Jes Smael mo Talem No
Hem we i raetem atikol ia i stap long Metro Manila, long Filipin.
Mi bin stap talem no long olgeta we oli givim dring long mi, be naoia, presiden blong kampani i stap givim wan glas waen long mi.
Pikja i kam long Sudi MaKolan
Wan samataem, mi tekpat long wan smol wok long wan aelan long Bikol, Filipin. Taem mi lukluk i go long solwota, i naes tumas, mo mi wantem luk samting ia evri moning.
Be, mi no laekem ol naet taem. Hemia i taem we ol pipol long kamp bae oli stat dring mo gat pati. Oltaem oli invaetem mi blong go long ol pati olsem, mo ol nara fren blong mi mo mi i mas go, from se sapos mifala i no go, i olsem se mifala i no gat respek.
Fas pati, hem i wan pati blong welkamem ol niu wokman long wok. Mi fraet blong go, from se mi save gud se bae oli givim dring mo mi no save stret olsem wanem blong talem no. Mi singaotem wan fren long wod blong mi long hom, mo hem i givim sam gudfala advaes we i leftemap tras blong mi.
Taem pati i stat, oli stat blong givim ol dring long mifala, be laki, oli no fosem mifala blong dring. Ol fren blong mi oli akseptem se mi mi no stap dring, mo afta, i kam isi blong no akseptem wan dring—kasem wan naet. Long wan long ol pat ia, presiden blong kampani i kam. Hem i stap holem wan botel blong lambanog (wan lokol waen we oli mekem long kokonat). I no longtaem afta we hem i kasem pati, mi bin luk hem i stap kapsaetem sam waen ia i go. Afta hem i talem: “Yu mas lan olsem wanem blong dring” mo i givim wan glas long wan long ol niu wokman ia. Woman ia i dring glas ia kwiktaem.
Hat blong mi i stat blong pam strong. Bae i no longtaem, bae i raon blong mi. Mi stap toktok sloslo long miwan: “Bae mi no dring. Bae mi no dring.” Afta, mi luk presiden i givim glas waen long mi. Mi no save wanem blong mekem. Ol fren blong mi oli stap lukluk mi, oli wet se bae mi mekem wanem. Mi smael long presiden mo wetem tingting i stap daon, mi talem: “Sore masta, be mi mi no dring.”
Mi save se hem i harem nogud. Hem i askem se from wanem mi no stap dring. Mi talem: “Mi mi wan Momon.”
Hem i talem: “Mi no harem abaot relijin ia. I saon olsem wan kaen kaekae.” Evriwan i laf.
Mi smael tu, i no from fani tok blong hem, be nomo, from se mi save se mi bin mekem stret samting.
I no gat wan i givim wan dring long mi bakegen. Be yet, fani tok ia i no stop, iven ol fren blong mi oli stap talem. Wan i talem se mi stap giaman, mo i no posibol nating se ol memba blong Jos oli no dring. Long taem ia, mi filim ol fos we oli kam agensem ol memba blong Jos.
Taem ia we mi spendem long aelan ia, i tijim mi plante lesen; i no long skul nomo, be tu, long saed blong spirit. Mi bin lanem se fasin blong jik i neva stop, be Spirit blong Lod, oltaem bae i lidim yu blong mekem wanem we i raet.