Folem Ol Step blong Hem

I Kam long Melisa Senteno

Ol Magasin blong Jos

Blong kam olsem Sevya, i wan rod we yu folem sloslo, long ful laef, mo yu save stat blong mekem ol smol step evri dei.

Christ walking with sheep in the background.

Ol skripja oli leftemap tingting blong yumi blong kam moa olsem Jisas Kraes mo blong mekem “fasin blong [yumi] i stret gud wetem fasin blong Jisas Kraes” (Fas Jon 2:6). Be, blong tekem fas step ia, ating i had—speseli taem yu no save olsem wanem blong stat.

Bae yu faenem help insaed long Prijim Gospel blong Mi: Wan Gaed long Misinari Seves. Ating yu ting se hem i wan hanbuk nomo blong ol fultaem misinari, be wanem we i stap, hem i we hem i wan gudfala tul we i save helpem yu blong statem gol blong yu blong kam olsem Sevya. Oli raetem Japta 6 blong mekem se i helpem yu blong andastanem mo yu yusum ol naen stret fasin we i olsem hemia blong Kraes.

Hemia sam tingting long olsem wanem blong yusum Prijim Gospel blong Mi mo ol skripja taem yu stap luklukgud blong developem ol fasin we oli olsem hemia blong Kraes:

• Blong stat, go long Aktiviti blong Divelopem Fasin we i stap long en blong japta 6 insaed long Prijim Gospel blong Mi (pej 139). Aktiviti ia, i save helpem yu blong faenemaot wijwan fasin oli stap olsem ol paoa blong yu long saed blong spirit, mo wijwan nao yu nid blong wok long olgeta.

• Afta we yu finisim aktiviti, prea blong jusum wan fasin we bae yu lukluk long hem nomo. Tingting blong ridim seksen long japta 6 we i tokbaot ol fasin.

• Setem ol stret gol we yu save skelem, we bae i helpem yu blong divelopem fasin ia. Givim wan taem we bae yu wok long gol blong yu ia. Afta, skelem progres blong yu. Eksampol, sapos yu stap traem blong gat moa jareti, ating bae yu putum wan gol blong talem ol gudfala samting abaot brata o sista blong yu tri taem long wan dei blong wan wik taem. Long en blong wik, bae yu skelem olsem wanem yu bin wok long gol blong yu, mo stretem yu long wan wei we bae i helpem yu blong gohed blong kam antap.

• Prijim Gospel blong Mi i givim wan skripja stadi blong wanwan fasin. Yu save stadi long ol skripja we oli stap wetem prea, mo afta, raetemdaon ol tingting we yu bin kasem taem yu bin stap rid.

• Askem Papa long Heven blong kasem help blong developem wan fasin we i olsem hemia blong Kraes. Askem blong sam stret help, olsem “Plis givim mi paoa blong winim kwik kros blong mi taem brata o sista blong mi i tekem ol samting blong mi.” Moa yu talem stret samting long prea blong yu, moa bae i isi blong yu luksave ol ansa blong Lod.

Blong kam olsem Sevya, Jisas Kraes, i wan rod blong folem sloslo, mo wan samting blong lukaotem long ful laef. Samtaem, hem i moa had bitim ol fisik klas we i had tumas. Be yu no lusum hop. Lod i promesem yumi se hem we i kasem laet, mo i gohed wetem God, i kasem moa laet; mo laet ia i saen bigwan mo bigwan moa kasem dei ia we i stret evriwan (luk long D&C 50:24). Taem yumi stap kasem, stadi mo yusum laet mo trutok, mo gohed blong folem God long evri dei, bae yumi save stret se bae yumi kam moa olsem Sevya blong yumi, Jisas Kraes.

Lukaotem Wan Ia, I Kam long Lis Lemon Swindol, oli no save mekem kopi; phofoto pikja © Seila Mari Fursov; pikja biaen © iStock/Thinkstock; dekoresen © Hemera/Thinkstock

Wok blong Mekem Evri Dei

Ol smol aksen evri dei, oli wanwan step folem rod ia blong kam olsem Sevya blong yumi. Tingting long ol narafala aktiviti ia blong helpem yu blong developem ol fasin olsem hemia blong Kraes:

• Ridim ol skripja we oli raetemdaon insaed long Topical Guide o Guide to the Scriptures we i go wetem fasin we yu stap luklukgud blong developem.

• Prea evri dei blong kasem filing long hat blong yu, blong jenis mo kasem paoa blong kam antap.

• Kipim wan jenol blong raetemdaon progres blong yu.

• Toktok wetem papa mo mama blong yu. Letem olgeta oli save long ol gol blong yu blong mekem se oli save helpem yu.

Joenem Storian

Truaot long manis Oktoba, bae yu stadi long wei blong kam moa olsem Kraes (sapos wod blong yu o branj blong yu i gat ol niufala lesen long lanwis blong yufala). Afta we yu ridim atikol ia, prea blong jusum wan fasin blong wok long hem long wik ia o manis ia. Yu save putum wan gol, mo afta, skelem progres blong yu. Eksampol, ?Yu bin gat moa jareti, o yu bin obei moa, o yu bin gat moa fasin blong save wet longtaem? ?Olsem wanem nao gol blong yu blong kam moa olsem Kraes i bin helpem yu blong winim wanem i bin had? Tingting blong serem eksperiens blong yu wetem ol nara yut o wetem famle blong yu.

Ol Sandei Lesen

Topik blong Manis Ia: Blong Kam Moa Olsem Kraes