon long trap blong ol nogud fasin, ol les fasin, o fasin blong yusum ol samting we i mekem man i adik. Insaed long buklet, Blong Ol Yut Oli Kam Strong yumi ridim se ol samting ia oli “spolem gud laef blong bodi blong yu, tingting blong yu, filing blong yu, mo spirit blong yu. Oli spolem ol rilesensip wetem famle mo ol fren, mo i daonem filing blong yu blong tingting gud long yuwan.”1 Blong muvmuvum bodi mo kakae stret kaekae i helpem yumi blong stap longwe long ol nogud fasin ia. Sapos pijin ia i bin gohed nomo blong flae mo lukaotem kaekae blong hem, bae hem i neva lusum feta blong hem. Semmak, sapos yumi “saksakem wing blong yumi” mo stap mekem smol spot, bae yumi developem gud fasin ia blong stap longwe long ol samting we bae i spolem yumi mo daonem yumi.
Semmak olsem se sam man o woman oli stap traehad wetem helt blong bodi blong olgeta, sam narafala bae oli traehad wetem helt blong filing blong olgeta. Laef i save had, mo samtaem yumi save gat ol filing blong wari, tingting tumas, o nomo trastem yumiwan. Be tingbaot se tugeta samting ia, helt long saed blong bodi mo long saed blong filing, taem yu mekem smol spot mo wok had, i helpem yu blong gat wan gud tingting. Taem yu tekem kea long bodi blong yu tu i blesem maen blong yu, mo i helpem yu blong tingbaot se yu wan pikinini blong God, mo yu save gat tras long yuwan mo stap hapi. Ol saed blong yumi, long saed blong filing, bodi, mo spirit, evriwan ia oli joen tugeta. Blong Ol Yut Oli Kam Strong i tijim se: “helt blong yu long saed blong filing i impoten tu; mo i save spolem o no spolem gud laef blong yu long saed blong spirit o long saed blong bodi. Fasin blong man i harem nogud wanwan taem oli pat blong laef ia long wol. Be, sapos yu gat ol bigfala filing blong harem nogud, se yu blong nating, filing blong wari, o tingting we i tumas, toktok wetem papa mo mama blong yu, mo wetem bisop blong yu mo luklukgud blong askem sam help.”2
?From wanem yumi faenem ol pipol raon long yumi we i luk se oli gat moa paoa long bodi mo oli glad moa? Wan stamba risen, hem i ol fasin blong mekem samting. Sapos yumi lukluk long bodi blong yumi long saed blong spirit mo andastanem se hem i “wan tempol, wan presen we i kam long God,” bae yumi lavem bodi blong yumi, mo bae yumi kipim i tabu.3
Long mi, tabu i minim klin, we oli fidim gud, mo i strong. Wan long wei we Papa long Heven i helpem yumi blong kipim bodi blong yumi i tabu, i taem Hem i givim Tok blong Waes long yumi. Blong Ol Yut Oli Kam Strong i eksplenem: “Taem yu obei long Tok blong Waes, yu stap fri long ol nogud fasin we i mekem bodi blong yu i adik, mo yu gat kontrol long laef blong yu. Yu kasem ol blesing blong wan helti bodi, wan tingting we i opengud, mo yu kasem daereksen long Tabu Spirit. Bae yu rere blong givim seves long Lod. Neva letem Setan, o ol narawan oli giaman long yu blong tingting se blong brekem Tok blong Waes bae i mekem yu hapi moa, i moa popula, i moa naes.”4 Taem yu stap folem Tok blong Waes, tingbaot se yu stap tekem kea long tugeta samting ia, bodi mo maen blong yu, mo hem i letem yu faenem waes tingting mo ol bigfala rij save” (luk long D&C 89:19).
Yu no stap olsem wan les pijin we i stap salem ol feta blong hem, be yu putum maraton sus blong yu mo yu muvmuv. Mekem spot o muvum bodi blong yu oltaem. Rejista long wan spot we yu laekem, o mekem fren wetem sam we yu save ron, o mekem sam narafala samting wetem. Taem yu mekem sam samting blong muvum bodi, yu stap trenem bodi blong yu, be tu, tingting blong yu. Smol spot o blong muvum bodi, i mekem helt long saed blong filing tu i kam strong moa. Tingbaot se samting we i moa impoten, i no se yu ron spid o no, o yu wan spotman o spotwoman—hem i sapos yu muvmuv oltaem. Taem yu stap mekem spot o muvum bodi oltaem, bae yu no stap hapi nomo, be tu, bae yu kam strong moa, helti moa, mo smat moa.